4
Si Musa Kawakilan eꞌ Tuhan
1 Anambung si Musa ma Tuhan yukna, “Painay bang mbal magkahagad saga aꞌa Israꞌil maka mbal isab angasip ma pangahakaku? Bang saupama yuk sigām ma aku, ‘Ē, mbal kami magkahagad in PANGHŪꞌ-Yawe bay magpanyataꞌ ni kaꞌa!’ ”
2 Na, atilaw PANGHŪꞌ ma si Musa yukna, “Ai ma tangannu ilu?”
“Tungkud,” yuk sambung si Musa.
3 Ahꞌlling giꞌ PANGHŪꞌ yuk-i, “Hantakin ni tanaꞌ.” Paghantakna paꞌin, tahinang sowa ya bay tungkud eꞌ. Magtūy alahi si Musa.
4 Magpanohoꞌan giꞌ PANGHŪꞌ ma iya, “Abutun sowa ilu maka tangannu. Ntanin ma togelna.” Jari niabut sowa eꞌ si Musa boꞌ niꞌntanan. Magtūy tahinang tungkud pabalik. 5 Ahꞌlling lagiꞌ PANGHŪꞌ, yukna, “Hinangun buwattilu ma saga aꞌa Israꞌil supaya sigām makapamꞌnnal in kaꞌa bay pinagpanyataꞌan eꞌ si Yawe, ya pagtuhanan saga kaꞌmboꞌ-mboꞌanbi si Ibrahim, si Isaꞌak maka si Yakub.”
6 Pagubus, yuk PANGHŪꞌ ma si Musa, “Pasōrun dambilaꞌ tangannu ni deyom badjuꞌnu.” Magtūy pinasōd eꞌna. Pagpaluwasna paꞌin, na, kinamutiꞌ tanganna, makalanduꞌ apoteꞌ. 7 Yuk Tuhan isab, “Pasōrun pabīng.” Magtūy pinasōd pabīng ni deyom badjuꞌna. Pagpaluwasna paꞌin, kauliꞌan tanganna, alꞌssin na buwat bay kaꞌina tagnaꞌ.
8 “Sagōꞌ,” yuk PANGHŪꞌ, “bang sigām saupama mbal amꞌnnal ma bissalanu, maka mbal isab kamattanan ma tungkud bay tahinang sowa, kalu sigām tabowa amꞌnnal bang ka makahinang paltandaꞌan karuwana itu. 9 Malaingkan, bang sigām mbal amꞌnnal ma paltandaꞌan duwa hekana ya bay tahinangnu, maka mbal isab amꞌnnal ma bissalanu, na, anauk ka boheꞌ min sapaꞌ Nīl boꞌ buꞌusin ni tanaꞌ. Pagbuꞌusnu, boheꞌ ilu tahinang lahaꞌ.”
10 Sagōꞌ ya lling si Musa ma si Yawe, “Ya Panghūꞌku, aku itu,” yukna, “min karikiꞌ-dikiꞌku sampay ni waktu kapamissalanu itu ma aku, halam aniyaꞌ kapandayanku amissala ma mairan. Alallay eꞌku ahꞌlling, tamamang aku.”
11 Magsuwala lagiꞌ PANGHŪꞌ, yukna, “Sai ya angahinang bowaꞌ manusiyaꞌ? Sai isab amaumaw maka sai amabisu? Sai amuwan pangꞌndaꞌ maka sai amabuta? Luwal aku, si Yawe. 12 Angkan ka sohoꞌku pehēꞌ. Tabanganta ka amissala, maka panduꞌanta ka bang ai subay pahꞌllingnu.”
13 Sagōꞌ angamuꞌ lagiꞌ si Musa, yukna, “Ndūꞌ, Panghūꞌku, bang makajari amiha na ka aꞌa saddī sohoꞌnu.”
14 Pagka buwattēꞌ sambung si Musa, akagit atay PANGHŪꞌ-Yawe ma iya. Yukna, “Bang bahāꞌ danakannu si Harun ya tubuꞌ si Libi? Kataꞌuwanku in iya apanday magbissala. Ilu na iya ma labayan tudju piꞌitu anampang kaꞌa. Akōd du iya pagꞌndaꞌna ma kaꞌa. 15-16 Bowahun iya magsuli-suli. Pataꞌuhun iya bang ai subay pamissalana, sabab iya ya gantiꞌnu amissala ma kahekaꞌan saga aꞌa Israꞌil. Hatina in iya saliꞌ sapantun bowaꞌnu amissala, maka kaꞌa ya sapantun pagtuhananna. Tabanganta kam karuwangan magbissala maka panduꞌanta kam bang ai subay hinangbi. 17 Bowahun tungkudnu ilu pangahinangnu saga paltandaꞌan makainu-inu ma saga aꞌa.” Ya na inaꞌan pamalman Tuhan ma si Musa.
18 Puwas eꞌ, amoleꞌ na si Musa pehēꞌ ni matoꞌana si Jetro boꞌ amaꞌid min iya. “O Bapaꞌ,” yukna, “dūlin lagiꞌ aku pabīng ni lahat Misil angꞌndaꞌ saga kampungku bang sigām allum lagiꞌ.”
Magtūy iya pinabaꞌid eꞌ si Jetro, yukna, “Ahoꞌ, pehēꞌ na ka. Bang paꞌin ka mura-murahan asalamat.”
Si Musa Pabalik ni Lahat Misil
19 Manjari itu, hinabu lagiꞌ si Musa ma lahat Midiyan, aniyaꞌ bay pangallam PANGHŪꞌ-Yawe ma iya, yukna, “Pabalik ka pehēꞌ ni Misil, sabab waꞌi na magpatayan saga aꞌa kamemon ya bay arak amapatay kaꞌa.” 20 Angkan pinasakat eꞌ si Musa hꞌndana maka duwangan anakna ni kuraꞌ boꞌ yampa sigām pauntas tudju ni lahat Misil. Binowa isab eꞌna tungkud ya bay min Tuhan.
21 Magsuwala PANGHŪꞌ ma si Musa pabīng yukna, “Pagtꞌkkanu ni Misil, subay ka angahinang ma matahan Piraꞌun saga hinang makainu-inu kamemon ya bay pamahinangku ma kaꞌa. Hinangun min kawasa bay pamuwanku kaꞌa. Sagōꞌ patuwasku kōk Piraꞌun boꞌ mbal tugutanna saga aꞌa Israꞌil paluwas min Misil. 22 Pagka buwattēꞌ, subay pasampaynu lapal itu ni Piraꞌun. Yuknu ma iya, ‘Palman itu bay min si Yawe. In bangsa Israꞌil sapantun anakna lꞌlla kasiyakahan. 23 Bay ka sohoꞌna anugutan sigām paluwas min lahatnu supaya sigām makapagpudji ma iya. Sagōꞌ mbal ka bilahi, angkan papatayna anaknu lꞌlla kasiyakahan.’ ” Ya du inaꞌan lapal ya sinōꞌ pinasampay ni Piraꞌun.
24 Na, ma paghantiꞌan paꞌin disi Musa hinabu sigām palꞌngngan tudju ni Misil, niharap iya eꞌ si PANGHŪꞌ. Arak binꞌkkat nyawana, 25 daipara hꞌndana si Sippura bay angāꞌ batu atalom boꞌ yampa angislam anakna lꞌlla. Pagubus, ya kuwit bay niutas eꞌ pinaꞌabut eꞌ si Sippura ni tapeꞌ hꞌllana. Ya llingna ma si Musa, “Bꞌnnal toꞌongan, in kaꞌa hꞌllaku kapehēꞌan lahaꞌ du paꞌin.” 26 (Angkan buwattēꞌ pahꞌlling si Sippura ma sabab pagislam eꞌ.) Manjari si Musa halam tainay eꞌ PANGHŪꞌ.
27 Sakali aniyaꞌ panohoꞌan PANGHŪꞌ ma si Harun, yukna, “Pehēꞌ ka ni lahat paslangan anampang danakannu si Musa mahēꞌ.” Jari tasampang si Musa eꞌ si Harun ma atag Būd Tuhan. Tasiyumna isab. 28 Puwas eꞌ, nihakaꞌan si Harun eꞌ si Musa pasal kamemon bay panohoꞌan ma iya eꞌ PANGHŪꞌ subay pinasampay ni Piraꞌun. Nihakaꞌan isab pasal saga paltandaꞌan makainu-inu ya pamahinang Tuhan ma iya.
29 Pagtꞌkka si Musa maka si Harun ni lahat Misil, pinatimuk eꞌ sigā saga pagmattoꞌahan bangsa Israꞌil kamemon. 30 Pinataꞌu sigām eꞌ si Harun pasal kamemon bay pangallam PANGHŪꞌ ma si Musa. Tahinang isab eꞌna saga paltandaꞌan ma matahan sigām, 31 manjari amꞌnnal na sigām. Makataꞌu paꞌin sigām ma pasal aniyaꞌ pagkaꞌinagon PANGHŪꞌ ma sigām, maka ma pasal pangꞌndaꞌna ma kabisa katiksaꞌan sigām, magtūy sigām pasujud anumba.