8
1 Manjari angallam PANGHŪꞌ-Yawe ma si Musa pabalik, yukna, “Pehēꞌ ka ni Piraꞌun amasampay lapalku itu ma iya. Yuknu, ‘Ya na itu pamalman si Yawe ma kaꞌa, tugutin saga aꞌaku paluwas ni lahat paslangan supaya sigām makapagsumba ma aku. 2 Bang ka mbal, pagmulkaꞌanku du lahatnu kamemon, aliput eꞌ ambak. 3 Angulatap saga ambak aheka toꞌongan ma sapaꞌ Nīl. Patukad minnēꞌ boꞌ pasōd ni deyom astanaꞌnu maka ni deyom bilik patulihannu, boꞌ pariyataꞌ isab ni pabahakannu. Pasōd isab ni kalumaꞌan saga aꞌa pangandolannu maka kalumaꞌan saga aꞌanu kamemon. Saga pamꞌllahanbi maka pagaddunanbi tinapay, sinōd du eꞌ ambak. 4 Kaꞌa barannu maka baran saga aꞌa pangandolannu sampay saga aꞌanu kamemon kapaglaksu-laksuhan eꞌ saga ambak.’ ”
5 Angallam giꞌ PANGHŪꞌ ma si Musa, yukna, “Sohoꞌun si Harun amabantang tungkudna paharap ni saga kasapaꞌ-sapaꞌan maka ni kamemon saga pagboheꞌan boꞌ supaya patukad baꞌanan ambak angaliput kaluhaꞌan lahat Misil.” 6 Na pinabantang eꞌ si Harun tungkudna paharap ni kaboheꞌ-boheꞌan kamemon ati paluwas baꞌanan saga ambak angaliput kaluhaꞌan lahat inān. 7 Sagōꞌ bineyaꞌan hinang si Harun itu eꞌ saga aꞌa Misil ataꞌu maghinang-hinang pagka ginuna pangilmuꞌ sigām. Tabowa isab saga ambak paluwas min deyom sapaꞌ tudju ni gintanaꞌan.
8 Sakali pinalinganan si Musa maka si Harun eꞌ Piraꞌun. Pagtꞌkka paꞌin, yukna ma sigā, “Amuꞌ-amuꞌinbi aku ni si Yawe bang paꞌin laꞌananna baꞌanan ambak itu. Jari tugutanku saga aꞌabi paluwas supaya kam makapagkulban tudju ni Tuhanbi si Yawe.”
9 Ya sambung si Musa, “Tuwan sultan, kaꞌa ya pinagbayaꞌ bang sumiyan waktu ya pangamuꞌku duwaꞌa ma kahālanbi, hatina ma kaꞌa barannu, ma saga aꞌa pangandolannu, sampay ma saga aꞌanu kamemon. Bang buwattēꞌ halam na aniyaꞌ ambak takapin ma deyom kalumaꞌanbi, luwal mainaꞌan ma deyom sapaꞌ Nīl.”
10 Yuk Piraꞌun, “Salung.”
Anambung si Musa, “Abeyaꞌ pagkallamnu, boꞌ kataꞌuwannu halam aniyaꞌ tuhan makasaliꞌ ni si Yawe ya Tuhan kami. 11 Pagsalung alaꞌan saruꞌun-duꞌun saga kaꞌambakan min kaꞌa maka min saga lumaꞌbi, min saga aꞌa pangandolan maka min saga aꞌa sukuꞌnu kamemon. Halam aniyaꞌ takapin luwal ma deyom sapaꞌ Nīl ilu.”
12 Makalaꞌan paꞌin si Musa maka si Harun min astanaꞌ Piraꞌun, magtūy angamuꞌ junjung si Musa ni PANGHŪꞌ bang paꞌin laꞌananna saga ambak bay pamatꞌkkana ma Piraꞌun. 13 Jari nirūlan eꞌ PANGHŪꞌ pangamuꞌ-ngamuꞌ si Musa itu. Amatay na saga ambak kamemon, ai na ka ma deyom kalumaꞌan, ai na ka ma halaman, ai na ka ma saga kahumaꞌan. 14 Pinagtumpuk-tumpuk patay ambak inān eꞌ saga aꞌa Misil, jari angahangsu katilibut lahat Misil eꞌ bau patay ambak. 15 Sakali, pagꞌndaꞌ Piraꞌun in kahālan sigām pagām-gām na, agsai magmatuwas kōkna pabīng. Mbal na pakale ma disi Musa, buwat bay pangallam asal eꞌ PANGHŪꞌ.
Balaꞌ Katꞌlluna: Baꞌanan Hanglop
16 Pagubus inaꞌan, angallam PANGHŪꞌ-Yawe pabīng ma si Musa, yukna, “Sohoꞌun si Harun angahantak tōng tungkudna ni bagunbun, ati bagunbun inān tahinang hanglop ma sakalingkal lahat Misil.” 17 Magtūy nihantakan eꞌ si Harun tōng tungkudna ni bagunbun eꞌ, ati in bagunbun kamemon ma katilibut Misil tahinang hanglop na. Manjari kapilahan eꞌ hanglop saga manusiyaꞌ kamemon maka kahayopan kamemon. 18 Pasulay isab saga aꞌa Misil ilmuꞌan magpaniyaꞌ hanglop luwas min ilmuꞌ sigām, sagōꞌ mbal makakoleꞌ. Manjari hanglop angulatapan na paꞌin ni manusiyaꞌ maka ni hayop.
19 Ahꞌlling saga aꞌa ilmuꞌan inān ma Piraꞌun, yuk sigām, “Halam pagduwa-ruwana, min kawasa Tuhan koꞌ itu.” Sagōꞌ Piraꞌun iya masi magmatuwas kōkna. Mbal toꞌongan pakale ma disi Musa, buwat bay pangallam PANGHŪꞌ ma pasalna.
Balaꞌ Kaꞌmpatna: Baꞌanan Langaw
20 Puwas eꞌ, angallam PANGHŪꞌ ma si Musa pabīng, yukna, “Salung subu, daiꞌ llaw lagiꞌ, papunduk ka angaharap Piraꞌun hinabuna palūd ni sapaꞌ Nīl. Ya pahꞌllingnu ma iya subay buwattitu, yuknu, ‘Ya na itu pamalman si Yawe ma kaꞌa. Sinōꞌ ka anugutan saga aꞌaku paluwas min lahatnu supaya makapagsumba ma aku. 21 Bang sigām saupama mbal paluwasnu, patꞌkkaku ni kaꞌam saga baꞌanan langaw patapuꞌ ma kaꞌa, ma saga aꞌa pangandolannu sampay ma saga aꞌanu bangsa Misil kamemon. Apꞌnnoꞌ eꞌ langaw saga kalumaꞌanbi, aliput isab kuwit tanaꞌ. 22 Malaingkan mbal lapayku jadjahan Gosen, ya lahat paglahatan saga aꞌa sukuꞌku. Halam du aniyaꞌ langaw angulapat mainaꞌan, supaya kataꞌuwannu in aku si Yawe, itiyaꞌ ma deyom lahat itu. 23 Papagbiddaꞌku saga aꞌaku maka saga aꞌanu. Subay na salung boꞌ tahinang paltandaꞌan makainu-inu itu.’ ” 24 Manjari, aniyaꞌ baꞌanan langaw aheka makalanduꞌ pinarugpak eꞌ PANGHŪꞌ ni astanaꞌ sultan maka ni kalumaꞌan saga aꞌa kawakilanna. Saꞌagon-agon magkaꞌat sakalibutan lahat Misil ma sabab langaw.
25 Magtūy pinalinganan si Musa maka si Harun eꞌ Piraꞌun pabalik. Pagtꞌkka paꞌin, yukna ma sigā, “Pehēꞌun na, tukbalinbi pagkulban ni Tuhanbi, bang paꞌin ma lahat itu-i.”
26 “Ā,” yuk si Musa, “mbal makajari. Ya hayop pagkulban kami ni si Yawe ya Tuhan kami, mbal apatut pinagkulban bang ma addatbi bangsa Misil. Jari bang kami maghinang kulban boꞌ asammal ma pangꞌndaꞌ sigām, tantu kami binantung eꞌ sigām pinapatay. 27 Subay kami palꞌngngan ni lahat paslangan tꞌllungꞌllaw tꞌggolna, boꞌ magsumbaliꞌ saga hayop pagkulban ni si Yawe, ya pagtuhanan kami. Sabab ya na ilu panohoꞌanna ma kami.”
28 Yuk Piraꞌun, “Tugutanta du kam pehēꞌ ni lahat paslangan boꞌ kam magtukbal hayop pagkulban ni si Yawe ya Tuhanbi. Sagōꞌ daꞌa kam palawak minnitu. Amuꞌ-amuꞌinbi isab aku duwaꞌa.”
29 Anambung si Musa, yukna, “Pagluwasku min matahannu, amuꞌku duwaꞌa magtūy ni si Yawe, bang paꞌin maglaꞌanan saga langaw ilu salung, min kaꞌa maka min saga aꞌa kawakilannu maka min saga aꞌanu kamemon. Sagōꞌ daꞌa paꞌin kami akkalin pabīng, daꞌa kami saggaꞌun pehēꞌ maghinang kulban ni si Yawe.”
30 Pagluwas paꞌin si Musa min Piraꞌun, magtūy iya angamuꞌ duwaꞌa ni PANGHŪꞌ-Yawe, 31 ati nirūlan iya ma pangamuꞌna. Maglaꞌanan na baꞌanan langaw inān kamemon min sultan, min saga aꞌa kawakilanna maka min saga aꞌana kamemon. Halam aniyaꞌ langaw takapin minsan dakayuꞌ. 32 Saguwāꞌ minsan buwattēꞌ, masi magmatuwas kōk Piraꞌun ati halam katugutanna saga aꞌa Israꞌil palanjal maghinang ni Tuhan.