9
Balaꞌ Kalimana: Kahayopan Taluwaꞌ Musiba
1 Na, angallam PANGHŪꞌ-Yawe ma si Musa pabalik. Sinohoꞌ iya paharap ni Piraꞌun amasampay lapal deyoꞌ bay min iya. Yuk lapalna heꞌ, “Ya na itu pamalman kaꞌa eꞌ si Yawe, ya Tuhan bangsa Hibrani. Tugutin saga aꞌaku paluwas min lahatnu supaya sigām makapagsumba ma aku. 2 Bang ka pasangdan na paꞌin maginꞌmbal ati mbal tugutannu sigām, 3 na, pinagmulkaꞌan lahatnu eꞌ si Yawe min kosog kawasana. Aniyaꞌ musibaa landuꞌ abisa pamatꞌkkana ma saga kahayopanbi kamemon, hatina ma kuraꞌbi, untaꞌbi, sapiꞌbi, kambingbi maka bili-bilibi. 4 Sagōꞌ pinapagbiddaꞌ eꞌ si Yawe saga hayop bangsa Israꞌil maka saga hayopbi bangsa Misil. Halam aniyaꞌ hayop palsukuꞌan bangsa Israꞌil amatay minsan dakayuꞌ.”
5 Jari aniyaꞌ waktu panganggantaꞌ eꞌ PANGHŪꞌ. “Subay na salung boꞌ patꞌkkaku balaꞌ inān,” yukna. 6 Pagsalung paꞌin, tahinang eꞌ si Yawe buwat bay pangallamna. Alaglag saga hayop bangsa Misil, sagōꞌ halam aniyaꞌ amatay minsan dakayuꞌ ma kahayop-hayopan bangsa Israꞌil. 7 Sakali aniyaꞌ aꞌa sinohoꞌ eꞌ Piraꞌun atilaw bang ai kahālanna ma saga kauman bangsa Israꞌil. Bꞌnnal, halam aniyaꞌ hayop sigām amatay minsan dakayuꞌ. Sagōꞌ minsan buwattēꞌ, iya ya na paꞌin magmatuwas kōk Piraꞌun. Mbal toꞌongan anugutan saga aꞌa Israꞌil paluwas.
Balaꞌ Kaꞌnnomna: Musiba Bautut
8 Puwas eꞌ, angallam PANGHŪꞌ pabīng ma si Musa maka si Harun, yukna, “Angakup kam abu min pagtunuꞌan boꞌ pinasabulakan pariyataꞌ ma si Musa ma mundaꞌan Piraꞌun. 9 Manjari in abu ilu tahinang saliꞌ bagunbun pasaplag ma kaluhaꞌan lahat Misil. Maka sasuku kapakpakan bagunbun ilu, maingga-maingga paꞌataganna, manusiyaꞌ ka atawa hayop, taluwaꞌ bautut paluwasan nanaꞌ.”
10 Manjari itu, aniyaꞌ abu taꞌakup eꞌ sigā duwangan. Makaharap paꞌin sigā pehēꞌ ni Piraꞌun, sinabulakan eꞌ si Musa tudju pariyataꞌ. Magtūy aniyaꞌ bautut paluwasan nanaꞌ makataluwaꞌ ni saga manusiyaꞌ maka ni kahayop-hayopan. 11 Saga aꞌa Misil ya ataꞌu maghinang-hinang mbal makapagharap maka si Musa sabab ya du sigām aliput eꞌ bautut, buwat saga aꞌa Misil kamemon. 12 Saguwāꞌ kōk Piraꞌun pinatuwas gom paꞌin eꞌ PANGHŪꞌ-Yawe. Mbal iya pakale ma si Musa maka si Harun, jari katumanan bay pangallam PANGHŪꞌ ma pasalna.
Balaꞌ Kapituꞌna: Ulan Tigtigan Aes
13 Manjari angallam PANGHŪꞌ pabalik ma si Musa, yukna, “Salung subu, daiꞌ llaw lagiꞌ, papunduk ka angaharap Piraꞌun. Ya llingnu ma iya subay buwattitu, yuknu, ‘Ya na itu pamalman ma kaꞌa eꞌ si Yawe, ya Tuhan bangsa Hibrani. Yukna, tugutin saga aꞌaku paluwas min lahat itu supaya sigām makapagsumba ma aku. 14 Bang sigām saupama mbal tugutannu, na tantu du aku amatumbuk mulkaꞌ lumanduꞌan bisana ma kaꞌa, ma saga aꞌa pangandolannu sampay ma saga aꞌanu bangsa Misil kamemon, boꞌ supaya kataꞌuwannu in aku Tuhan dakayuꞌ-kayuꞌ, halam aniyaꞌ sibuꞌku ma babaw dunya. 15 Bang aku bay bilahi, bay du aku amatꞌkka musiba makalaglag ma kaꞌa maka ma saga aꞌanu kamemon, manjari halam aniyaꞌ takapin allum. 16 Daipara halam bay kalanjalanku balaꞌ inaꞌan. Ya angkan ka sabalanku magsultan sabab aheya maksudku ma kaꞌa. Ya kabayaꞌanku subay pamaꞌndaꞌku ma kaꞌa kosog kawasaku supaya patanyag ōnku ni manusiyaꞌ kamemon ma sakalibutan dunya. 17 Malaingkan kaꞌa ilu mbal pahali anaggaꞌ saga aꞌaku, mbal isab anugutan sigām paluwas min lahatnu. 18 Angkanna, pagsalung subu, ma waktu buwattēꞌ du, paulananku tigtigan aes ma lahatnu. Sangay min katagnaꞌ bangsa Misil, halam bay aniyaꞌ ulan buwattēꞌ, yambohoꞌ. 19 Sohoꞌun saga tendognu pasaꞌut amasindung baꞌanan hayopbi maka palsukuꞌanbi kamemon bay patꞌnnaꞌ ma luwasan. Sabab ai-ai taꞌbba ma luwasan, manusiyaꞌ ka atawa hayop, bang kaulanan eꞌ tigtigan aes ilu, amatay sadja.’ ”
20 Manjari saga sosohoꞌan Piraꞌun, sasuku tināw ma palman Tuhan, magdaiꞌ-daiꞌ amasindung saga ata maka saga hayop sigām. 21 Sagōꞌ sasuku sigām anaikutan panohoꞌan PANGHŪꞌ, pinasagaran eꞌ sigām ai-ai sigām ma luwasan, halam pinasindung.
22 Pagubus, yuk PANGHŪꞌ ma si Musa, “Pahꞌnnatun tangannu tudju ni langit boꞌ angulan tigtigan aes ni sakalingkal Misil, ni saga manusiyaꞌ maka ni saga hayop, sampay ni tinanom kamemon ya patomoꞌ ma kahuma-humaꞌan mailu ma lahat Misil.” 23 Pagangkat eꞌ si Musa tungkudna paharap ni langit, magtūy aniyaꞌ lꞌggon maka tigtigan aes pinatumbuk eꞌ PANGHŪꞌ. Aniyaꞌ lꞌtteꞌ isab pahūg ni kuwit tanaꞌ. Min PANGHŪꞌ koꞌ inān, 24 ulan alandos toꞌongan kalamuran aes, maka lāt isab min dambilaꞌ maka min dambilaꞌ. Yambohoꞌ aniyaꞌ hunus buwattēꞌ kosogna sangay min katagnaꞌ bangsa Misil. 25 Taluwaꞌ tigtigan aes saga manusiyaꞌ kamemon maka hayop kamemon ya halam tapasindung ma kaluhaꞌan lahat Misil. Ahꞌbbaꞌ saga tinanom kamemon ma kahuma-humaꞌan, maka halam aniyaꞌ dahun kayu takapin, magkaꞌat kamemon. 26 Luwal jadjahan Gosen halam bay katumbukan tigtigan aes. Ya na koꞌ inaꞌan paglahatan bangsa Israꞌil.
27 Magtūy pinalinganan si Musa maka si Harun eꞌ Piraꞌun. Pagtꞌkka itu, yukna ma sigā, “Tasayuku na, taga-dusa aku. Si Yawe ya tag-daꞌugan. Kami maka saga aꞌaku ya makasāꞌ. 28 Amuꞌinbi kami duwaꞌa konoꞌ ni si Yawe bang paꞌin pahali lꞌggon itu maka tigtigan aes, sabab sarang na. Janjiꞌanta kam, tugutanta du kam paluwas minnitu. Mbal na kam taggahanku maitu.”
29 Anambag si Musa, yukna, “Ahoꞌ, pagluwasku sadja min daꞌira itu, sanggaku tanganku pangamuꞌku ni si Yawe. Pahali du lꞌggon maka pahalam du isab tigtigan aes itu boꞌ supaya kataꞌuwannu si Yawe sadja ya tag-dapu dunya. 30 Sagōꞌ,” yuk si Musa, “kataꞌuwanku kaꞌam maka saga aꞌa kawakilannu, mbal na paꞌin kam tināw ma si Yawe, ya Tuhan-asal-Tuhan.”
31 Ya tinanom magkaꞌat eꞌ ulan, ya na saga tinanom ajatu maka tinanom yampa angugbus. 32 Sagōꞌ in ginis tinanom paghinangan tirigu halam bay magkaꞌat sabab halam giꞌ angugbus, subay ma bulan sinosōng.
33 Pagpuwas, angꞌbba si Musa min Piraꞌun inān boꞌ paluwas min deyom daꞌira. Ma luwasan paꞌin iya, sinangga tanganna maka eꞌna angamuꞌ duwaꞌa ni PANGHŪꞌ. Agsai pahali na lꞌtteꞌ maka tigtigan aes, halam na isab angulan. 34 Na, pagꞌndaꞌ Piraꞌun ma lꞌtteꞌ maka tigtigan aes maka ulan pahali na, magdusa iya pabalik. Magtuwas-tuwas iya di-na, beyaꞌ isab saga aꞌa kawakilanna. 35 Jari tatuman bay pahꞌlling PANGHŪꞌ ni si Musa ma pasal Piraꞌun. Halam tinugutan eꞌna bangsa Israꞌil paluwas min lahat Misil.