Panagnaꞌan 19

Taluwaꞌ Mulkaꞌ Lahat Sodom maka Gomora

¹ Na, song na sangom, atꞌkka na duwa malaꞌikat eꞌ ni daꞌira Sodom, hinabu si Lōt aningkōꞌ-ningkōꞌ ma atag lawang daꞌira. Pagꞌndaꞌ si Lōt ma duwangan itu, pasampang iya ma sigām maka eꞌna pasujud. ² Yuk si Lōt, “Saga tuwan, pahapit lagiꞌ kam piꞌitu ni lumaꞌku minsan mbal na apatut. Ngāꞌanta kam boheꞌ pangoseꞌ tapeꞌbi. Labotta kam, ati maitu na kam atuli. Subay na subu boꞌ yampa kam palanjal.”

Ya sambung sigām, “Sagarin na, maitu sadja kami atuli ma halaman itu.” ³ Sagōꞌ pinogos sigām eꞌ si Lōt subay pinasōd ni lumaꞌna, manjari ameyaꞌ na sigām. Magpanohoꞌan si Lōt ma saga sosohoꞌanna, sinōꞌ magadjal sampay angahinang tinapay halam pinasuligan pangalabot ma sigām. Atahak paꞌin, amangan na sigām.

⁴ Na, halam lagiꞌ sigām atuli, alibut na lumaꞌ si Lōt eꞌ saga kalꞌllahan kamemon ondeꞌ-mattoꞌa min sakalibutan daꞌira Sodom inān. ⁵ Angalingan sigām ma si Lōt, yuk sigām, “Oy, Lōt! Maꞌai na saga aꞌa bay bowanu ni lumaꞌnu insiniꞌ-i? Paluwasun sigām piꞌitu ni kami. Bilahi kami angusibaꞌan sigām duwangan.”

⁶ Pagkale si Lōt, magtūy iya paluwas min lumaꞌna. Tinambol eꞌna lawang ⁷ ati yukna ma kalꞌllahan inān, “Saga tuwan, angamuꞌ aku junjung ma kaꞌam. Daꞌa kam maghinang jahulakaꞌ ilu. ⁸ Pakale lagiꞌ kam. Oꞌo, itiyaꞌ duwangan anakku budjang. Sohoꞌku sigām paluwas piꞌilu ati bayaꞌ-bayaꞌbi na. Daꞌa sadja saga aꞌa itu sabab itiyaꞌ sigām ma deyomanku, subay sigām halliꞌanku.”

⁹ Saguwāꞌ ya sambung saga kalꞌllahan Sodom eꞌ ma si Lōt, yuk-i, “Pasebog ka minnilu! Sai sa kaꞌa ilu amituwa ma kami? Kaꞌa ilu nggaꞌi ka aꞌa minnitu. Na, bang ka mbal pasebog minnilu, hinang kami ma kaꞌa akalap lagiꞌ min duwangan aꞌa ilu.” Magtūy nijudjalan si Lōt eꞌ sigām ni bihing lawang, song toꞌongan nilarak eꞌ sigām tambolna inān. ¹⁰ Daipara ya duwangan ma deyom-i makaukab lawang supaya tahellaꞌ si Lōt pareyom. Ma deyom paꞌin, tinambol magtūy eꞌ sigām lawang. ¹¹ Manjari saga lꞌlla kamemon ma luwasan lumaꞌ, ai na ka ondeꞌ-ondeꞌ, ai na ka mattoꞌa, bay kasilawan eꞌ aꞌa duwangan-i boꞌ mbal makabāk lawang.

¹² Manjari atilaw duwangan malaꞌikat eꞌ ma si Lōt, yuk sigām, “Aniyaꞌ lagiꞌ kampungnu maitu ma lahat Sodom, anaknu dꞌnda-lꞌlla ka, atawa ayuwannu? Bang aniyaꞌ, subay sigām bowanu alahi min daꞌira itu ¹³ sabab lubu kami lahat itu. Takale asal eꞌ PANGHŪꞌ-Yawe sumbungan pasal kalaꞌatan saga aꞌa Sodom, makalanduꞌ na toꞌongan. Angkan kami sinohoꞌ piꞌitu eꞌna amakaꞌat katibuꞌukan lahat itu.”

¹⁴ Magtūy pehēꞌ si Lōt ni duwangan lꞌlla ya tunang anakna budjang ati yukna, “O, palꞌkkas kam, alaꞌan kam minnitu sabab lahat itu song nilubu eꞌ PANGHŪꞌ.” Saguwāꞌ mbal sigām amꞌnnal ma si Lōt. Pangannal sigām in iya hal maglata.

¹⁵ Pagdaiꞌ llaw pinogos si Lōt eꞌ saga malaꞌikat-i, yuk sigām, “Palꞌkkas ka magmomos. Bowahun anak-hꞌndanu alaꞌan min lahat itu boꞌ supaya kam mbal talapay pinagmulkaꞌan eꞌ Tuhan.”

¹⁶ Saguwāꞌ magduwa-ruwa lagiꞌ si Lōt angkan iya arak taluwaꞌ mulkaꞌ, daipara maꞌaseꞌ PANGHŪꞌ ma iya. Niambit iya eꞌ malaꞌikat, iya baranna sampay hꞌndana maka duwangan anakna budjang. Jari binowa sigām paluwas min daꞌira heꞌ. ¹⁷ Ma luwasan paꞌin, ahꞌlling malaꞌikat dangan, yukna, “Anginosog kam paragan boꞌ kam mbal magmula. Daꞌa kam pahoggaꞌ ma kapantayan ilu. Daꞌa kam minsan palingiꞌ. Alahi sadja kam pehēꞌ ni kabūd-būran supaya kam mbal talapay amatay.”

¹⁸ Sagōꞌ aniyaꞌ pahꞌlling si Lōt ma iya. “Oy daꞌa saga tuwanku,” yukna. ¹⁹ “Aheya pagsukulanku ma kaꞌam, tatabangbi ginhawa baranku. Sagōꞌ, ndūꞌ, alawak makalanduꞌ kabūran eꞌ. Maraiꞌ mbal tasampayku ati taꞌabut mulkaꞌ aku. ²⁰ Ndaꞌun ba kauman inān, anahut asal maka asekot piꞌitu. Bang bahāꞌ tugutannu aku alahi pinaꞌan, sabab taꞌndaꞌnu kanahutna. Manjari asalamat du aku.”

²¹ Na, ya sambung malaꞌikat ma si Lōt, “Ahoꞌ, makajari kam pinaꞌan. Mbal du pakaꞌatku kauman inaꞌan-i. ²² Saguwāꞌ paragan kam pahāp. Subay kam atꞌkka pehēꞌ boꞌ yampa lanjalanku hinangku.” Manjari ya kauman kapēꞌan disi Lōt inān, kaōnan Sowar ma sabab bissala si Lōt, ya yukna anahut-nahut konoꞌ.

²³ Na, pagtꞌkka disi Lōt ni Sowar yambohoꞌ pasobang mata llaw. ²⁴ Lahat Sodom maka lahat Gomora heꞌ pinatumbukan ulan api eꞌ PANGHŪꞌ-Yawe. ²⁵ Manjari kamulkaꞌan eꞌna duwa lahat eꞌ. Talapay isab saga kalumaꞌan ma kaluhaꞌan kapantayan inān sampay manusiyaꞌna kamemon sampay isab paltomoꞌ-tomoꞌanna kamemon. ²⁶ Sagōꞌ bay palingiꞌ hꞌnda si Lōt ni buliꞌanna ati tahinang iya magtūy batu asin.

²⁷ Na, pagsalung dakayuꞌ boꞌ subu-subu lagiꞌ, magdaiꞌ-daiꞌ si Ibrahim pabīng pehēꞌ ni bay patꞌnggehanna ma matahan PANGHŪꞌ. ²⁸ Niromolan eꞌna karatagan lahat Sodom maka Gomora. Humbu sadja ya taꞌndaꞌna mainaꞌan, saliꞌ humbu tapahan aheya makalanduꞌ. ²⁹ Daipara kinannal si Ibrahim eꞌ Tuhan hinabuna amatꞌkka mulkaꞌ ma saga daꞌira bay paglahatan si Lōt. Hatina si Ibrahim ya sababna angkan si Lōt pinapuwas eꞌ Tuhan min mulkaꞌ.

Pasal si Lōt maka saga Anakna Budjang

³⁰ Na, si Lōt maka duwa anakna budjang inān tināw maglahat ma lahat Sowar. Manjari alaꞌan sigām pehēꞌ ni kabūd-būran ati mahēꞌ na sigām patꞌnnaꞌ ma deyom dakayuꞌ songab batu. ³¹ Dakayuꞌ llaw magsuli-suli anak si Lōt karuwangan. Yuk siyaka ma siyali, “Nneng, atoꞌa na si Mmaꞌ maka halam na aniyaꞌ lꞌlla ma lahat itu tahinangta hꞌlla buwat kabiyaksahan manusiyaꞌ. ³² Gom lagiꞌ palangota si Mmaꞌ, jari maghulid kita maka iya boꞌ supaya aniyaꞌ tubuꞌta.” ³³ Na pagsangom paꞌin, pinalango si Lōt eꞌ anakna-i ati pabihing ni iya anakna siyaka. Halam tasayu eꞌ si Lōt sabab nilango iya.

³⁴ Pagꞌllaw, amissala siyaka ma siyali, yukna, “Aku ya bay ma bihing si Mmaꞌ dibuhiꞌ. Na, sangom ilu, palangota iya pabīng ati kaꞌa na ya pabihing atuli. Manjari,” yukna, “saliꞌ-saliꞌ kita makabāk tubuꞌ min mmaꞌta.” ³⁵ Sakali itu pagsangom paꞌin, pinalango si Lōt eꞌ duwangan anakna boꞌ pabihing ni iya anakna siyali. Halam du isab aniyaꞌ ai-ai tasayu eꞌ si Lōt sabab nilango iya. ³⁶ Manjari abꞌttong eꞌ si Lōt duwangan anakna. ³⁷ Siyaka anganak lꞌlla ati ōnanna Mowab. Si Mowab itu ya na poꞌonan saga bangsa Mowab buwattinaꞌan. ³⁸ Ya du anak si Lōt siyali, anganak isab lꞌlla ati niōnan eꞌna Bin-ammi. Manjari si Bin-ammi itu, ya na poꞌonan saga bangsa Ammon buwattinaꞌan.