5
Kapaharap disi Musa ma Piraꞌun
1 Puwas eꞌ, paharap na si Musa maka si Harun pehēꞌ ni Piraꞌun. Yuk sigā ma iya, “Tuwan sultan, ya na itu palman min si Yawe, ya pagtuhanan kami aꞌa Israꞌil. Ya yuk Tuhan itu ma kaꞌa, ‘Tugutin saga aꞌaku paluwas ni lahat paslangan inān supaya sigām maghinang ma aku.’ ”
2 Agsai anambung Piraꞌun, yukna, “Sai sa si Yawe? Angay iya subay beyaꞌku? Angay subay tugutanku saga aꞌa Israꞌil paluwas min lahat itu? Mbal kataꞌuwanku si Yawe. Mbal isab tugutanku saga aꞌa Israꞌil paluwas minnitu.”
3 Yuk disi Musa maka si Harun, “Ya Tuhan kami bangsa Hibrani bay magpakilā di-na ma kami. Bang paꞌin kami patugutannu palꞌngngan tꞌllungꞌllaw sadja ni lahat paslangan inān supaya kami makapagkulban ni si Yawe, ya Tuhan kami. Bang kami saupama mbal tugutannu, na, aniyaꞌ saki makapatay atawa bonoꞌ pinatꞌkka eꞌ Tuhan ni kami.”
4 Saguwāꞌ ya panambung sultan Misil ma si Musa maka si Harun. “Angay bowabi saga pagkahibi Israꞌil pahali maghinang tisaꞌ? Pabīng kam ni hinangbi!” 5 Aniyaꞌ giꞌ pahꞌlling Piraꞌun yukna, “Bistahun saga bangsa Hibrani ilu, aheka na makalanduꞌ, ati bowabi sigām angꞌbba min hinang ya pamahinang sigām.”
6 Manjari itu, ma llaw inaꞌan-i, aniyaꞌ panohoꞌan Piraꞌun ma saga aꞌa Misil magbabanyagaꞌ maka saga aꞌa Israꞌil ya pinatꞌnnaꞌ magkapatas. 7-8 Yuk panohoꞌan eꞌ, “In bangsa Israꞌil angalisuꞌ na maghinang, ya angkan sigām angamuꞌ na paꞌin subay paluwas min Misil itu boꞌ magkulban ni Tuhan sigām. Jari sohoꞌta kam daꞌa subay amuwanan sigām batang bay paganihana pangalamud sigām ma pisak ya nihinang tisaꞌ. Puwas minnitu in sigām subay amihaꞌan di-sigām. Sagōꞌ ya tisaꞌ pamahinangbi ma sigām subay mbal kinulangan hekana minsan dansolag. 9 Maka itu giꞌ, ya pamahinangbi ma sigām subay gom paꞌin pinabuhat min bay dahū supaya halam aniyaꞌ halian sigām, jari halam aniyaꞌ waktu sigām akale ma saga bissala kaputingan.”
10 Manjari paluwas minnēꞌ saga tag-sohoꞌan ata maka saga kapatas Israꞌil boꞌ magpasampay lapal sultan eꞌ ni saga Israꞌil kamemon. Yuk lling sigām, “Mbal na kam pinaniyaꞌan batang bay paganihan pamapagon tisaꞌ. 11 Subay kam amihaꞌan di-bi na, maingga-maingga kapamihaꞌanbi. Malaingkan ya heka tisaꞌ hinangbi subay mbal pakulang min bay tahinangbi tagnaꞌ.”
12 Na pagka buwattēꞌ, alatag sakalibut lahat Misil eꞌ saga aꞌa Israꞌil pamihaꞌan sigām batang pangalamud sigām tisaꞌ. 13 Nilogos na paꞌin sigām eꞌ saga aꞌa Misil tag-sohoꞌan ata. Yuk-i, “Talusunbi hinang ya pamahinang kaꞌam kahabaꞌ llaw minsan kam mbal na binuwanan batang.” 14 Jari niraplosan na saga kapatas Israꞌil eꞌ saga tag-sohoꞌan ata, maka tinilaw isab. Yuk sigām eꞌ, “Ya tisaꞌ tahinangbi diꞌilaw maka llaw itu akulang hekana min bay hinangbi tagnaꞌ. Angay bahāꞌ?”
15 Pagubus, pehēꞌ magtūy saga kapatas Israꞌil mikitabang ma Piraꞌun ma pasal palkalaꞌ itu. Yuk sigām, “Tuwan sultan, angay buwattitu hinangnu ma kami saga sosohoꞌannu? 16 Halam kami kabuwanan batang paganihan, sagōꞌ masi-masi na paꞌin kami sinohoꞌ angahinang tisaꞌ. Pinagdaplosan na paꞌin kami parahāl nggaꞌi ka kami ya taga-sāꞌ. Sagōꞌ saga tendognu iya.”
17 Ya sambag sultan ma sigām, “Ē, lisuꞌan pahāp kaꞌam ilu! Ahuskaw kam maghinang, angkan du kam mbal pahali amaꞌid min aku subay tinugutan paluwas min Misil boꞌ magkulban ni si Yawe. 18 Pabalik kam pehēꞌ ni kahinanganbi! Mbal kam binuwanan batang paganihan, sagōꞌ ya heka tisaꞌ tahinangbi subay mbal pakulang min bay dahū.” 19 Takale paꞌin panohoꞌan Piraꞌun itu eꞌ saga kapatas Israꞌil, magtūy tasayu in kasusahan sigām aheya toꞌongan. Sinōꞌ sigām angahinang tisaꞌ llaw-llaw ma halam aniyaꞌ kulangna min bay tagnaꞌ.
20 Na hinabu saga kapatas itu maglaꞌanan min astanaꞌ, tasampang eꞌ sigām si Musa maka si Harun sabab bay mainaꞌan asal angalagaran sigām. 21 Ahꞌlling saga kapatas eꞌ ma si Musa maka si Harun, “Bang paꞌin kam niꞌndaꞌ eꞌ PANGHŪꞌ boꞌ kam tinungbasan eꞌna. Kinabꞌnsihan na kami eꞌ Piraꞌun maka saga wakilna sabab min kaꞌam. Maka kaꞌam ya bay amuwanan sigām sababan amapatay kami.”
22 Magtūy pabīng si Musa paharap ni PANGHŪꞌ-Yawe, yukna, “O Panghūꞌku, angay tatꞌkkanu kasusahan ma bangsa kami itu? Ai maksudnu ya angkan aku sohoꞌnu piꞌitu? 23 Sampay min waktu kapehēꞌku ni Piraꞌun amasampay lapalnu, mbal iya pahali aminjalaꞌ saga bangsa Israꞌil itu. Halam isab aniyaꞌ panabangnu ma saga aꞌa sukuꞌnu minsan dangkuriꞌ.”