22
Sinulayan eꞌ Tuhan si Ibrahim Pasal Anakna si Isaꞌak
1 Na, atꞌggol-tꞌggol paꞌin, sinulayan si Ibrahim eꞌ Tuhan. Nilinganan iya, “O Ibrahim!”
Magtūy anaul si Ibrahim, yukna, “Itiyaꞌ aku.”
2 Ya lling Tuhan ma iya, “Bowahun anaknu tunggal ilu, si Isaꞌak ya kalasahannu toꞌongan, pehēꞌ ni lahat Muriya. Tōꞌanta ka būd ya pamowahannu iya. Jari pagtꞌkkabi pehēꞌ, sumbaliꞌun iya boꞌ tunuꞌun pagkulbannu ma aku.”
3 Daiꞌ llaw paꞌin, abatiꞌ na si Ibrahim anꞌttaꞌ kayu panunuꞌ sumbaliꞌan. Niruwaꞌ magtūy ni kuraꞌna maka binowa isab anakna si Isaꞌak maka duwa sosohoꞌanna. Jari palintas sigām tudju pehēꞌ ni atag bay panohoꞌan Tuhan ma iya.
4 Taꞌabut paꞌin katꞌllu llawna, taꞌndaꞌ eꞌ si Ibrahim būd ya patudjuhan sigām min kalawakan lagiꞌ. 5 Yuk si Ibrahim ma duwangan sosohoꞌanna, “Angagad kam maitu maka kuraꞌ ilu. Aku maka ondeꞌ itu palanjal giꞌ ni atag ēꞌ maghinang ni Tuhan. Pabīng du kami piꞌitu bang aubus na.”
6 Manjari nihawas eꞌ si Ibrahim kayu panunuꞌ kukulbanan, ati pinatanggung eꞌna ma baha si Isaꞌak. Si Ibrahim ya amowa lahut maka baga pangapi ati magbeyaꞌ sigā patukad. 7 Pasaltaꞌ, ahꞌlling si Isaꞌak ni mmaꞌna, yukna, “Mmaꞌ!”
Anambung si Ibrahim, “Ai, Otōꞌ?”
Ya lling si Isaꞌak, “Mmaꞌ, ilu ma kaꞌa baga pangandokot api, maka itiyaꞌ ma aku saga kayu. Sagōꞌ maingga bahāꞌ anak bili-bili ya sinumbaliꞌ maka tinunuꞌ pagkulbanta?”
8 Anambung magtūy si Ibrahim, yukna, “Otōꞌ, Tuhan du ya amaniyaꞌ bili-bili pagkulbanta.” Manjari palanjal na sigā karuwangan.
9 Na, makatꞌkka paꞌin sigā ni būd bay panōꞌ Tuhan ma si Ibrahim eꞌ, magtūy iya anambak batu pagtunuꞌan kulban. Aubus paꞌin, pinatꞌnnaꞌ kayu ma diyataꞌna ati niengkotan anakna si Isaꞌak boꞌ yampa palegena ma diyataꞌ kayu. 10 Puwas eꞌ niāꞌ bariꞌ eꞌ si Ibrahim panumbaliꞌ anakna. 11 Malaingkan aniyaꞌ malaꞌikat PANGHŪꞌ angalingan min deyom sulgaꞌ, yukna “Ibrahim! O Ibrahim!”
Anaul magtūy si Ibrahim, “Itiyaꞌ aku.”
12 Ahꞌlling malaꞌikat-i, “Daꞌa sumbaliꞌun anaknu! Daꞌa iya inayun! Kataꞌuwanku na in kaꞌa magmahaltabat sabꞌnnal-bꞌnnal ma Tuhan. Sabab minsan anaknu tunggal halam kaꞌllogannu, gom paꞌin tukbalannu ni Tuhan.”
13 Na palingiꞌ si Ibrahim ati aniyaꞌ taꞌndaꞌna dakayuꞌ bili-bili lꞌlla sumagnat tandukna ma kayu. Magtūy ningāꞌ eꞌna boꞌ yampa sinumbaliꞌ. Jari tinunuꞌ pagkulban ni Tuhan, panganggantiꞌ baran anakna. 14 Ya pangōn si Ibrahim ma lugal inān ‘Yawe-Yiri,’ hatina, ‘Pinaniyaꞌan kitam eꞌ PANGHŪꞌ.’ Sampay isab ni kabuwattituhan ya pangōn aꞌa ma lahat inān, yuk sigām, “Ma būd si Yawe kitam pinaniyaꞌan eꞌna.”
15 Nilinganan si Ibrahim pabīng min deyom sulgaꞌ. Malaꞌikat PANGHŪꞌ ya angalingan, kaminduwana na. 16 Yukna, “Ibrahim, aku itu si Yawea ya angallam itu ma kaꞌa, maka ōnku luggiyaꞌ ya pamahogotan janjiꞌku. Bay ka ameyaꞌ ma panohoꞌanku ati halam kaꞌllogannu anaknu tunggal, gom paꞌin tukbalannu ni aku. 17 Ya heꞌ sababna angkan aku amatꞌnnaꞌan kaꞌa lidjikiꞌ aheya, lidjikiꞌ tuman. Pahekaku du panubuꞌnu, saliꞌ heka bituꞌun ma diyataꞌ langit atawa heka solagan gusung ma bihing tahik. Angandaꞌug sadja saga panubuꞌnu ati taꞌagaw eꞌ sigām lahat bay sukuꞌ kabantahan sigām. 18 Manjari bangsa kamemon ma deyom dunya angamuꞌ kahāpan du min aku pinasaliꞌ ni kahāpan ya pamuwanku ma panubuꞌnu. Angkan buwattēꞌ, sabab bay ka ameyaꞌ ma panohoꞌanku.”
19 Puwas eꞌ pabalik na disi Ibrahim ni saga sosohoꞌanna. Jari magbeyaꞌ sigām amoleꞌ pehēꞌ ni lahat Beꞌerseba ati mahēꞌ sigām patꞌnnaꞌ.
Panubuꞌ si Nahor
20 Na atꞌggol-tꞌggol paꞌin, kahakaꞌan si Ibrahim pasal danakanna si Nahor. Aniyaꞌ anakna min hꞌndana si Milka, waluꞌ hekana. 21 Ya siyaka toꞌongan si Ūs, ya pasunuꞌ si Būs, boꞌ si Kimuwil mmaꞌ si Aram. 22 Puwas si Kimuwil si Kesed, boꞌ si Haso, boꞌ si Pildas, boꞌ si Jidlap, boꞌ kasiyalihan toꞌongan si Bituwil 23 ya mmaꞌ si Ripka. Ya na inaꞌan saga anak lꞌlla si Milka hꞌnda si Nahor danakan si Ibrahim. 24 Aniyaꞌ isab kaluꞌa si Milka, ōnna si Rema. Taga-anak isab iya mpat. Ya siyaka si Teba, pasunuꞌ si Gaham, boꞌ si Tahas, boꞌ si Maꞌaka ya kasiyalihan.