23
Kamatay si Sara
1 Na si Sara, taꞌabut paꞌin dahatus maka duwampūꞌ maka pituntahun umulna, 2 amatay na iya ma lahat Kanaꞌan, ma kauman Hebron, ya kaōnan Kiriyat-Aba ma waktu bay palabay. Manjari pareyom si Ibrahim anangisan hꞌndana. 3 Aubus paꞌin, pabuhat iya min bihing mayat hꞌndana boꞌ paluwas amowa saga bangsa Hīt maggaraꞌ. Yukna ma sigām, 4 “Saga tuwan, aku itu aꞌa liyu maglihan sadja ma deyomanbi. Ya amuꞌku ma kaꞌam, amabꞌlli konoꞌ kam tanaꞌ boꞌ aniyaꞌ pangubulanku hꞌndaku.”
5 Anambung saga aꞌa bangsa Hīt ma si Ibrahim, yuk-i, 6 “Tuwan, kalehun konoꞌ. Bang ma kami kaꞌa ilu aꞌa alanga, patut pinagaddatan. Kubulun hꞌndanu ma deyom tampat kami ya katapusan ahāp. Ameneꞌ ka konoꞌ maingga-maingga kabayaꞌannu pangubulan. Halam aniyaꞌ min kami makapaginꞌmbal ma kaꞌa.”
7 Na, pakuruꞌ magtūy si Ibrahim ma dahuan saga aꞌa Hīt, ya bangsa tag-lahat, boꞌ yukna ma sigām, 8 “Bang aku parūlbi angubul hꞌndaku maitu, magpatiꞌllot kam ma aku maka si Epron anak si Sohar. 9 Suli-sulihinbi iya pasal songab batu ya ma tōng tanaꞌna, ya ma jadjahan lahat Makpela inān. Bang iya bilahi amabꞌlli, na, bꞌlliku du minsan pila pangahalgaꞌna ma aku, jari hinangku pagkubulan. Maitu du aku magbayad ma dahuanbi kamemon.”
10 Na mainaꞌan asal si Epron samatingkōꞌ maka kaseheꞌanna bangsa Hīt ya patimuk ma atag lawang pagsōd-luwasan daꞌira inān. Magtūy sambunganna si Ibrahim ma pagkalehan sigām kamemon, yukna, 11 “Tuwan, kalehun konoꞌ pahꞌllingku itu. In tanaꞌ ilu sampay songab batuna pamuwanku du ma kaꞌa. Saksiꞌku saga lūng-kampungku itu. Na, taimaꞌun konoꞌ pangubulannu hꞌndanu.”
12 Na, pakuruꞌ si Ibrahim pabīng ma dahuan sigām bangsa Hīt. 13 Ahꞌlling iya ma si Epron ma pagkalehan sigām kamemon, yukna, “Tuwan, kalehun aku. Bꞌlliku tanaꞌ ilu kamemon. Bayaranta ka pila-pila halgaꞌna. Taimaꞌun konoꞌ bayad itu supaya aku makakubul mayat hꞌndaku mahēꞌ.”
14 Anambung magtūy si Epron, yukna, 15 “Tuwan, ya halgaꞌ tanaꞌ ilu mpat hatus pilak sadja. Saguwāꞌ pamagayta ilu-i? Kubulun na hꞌndanu pehēꞌ.”
16 Na kasulutan si Ibrahim ma bay pangahalgaꞌ si Epron ma pagkalehan saga aꞌa inān kamemon. Tinimbang eꞌ si Ibrahim mpat hatus pilak tibuꞌuk ma buwat pagtimbang saga palilitu ma waktu inaꞌan-i, ati bayaranna na. 17 Manjari palsukuꞌan si Ibrahim na tanaꞌ si Epron, ya ma jadjahan Makpela ma bihing lahat Mamre. Palsukuꞌanna na tanaꞌ maka songab batu, sampay kakayu-kayuhan kamemon isab ya ma deyomna. 18 Manjari kasaksiꞌan eꞌ aꞌa bangsa Hīt kamemon ya magtimuk mainaꞌan ma pagsosōran daꞌira, in si Ibrahim na tag-dapu tanaꞌ inān.