6
1 Magtūy anambung PANGHŪꞌ ma si Musa yukna, “Sōng na taꞌndaꞌnu bang ai hinangku ma Piraꞌun. Min kosog kawasaku, ya angkan iya anugutan saga aꞌa Israꞌil paluwas. Ahoꞌ, min kosog kawasaku ya angkan sigām tinꞌggal eꞌna palaꞌan min lahatna.”
2 Amalman giꞌ Tuhan ma si Musa, yukna, “Aku si Yawe, ya Tuhan-asal-Tuhan. 3 Bay aku magpakilā di-ku ma disi Ibrahim, si Isaꞌak maka si Yakub, in aku Tuhan Sangat-Kawasa. Sagōꞌ ōnku Yawe halam bay pataꞌuku ma sigām ma waktu inaꞌan-i. 4 Bay patꞌnnaꞌku isab paljanjiꞌanku ma sigām tꞌllungan. Yukku in sigām subay pinasukuꞌan lahat Kanaꞌan, ya lahat bay paglihanan sigām. 5 Na,” yuk Tuhan, “takaleku na pagaruhuy saga aꞌa Israꞌil ya tahinang ata ilu eꞌ bangsa Misil. Entomku isab paljanjiꞌan bay patꞌnnaꞌanku sigām. 6 Angkan ka sohoꞌku amasampay lapalku itu ma sigām. Buwattitu ya pahꞌllingnu ma sigām deyoꞌ min aku, ‘Aku itu si Yawe ya Tuhan-asal-Tuhan, jari paluwasku kaꞌam min kasigpitan ya pamasigpit kaꞌam eꞌ bangsa Misil. Aku ya angalappas kaꞌam min deyom pamanyagaꞌan. Aku ya angalꞌkkat kaꞌam min pangꞌntanan saga aꞌa Misil pagka patuwaꞌku na kosog kawasaku maka mulkaꞌku landuꞌ abisa. 7 Kaꞌam ya tahinangku bangsa sukuꞌku, maka aku ya Tuhanbi. Jari makataꞌu du kam sabꞌnnal-bꞌnnal in aku si Yawe ya Tuhanbi, bang kam kalappasanku na min komkoman saga bangsa Misil. 8 Bowata du kam,” yukna, “pehēꞌ ni lahat bay panganjanjiꞌku tuman ma saga kaꞌmboꞌ-mboꞌanbi disi Ibrahim, si Isaꞌak maka si Yakub. Buwananta kam lahat inān palsukuꞌanbi. Aku itu si Yawe.’ ”
9 Ya du ilu lapal Tuhan bay panganasihat si Musa ma saga bangsa Israꞌil, sagōꞌ halam iya kinale eꞌ sigām. Tuꞌud asukkal pangatayan sigām pagka halam aniyaꞌ pangasa-ngasa sigām pinaluwas min pamanyagaꞌan abꞌngngis makalanduꞌ.
10 Sakali itu angallam PANGHŪꞌ-Yawe pabalik ni si Musa, yukna, 11 “Pehēꞌ ka, hakaꞌin sultan Misil in iya subay anugutan saga bangsa Israꞌil paluwas min lahatna.”
12 Sagōꞌ anambung si Musa ma PANGHŪꞌ, yukna, “Akale bahāꞌ Piraꞌun ma aku? Minsan saga pagkahiku bangsa Israꞌil mbal akale pagka halam aniyaꞌ taꞌuku amissala.”
13 Malaingkan angalogos giꞌ PANGHŪꞌ ma si Musa maka si Harun. Kinallaman sigā subay amasampay lapalna ni saga aꞌa Israꞌil sampay ni sultan Misil, hatina in sigā duwangan sinōꞌ amowa bangsa Israꞌil paluwas min lahat Misil.
Panugsugan si Musa maka si Harun
14 Ya na itu saga aꞌa pagnakuraꞌan bangsa Israꞌil, tinagnaꞌan min tumpuk si Rubin sampay ni tumpuk si Libi.
Dahū si Rubin, ya anak aymulla Yakub siyaka. Mpat anakna lꞌlla, si Hanok, si Pallu, si Hesdon maka si Karmi. Buwattēꞌ isab ōn saga tumpuk ya panubuꞌ min si Rubin.
15 Pasunuꞌ si Simiyun ya anak si Yakub karuwana. Saga anak si Simiyun lꞌlla si Jamuwal, si Jamin, si Ohad, si Jakin, maka si Sohar. Katapusan si Saꞌul anak dꞌnda bangsa Kanaꞌan. Buwattēꞌ isab ōn saga tumpuk ya panubuꞌ min si Simiyun.
16 Pasunuꞌ isab si Libi. Saga anakna lꞌlla si Gerson, si Kohat maka si Merari. Awapat paꞌin si Libi, umulna dahatus maka tꞌllumpūꞌ maka pituntahun.
17 Si Gerson, duwa anakna lꞌlla, ōnna si Libni maka si Simi. Buwattēꞌ isab ōn tumpuk ya panubuꞌ min iya.
18 Si Kohat, aniyaꞌ mpat anakna lꞌlla. Ōn sigām si Imran, si Isahar, si Hebron maka si Usil. Na, awapat paꞌin si Kohat, umulna dahatus maka tꞌllumpūꞌ maka tꞌlluntahun.
19 Si Merari, duwa anakna lꞌlla, ōn sigām si Mali maka si Musi. Ya du inaꞌan saga tumpuk panubuꞌ si Libi, bang sinalsila isab.
20 Si Imran (mpu si Libi) bay makahꞌnda ni danakan mmaꞌna, ōnna si Jokebet. Duwa anak si Imran min si Jokebet itu, ya na si Harun maka si Musa. Awapat paꞌin si Imran, umulna dahatus maka tꞌllumpūꞌ maka pituntahun.
21 Si Isahar, tꞌllu anakna lꞌlla, ōn sigām disi Kora, si Nepeg maka si Sikri.
22 Si Usil isab, tꞌllu anakna lꞌlla, ōn sigām si Misail, si Elsapan, maka si Sitri.
23 Manjari si Harun bay makahꞌnda ni si Eleseba, anak si Aminadab maka danakan isab si Nason. Taga-anak sigām mpat lꞌlla, ya na si Nadab, si Abihu, si Eleyasar maka si Itamar.
24 Si Kora (anak si Isahar) taga-anak lꞌlla, ya na si Assir, si Elkana maka si Abiyasap. Ya inaꞌan isab ōn saga tumpuk panubuꞌ si Kora.
25 Si Eleyasar anak si Harun bay makahꞌnda ni dakayuꞌ anak si Putil. Si Pinihas ya anakna.
Na, iya na inaꞌan ōn saga aꞌa ya pagꞌmboꞌan baꞌanan saga tumpuk kapanubuꞌan si Libi.
26 Na, in si Harun maka si Musa ya sinalsilahan itu, ya na aꞌa bay kawakilan eꞌ PANGHŪꞌ-Yawe sinōꞌ amowa saga aꞌa Israꞌil magtumpuk-manumpuk paluwas min lahat Misil. 27 Sigām duwangan itu bay amasampay lapal Tuhan ni Piraꞌun, hatina sultan Misil, pasal bangsa Israꞌil subay tugutanna paluwas min Misil.
Si Harun ya Bibissalahun Pagantiꞌ min si Musa
28 Manjari itu, ma waktu kapahꞌlling PANGHŪꞌ ma si Musa mahēꞌ lagiꞌ ma Misil, 29 buwattitu pahꞌllingna, “Aku si Yawe, ya Tuhan-asal-Tuhan. Pasampayun ni sultan Misil kamemon pangahakaku itu ma kaꞌa.” 30 Sagōꞌ ya sambung si Musa ma PANGHŪꞌ, “Akale bahāꞌ Piraꞌun ma aku? Saliꞌ aku tamamang bang amissala?”