3
Magpaꞌndaꞌ Tuhan ma si Musa
1 Na aniyaꞌ waktu kapangipat si Musa ma saga kambing maka bili-bili matoꞌana si Jetro, ya imam ma lahat Midiyan. Binowa eꞌna baꞌanan hayop eꞌ pauntas ni dambilaꞌ lahat paslangan. Jari pasampay iya ni Būd Horeb,a ya pinagōnan isab Būd Tuhan. 2 Mainaꞌan paꞌin, magpaꞌndaꞌ ni si Musa malaꞌikat si Yaweb min tꞌngngaꞌ poꞌon kayu areyoꞌ, magpasalupa api asuleyab. Pagꞌndaꞌ si Musa ma poꞌon kayu inān halam atunuꞌ minsan arokot, 3 amikil-mikil giꞌ iya, yukna, “Oy! Pabiddaꞌ pahāp poꞌon kayu itu, asuleyab sagōꞌ halam atunuꞌ. Angay bahāꞌ? Sekotku giꞌ boꞌ lilingku.”
4 Na, pagꞌndaꞌ PANGHŪꞌ-Yawe ma si Musa pasekot pehēꞌ angaliling, magtūy nilinganan eꞌna min deyom poꞌon kayu heꞌ. Yukna, “Musa, O Musa!”
Anambag si Musa yukna, “Oy, itiyaꞌ aku.”
5 Yuk Tuhan, “Daꞌa ka pasekot piꞌitu. Laꞌanin taumpaꞌnu, sabab mahasussi tanaꞌ ya panꞌnggehannu ilu.” 6 Ahꞌlling giꞌ iya yukna, “Aku itu Tuhan ya pagtuhanan kaꞌmboꞌ-mboꞌanbi si Ibrahim, si Isaꞌak maka si Yakub.” Takale paꞌin eꞌ si Musa, magtūy tampananna baihuꞌna sabab tināw iya patampal ni Tuhan.
7 Angallam lagiꞌ PANGHŪꞌ yukna, “Taꞌndaꞌku kabinasahan ya kalabayan saga aꞌa sukuꞌku mainaꞌan ma Misil. Takaleku isab pangandahing sigām ma sabab saga aꞌa ya amanyagaꞌ sigām. Ahoꞌ, asusa isab aku ma pasal kabinasahan sigām. 8 Angkan na aku makatulun piꞌitu amuwasan sigām min komkoman saga bangsa Misil. Bowaku sigām paluwas min deyom lahat Misil tudju ni lahat ahāp maka aluha, apꞌnnoꞌ isab eꞌ kalluman landuꞌ ahāp. Lahat itu kapaglahatan asal eꞌ bangsa Kanaꞌan, bangsa Hīt, bangsa Amor, bangsa Pirissi, bangsa Hīb maka bangsa Jibus.” 9 Ahꞌlling giꞌ Tuhan yukna, “Itiyaꞌ pasampay ni aku pangandahing bangsa Israꞌil. Taꞌndaꞌku isab paminasa saga bangsa Misil ma sigām. 10 Angkan ka sohoꞌku pehēꞌ ni Piraꞌun boꞌ supaya ka amowa saga aꞌaku bangsa Israꞌil paluwas min lahat Misil. Na, pehēꞌ na ka.”
11 Sagōꞌ aniyaꞌ pahꞌlling si Musa ma Tuhan, yukna, “Ya Tuhanku, sai sa aku itu, ya angkan aku sohoꞌnu paharap ni Piraꞌun amowa bangsa Israꞌil paluwas min lahat Misil?”
12 Anambung Tuhan yukna, “Tantu du aku aneheꞌan kaꞌa. Buwananta ka paltandaꞌan supaya ka makataꞌu in aku bay anohoꞌ kaꞌa. Jari bang tabowanu na saga aꞌaku paluwas min lahat Misil, anumba du kam ni aku ma būd itu.”
13 Yuk si Musa ni Tuhan, “Bang aku saupama pehēꞌ ni saga aꞌa Israꞌil boꞌ hakaꞌanku sigām, ‘In Tuhan pagtutuhanan saga kaꞌmboꞌ-mboꞌanbi bay anohoꞌ aku piꞌilu ni kaꞌam.’ Na bang aku gantaꞌ tinilaw eꞌ sigām bang sai ōn Tuhan ya bay anohoꞌ aku, ai bahāꞌ panambungku ma sigām?”
14 Anambag Tuhan ma si Musa, yukna, “Aku itu si Yawe,c ya Tuhan-asal-Tuhan. Ya pahꞌllingnu ma saga aꞌa Israꞌil subay buwattitu, ‘Tuhan-asal-Tuhan bay anohoꞌ aku piꞌitu ni kaꞌam.’ ”
15 Aniyaꞌ giꞌ pahꞌlling Tuhan ma si Musa. Sinōꞌ iya angahakaꞌan saga aꞌa Israꞌil in si Yawe, ya pagtuhanan disi Ibrahim, si Isaꞌak maka si Yakub, bay anohoꞌ iya ni sigām. Yuk Tuhan isab, “Si Yawe ya ōnku salama-lama, ōn panabbutan aku eꞌ saga aꞌa Israꞌil magpangkat-mamangkat. 16 Pehēꞌ na ka,” yuk Tuhan ni si Musa, “patimukun saga pagmattoꞌahan bangsa Israꞌil boꞌ ka amissala ma sigām. Yuknu, ‘Bay magpanyataꞌ ni aku si Yawe, ya pagtuhanan kaꞌmboꞌ-mboꞌantam si Ibrahim, si Isaꞌak maka si Yakub. Aheya pagkaꞌinagonna ma kaꞌam, maka taꞌndaꞌna isab paminjalaꞌ saga bangsa Misil ma kaꞌam. 17 Ya heꞌ sababna angkan iya anganjanjiꞌ ma kaꞌam, in kaꞌam lappasan min deyom katiksaꞌan ya kalabayanbi ilu ma lahat Misil. Binowa kam eꞌna ni lahat ahāp, lahat apꞌnnoꞌ eꞌ kalluman landuꞌ ahāp. Ya na paglahatan saga bangsa Kanaꞌan, bangsa Hīt, bangsa Amor, bangsa Pirissi, bangsa Hīb maka bangsa Jibus.’ ”
18 Yuk Tuhan isab ma si Musa, “Binꞌnnal bissalanu eꞌ saga pagmattoꞌahan aꞌa Israꞌil. Subay ka magbeyaꞌ maka sigām paharap pehēꞌ ni sultan Misil. Ya yukbi ma iya, ‘Tuwan sultan, si Yawe, ya pagtuhanan kami bangsa Hibrani, bay magpakilā di-na ni kami. Manjari itiyaꞌ kami amaꞌid min kaꞌa pehēꞌ ni lahat paslangan tꞌllungꞌllaw tꞌggolna. Magkulban kami ni si Yawe ya pagtuhanan kami.’ 19 Sagōꞌ,” yuk Tuhan ma si Musa, “kataꞌuwanku asal, in sultan bangsa Misil inān mbal amatugut, luwal bang tananamna kasangat kawasaku. 20 Angkan subay paꞌndaꞌku kawasaku amatꞌkka saga balaꞌ makatāw-tāw ma bangsa Misil. Pagubus, tinugutan du kam palꞌngngan paluwas min lahat.
21 “Palunukku du isab pangatayan saga aꞌa Misil ni kaꞌam bangsa Israꞌil,” yuk Tuhan. “Jari aniyaꞌ pangaltaꞌ tabowabi bang kam paluwas na min lahat Misil. 22 Saga dꞌnda Israꞌil kamemon subay angamuꞌ altaꞌ min saga karꞌndahan Misil, ai na ka dꞌnda ma kauman, ai na ka dꞌnda paokom ma lumaꞌ sigām. Jari ya pamulawan maka sꞌmmek pamuwan sigām subay pinasulug ma kaꞌanakanbi dꞌnda-lꞌlla. Minnēꞌ tabowabi pangaltaꞌ bangsa Misil bang kam maglaꞌanan min lahat eꞌ.”