20
Pasal si Ibrahim maka si Abimelek
1 Na, maglain disi Ibrahim min lahat Mamre tudju ni Negeb ma lahat Kanaꞌan boꞌ pahantiꞌ ma tongaꞌan Kades maka Sūr. Puwas eꞌ, palanjal sigām ni daꞌira Gerar, ati ma Gerar paꞌin, 2 angahaka si Ibrahim pasal hꞌndana si Sara, in iya danakanna konoꞌ. Manjari pagtaꞌu itu eꞌ si Abimelek, ya sultan ma lahat Gerar, pinabowa eꞌna si Sara boꞌ hinangna hꞌnda. 3 Pagsangom paꞌin, pinauppihan si Abimelek eꞌ Tuhan. Yuk Tuhan ma iya ma deyom uppina, “Amatay koꞌ kaꞌa ilu sabab dꞌnda bay taꞌāꞌnu ilu taga-hꞌlla asal.”
4 Na, halam giꞌ makabihing si Abimelek ni si Sara, angkan iya anambung ma Tuhan, yukna, “O Panghūꞌku, papataynu aku bahāꞌ, sampay saga aꞌaku, ma halam aniyaꞌ dusaku? 5 Bay aku nihakaꞌan eꞌ si Ibrahim ya dꞌnda itu danakanna konoꞌ. Ya du dꞌnda-i, bay angahaka isab in sigām magdanakan konoꞌ. Tuꞌud aku aꞌawam, halam kataꞌuwanku in iya taga-hꞌlla, maka halam aku makahinang alaꞌat.”
6 Manjari ya sambung Tuhan ma si Abimelek ma deyom uppina, “Ahoꞌ, kataꞌuwanku aꞌawam ka. Angkan ka bay saggaꞌku boꞌ mbal makasekot ni iya, maka mbal isab makahinang dusa ma aku. 7 Na, papoleꞌun na dꞌnda ilu pehēꞌ ni hꞌllana. Nabi asal iya ati angamuꞌ-ngamuꞌ iya ni aku ma pasalnu supaya ka mbal amatay. Sagōꞌ bang saupama mbal papoleꞌnu, tantu du ka amatay sampay saga aꞌa ma deyomannu kamemon.”
8 Pagsubu-subu paꞌin, pinatimuk eꞌ si Abimelek kamemon saga tendogna supaya pataꞌuna sigām pasal bay tumaluwaꞌ ma iya inān. Magtūy aheya tāw sigām. 9 Si Ibrahim isab sinōꞌ patampal ni si Abimelek boꞌ tilawna, yukna, “Alaꞌat pahāp hinangnu ma kami! Ai dusaku ma kaꞌa ya angkan kami maka bebeyaꞌanku katōngannu dusa landuꞌ aheya itu? Mbal manjari! 10 Ai poꞌonanna ya angkan ka makahinang buwattilu?”
11 Na, ya sambung si Ibrahim, “Tuwan sultan, pangannalku halam aniyaꞌ ma lahat itu tināw ma Tuhan. Angkanna ya ma deyom atayku binonoꞌ du aku boꞌ taꞌāꞌ hꞌndaku. 12 Bꞌnnal isab, magdanakan kami, daꞌmmaꞌ, duwa inaꞌ. Jari tahinangku iya hꞌnda. 13 Na, ma masa bay panohoꞌ Tuhan ma aku subay palawak min deyoman mmaꞌku, bay sa yukku ma hꞌndaku, ‘Bang ka sabꞌnnal-bꞌnnal maꞌaseꞌ ma aku, piꞌingga-piꞌingga lahat katꞌkkahanta angahaka ka in kita magdanakan.’ ”
14 Na, pagkale lling itu eꞌ si Abimelek, pinapoleꞌ eꞌna si Sara ni si Ibrahim. Aniyaꞌ isab saga bili-bili, saga sapiꞌ maka saga ata dꞌnda-lꞌlla pamuwan eꞌ si Abimelek ma si Ibrahim. 15 Amissala lagiꞌ iya ma si Ibrahim, yukna, “Ndaꞌun luha lahatku itu. Ameneꞌ ka maingga-maingga kabayaꞌannu patꞌnnaꞌan.” 16 Yukna isab ma si Sara, “Itiyaꞌ buwananku danakannu dangibu pilak dī pilak pangandiyat kasāꞌanku, paltandaꞌan in kaꞌa halam bay makahinang dusa minsan ai.”
17-18 Na, saga karꞌndahan kamemon ma okoman si Abimelek bay pinatigangan kandang eꞌ PANGHŪꞌ-Yawe ma sabab kapangāꞌna ma si Sara hꞌnda si Ibrahim. Jari angamuꞌ-ngamuꞌ si Ibrahim ni Tuhan ma pasalan disi Abimelek, ati nirūlan pangamuꞌ-ngamuꞌna. Hatina kauliꞌan si Abimelek maka hꞌndana sampay saga ipatanna dꞌnda ati makaꞌanak sigām pabīng.