7
1 Anambung PANGHŪꞌ-Yawe ma si Musa, yukna, “Musa, hinangta ka buwat ibarat tuhan ma pangꞌndaꞌ Piraꞌun. Maka siyakanu si Harun isab ibarat nabi ya sohoꞌnu amaluwas lapalnu. 2 Pataꞌuhun si Harun ai-ai kamemon ya pangallamku ma kaꞌa, ati iya ya amasampay panohoꞌanku ni Piraꞌun, in saga aꞌa Israꞌil subay tugutanna paluwas min lahatna. 3 Sagōꞌ patuwasku kōk Piraꞌun. Jari minsan patꞌkkaku saga balaꞌ makatāw-tāw pila-pila hekana ma lahat Misil, 4 mbal iya akale ma kaꞌam. Buwattēꞌ paꞌin, pananamanku iya kosog kawasaku. Patꞌkkaku mulkaꞌ ma lahat Misil boꞌ bowaku paluwas minnēꞌ saga aꞌaku bangsa Israꞌil magtumpuk-manumpuk. 5 Pagnanam saga aꞌa Misil ma kawasaku, magtūy kinataꞌuwan eꞌ sigām in aku si Yawe ya Tuhan-asal-Tuhan bang patꞌkka na mulkaꞌku ni lahat sigām, maka bang paluwasku na saga aꞌa Israꞌil.”
6 Na, tahinang eꞌ si Musa maka si Harun kamemon bay panohoꞌan PANGHŪꞌ ma sigā. 7 Manjari ma waktu kapaharap sigā ma Piraꞌun walumpūꞌ tahun na umul si Musa, maka si Harun walumpūꞌ maka tꞌlluntahun umulna.
8 Sakali itu, ahꞌlling giꞌ Tuhan ma sigā karuwangan, yukna, 9 “Bang kam saupama tinukas eꞌ Piraꞌun subay maghinang saga hinang makainu-inu, sohoꞌun si Harun angahantak tungkudna ma dahuan sultan-i boꞌ tahinang sowa.”
10 Jari pehēꞌ na si Musa maka si Harun paharap ni Piraꞌun ati tahinang eꞌ sigā bay panohoꞌan si Yawe ma sigā. Kahantakan eꞌ si Harun tungkudna ma dahuan Piraꞌun maka saga wakilna ati tahinang sowa magtūy. 11 Pagꞌndaꞌ Piraꞌun, pinalinganan eꞌna saga aꞌana ilmuꞌan maka saga aꞌa ataꞌu maghinang-hinang. Jari tahinang eꞌ sigām buwat bay tahinang si Harun eꞌ, pagka ginuna ilmuꞌ sigām. 12 Paghantak sigām saga tungkud sigām magkaniya-kaniya, manjari tahinang sowa, sagōꞌ tinꞌllon baꞌanan tungkud sigām eꞌ tungkud si Harun. 13 Malaingkan minsan buwattēꞌ, masi na paꞌin magmatuwas kōk Piraꞌun. Mbal toꞌongan pakale ma disi Musa, buwat bay pangahaka asal eꞌ PANGHŪꞌ.
Balaꞌ Dakayuꞌ: Boheꞌ Tahinang Lahaꞌ
14 Sakali itu, angallam PANGHŪꞌ-Yawe ma si Musa pabīng, yukna, “Atuwas na kōk Piraꞌun. Mbal toꞌongan tugutanna saga bangsa Israꞌil paluwas min lahatna. 15 Angkan ka subay paharap ni iya salung subu, hinabuna palūd ni sapaꞌ Nīl. Lagarin iya mainaꞌan. Bowahun isab tungkud bay tahinang sowa ilu. 16 Makasampang paꞌin ka ni Piraꞌun, subay buwatittu pangahakanu ma iya, yuknu, ‘Si Yawe, ya Tuhan bangsa Hibrani, bay anohoꞌ aku amasampay llingna ma kaꞌa. Sinōꞌ ka anugutan saga aꞌa sukuꞌna paluwas min Misil itu boꞌ maghinang ni iya ma lahat paslangan. Saguwāꞌ halam tabeyaꞌnu panohoꞌanna itu sampay ni kabuwattituhan.’ 17 Manjari ya na itu pamalman si Yawe ma kaꞌa, yukna, ‘Kamattanan ka in aku Tuhan-asal-Tuhan ma sabab paltandaꞌan ya hinangku itu. Tꞌbbaꞌanku boheꞌ sapaꞌ Nīl maka tungkud ya balutanku itu. Jari tahinang lahaꞌ boheꞌna. 18 Amatay baꞌanan karaingan ma deyom sapaꞌ. Bauwan isab, mbal tainum boheꞌna.’ ”
19 Yuk PANGHŪꞌ isab ma si Musa, “Sohoꞌun si Harun amabantang tungkudna tampal ni kaboheꞌ-boheꞌan Misil kamemon, ai na ka kasapaꞌ-sapaꞌan, ai na ka saga boheꞌ kali. Manjari in boheꞌ kamemon ma kaluhaꞌan lahat Misil tahinang lahaꞌ, sampay boheꞌ ma deyom baꞌanan pangisihan.”
20 Na, tahinang eꞌ si Musa maka si Harun bay panohoꞌan PANGHŪꞌ ma sigā. Tapabantang eꞌ si Harun tungkudna ma matahan Piraꞌun maka saga wakilna ati tꞌbbaꞌna boheꞌ sapaꞌ Nīl. Manjari lahaꞌ na kaboheꞌ-boheꞌan kamemon. 21 Magkamatay lullun saga daing bay ma deyom sapaꞌ eꞌ ati abau sidda, angkan mbal tainum boheꞌna eꞌ bangsa Misil. Jari lahaꞌ sadja minsan maingga-maingga ma sakalingkal lahat Misil.
22 Sagōꞌ bineyaꞌan hinang disi Harun eꞌ saga aꞌa Misil ilmuꞌan pagka ginuna pangilmuꞌ sigām. Magmatuwas na paꞌin kōk Piraꞌun buwat bay pahꞌlling PANGHŪꞌ ma pasalna. Mbal toꞌongan iya pakale ma si Musa maka si Harun. 23 Halam tapagmagayna kahālan inaꞌan-i, gom paꞌin iya pataikut min sigā boꞌ pasōd ni deyom astanaꞌ. 24 Saguwāꞌ saga aꞌa Misil kamemon bay magkali saga lowang ma bihing sapaꞌ Nīl inān pangāꞌan sigām boheꞌ niꞌinum, sabab boheꞌ sapaꞌ inān mbal toꞌongan tainum.
Balaꞌ Karuwana: Baꞌanan Ambak
25 Na palabay giꞌ pitungꞌllaw min bay pagmulkaꞌ PANGHŪꞌ-Yawe ma sapaꞌ Nīl.