21
Kapanganak ma si Isaꞌak
1 Na, tinuman eꞌ PANGHŪꞌ-Yawe bay panganjanjiꞌna ma si Sara, kabuwanan iya kahāpan. 2 Hatina abꞌttong iya ati anganak iya lꞌlla. Jari taga-anak na si Ibrahim ma katoꞌana. Ya waktu kapanganak si Sara ya na waktu asal bay pangallam Tuhan. 3 Manjari si Isaꞌak ya pangōn si Ibrahim ma anakna min si Sara. 4 Taꞌabut paꞌin walumbahangi si Isaꞌak ma luwasan, magtūy iya niꞌislam eꞌ si Ibrahim buwat bay panohoꞌan Tuhan ma iya. 5 Dahatus tahun na umul si Ibrahim ma waktu kapanganak ma si Isaꞌak eꞌ.
6 Sakali angꞌbbat si Sara, yukna, “Itiyaꞌ aku kabuwanan kakōgan maka pagtittowahan eꞌ Tuhan. Sasuku isab makakale ma pasal itu-i magbeyaꞌ du magtittowa maka aku.” 7 Yukna lagiꞌ, “Ma waktu dahū halam aniyaꞌ aꞌa makatawakkal ahꞌlling ma si Ibrahim in aku itu makaparuruꞌ giꞌ. Sagōꞌ itiyaꞌ aku kabuwanan anak minsan atoꞌa na hꞌllaku.”
Kalahi si Hajara maka si Ismaꞌil
8 Na, aheya-heya paꞌin si Isaꞌak, nilutas iya min inaꞌna. Manjari aheya jajamuhan pinasakap eꞌ si Ibrahim ma llaw kalutas ondeꞌ inān. 9 Pagubus, taꞌndaꞌ eꞌ si Sara anakna si Isaꞌak pinagtittowahan eꞌ ondeꞌ-ondeꞌ ya anak si Ibrahim min si Hajara ya bangsa Misil. 10 Sakali ahꞌlling si Sara ni si Ibrahim, yukna, “Tuwanku, palaꞌanun banyagaꞌ itu maka anakna si Ismaꞌil. Mbal iya subay binahagiꞌan altaꞌ ya pamusakaꞌnu ma anakta si Isaꞌak.”
11 Na, pagkale si Ibrahim ma lling hꞌndana-i, landuꞌ iya asusa sabab anakna du isab si Ismaꞌil. 12 Saguwāꞌ magsuwala Tuhan ma si Ibrahim, yukna, “Daꞌa ka asusa pasal ondeꞌ ilu maka inaꞌna ya atanu. Beyaꞌun sadja pahꞌlling si Sara ma kaꞌa, sabab si Isaꞌak ya poꞌonan paltubuꞌannu. 13 Ya pasal anak si Hajara, pahekaku panubuꞌna sampay sigām tahinang bangsa, sabab anaknu du iya.”
14 Sakali pagsalung, subu-subu paꞌin, aniyaꞌ sinakap eꞌ si Ibrahim kinakan maka kuwit kambing isihan boheꞌ. Pinatanggung eꞌna ma baha si Hajara boꞌ yampa pinatulak eꞌna, iya maka anakna si Ismaꞌil. Jari palꞌngngan-lꞌngngan sigām ma paslangan lahat Beꞌerseba boꞌ halam saliꞌ aniyaꞌ patudjuhan sigām tantu. 15 Na, aubus paꞌin boheꞌ bay lutuꞌ sigām, kaꞌbbahan eꞌ si Hajara anakna ma lindung kayu areyoꞌ-deyoꞌ. 16 Paokat iya saga limampūꞌ dꞌppa lawakna aningkōꞌ. Ya ma pikilanna, “Arōy, mbal aku makasandal angꞌndaꞌ bang amatay anakku.” Jari magdohon iya pagtingkōꞌna ma tongod inaꞌan.
17 Daipara takale tangis ondeꞌ-ondeꞌ inān eꞌ Tuhan. Magtūy aniyaꞌ suwala malaꞌikat min deyom sulgaꞌ ahꞌlling ni si Hajara, yuk-i, “O Hajara, angay ka asusa? Daꞌa ka tināw sabab takale eꞌ Tuhan pagtangis anaknu hinabuna palege ma dambilaꞌ ilu. 18 Bangunun iya boꞌ ambitun pahāp, sabab ma sinosōng hinangku paltubuꞌanna bangsa gaꞌosan.”
19 Sakali itu aniyaꞌ boheꞌ pamaꞌndaꞌ Tuhan ma si Hajara. Magtūy iya pehēꞌ anauk boꞌ pinꞌnnoꞌan kuwit kambing ya bay bowana, ati pamainum eꞌna ma anakna inān.
20 Manjari si Ismaꞌil itu halam bay pinasagaran eꞌ Tuhan hinabuna pasulig. Inaꞌan iya maglahat ma Paslangan Paran. Apanday asal si Ismaꞌil magpanaꞌ hayop talun. 21 Mahēꞌ paꞌin sigām ma lahat Paran, aniyaꞌ dꞌnda niāꞌ min lahat Misil eꞌ si Hajara pamahꞌndana ma si Ismaꞌil.
Paljanjiꞌan si Ibrahim maka si Abimelek
22 Na ma masa inaꞌan-i, pinehēꞌ si Ibrahim eꞌ sultan Abimelek maka si Pikul, nakuraꞌ kasundaluhanna. Yuk si Abimelek ma si Ibrahim, “Tuwan, kataꞌuwanku in kaꞌa tinabang sadja eꞌ Tuhan ma ai-ai hinangnu. 23 Manjari aniyaꞌ maksudku ni kaꞌa. Anapa ka maitu ma matahan Tuhan in kaꞌa mbal angakkal ma aku sampay ma anak-mpuku tubuꞌ-manubuꞌ. Bay aku amogbogan kaꞌa, manjari kaꞌa isab subay amogbogan aku sampay saga aꞌa kamemon ma deyom lahat ya pahantiꞌannu itu.”
24 Anambung si Ibrahim, yukna, “Ahoꞌ tuwan, anapa aku.”
25 Sakali itu aniyaꞌ palkalaꞌ pagdugalan si Ibrahim ma si Abimelek. Aniyaꞌ konoꞌ boheꞌ kali si Ibrahim bay niagaw eꞌ saga tendog si Abimelek. 26 Ya sambung si Abimelek, “Tuwan, mbal kataꞌuwanku bang sai magkahinangan ya yuknu ilu. Halam aku asal bay pataꞌunu, yambohoꞌ takaleku ma buwattinaꞌan.” 27 Manjari aniyaꞌ saga bili-bili maka sapiꞌ binowa eꞌ si Ibrahim pamuwanna ma si Abimelek boꞌ aniyaꞌ kapagsulutan sigām ahogot. 28 Aniyaꞌ isab pituꞌ anak bili-bili, dꞌnda lullun, pinasaddī paꞌataganna min baꞌanan bili-bilina kaseheꞌ. 29 Magtūy iya tinilaw eꞌ si Abimelek, yukna, “Pamagaynu anak bili-bili pituꞌ hekana ya pasaddīnu ilu?”
30 Ya sambung isab si Ibrahim, “Tuwan sultan, taimaꞌun konoꞌ pituꞌ anak bili-bili itu paltandaꞌan in aku bay amakali boheꞌ heꞌ.” 31 Ya heꞌ sababna angkan lahat inān kaōnan Beꞌersebaa, sabab bay pagsapahan si Ibrahim maka si Abimelek.
32 Aubus paꞌin sigām maghinang paljanjiꞌan mainaꞌan ma lahat Beꞌerseba, amoleꞌ na disi Abimelek maka si Pikul ni lahat sigām bangsa Pilistin. 33 Na aniyaꞌ poꞌon kayu tamaris tinanom eꞌ si Ibrahim ma lahat Beꞌerseba-i ati mainaꞌan iya anabbut ma ōn Yawe, ya Tuhan kakkal salama-lama. 34 Manjari atꞌggol kapaglahat disi Ibrahim ma lahat bangsa Pilistin eꞌ.