10
Balaꞌ Kawaluꞌna: Baꞌanan Ampan Dulu
1 Manjari angallam PANGHŪꞌ-Yawe ma si Musa, yukna, “Pehēꞌ ka angaharap Piraꞌun. Tapatuwasku kōkna maka kōk saga aꞌa kawakilanna supaya hinangku saga paltandaꞌan makainu-inu ma pangꞌndaꞌ sigām. 2 Manjari aniyaꞌ panuli-nulinu ma saga anak-mpunu ma waktu sinōng pasal katiksaꞌan ya tapatꞌnnaꞌku itu ma saga aꞌa Misil, maka pasal paltandaꞌan makainu-inu ya tahinangku ma deyoman sigām. Minnēꞌ kataꞌuwanbi in aku si Yawe ya Tuhan-asal-Tuhan.”
3 Sakali pehēꞌ disi Musa maka si Harun ni Piraꞌun. Yuk sigā duwangan ma iya, “Aniyaꞌ itu pamalman ma kaꞌa eꞌ si Yawe ya pagtuhanan bangsa kami Hibrani. Yukna, ‘Sumiyan lagiꞌ ka pahali magtanggu-tanggu boꞌ yampa magmalillaꞌ ma aku? Tugutin saga aꞌaku alaꞌan min Misil itu supaya sigām makapagsumba ma aku. 4 Bang ka pasangdan na paꞌin maginꞌmbal ma kalaꞌan sigām, pabowaku saga ampan dulu ni lahatnu salung. 5 Aliput kaluhaꞌan gintanaꞌan ilu eꞌ ampan dulu pagka aheka makalanduꞌ. Pinagkakan eꞌ sigām tinanom kamemon maka kakayu-kayuhan kamemon ya takapin allum ma kahuma-humaꞌanbi, ai-ai halam bay magkaꞌat eꞌ ulan tigtigan aes eꞌ. 6 Sinōd du isab eꞌ baꞌanan ampan dulu astanaꞌnu maka kalumaꞌan saga wakilnu sampay lumaꞌ saga aꞌana bangsa Misil kamemon. Minsan bay waktu kamattoꞌahanbi, halam aniyaꞌ katiksaꞌan buwattitu bisana bay kalabayan sigām sangay min katagnaꞌ sigām maglahat ma tanaꞌ Misil itu.’ ” Na, aubus paꞌin pahꞌlling si Musa buwattēꞌ, pataikut na iya boꞌ alaꞌan min matahan Piraꞌun.
7 Sakali itu, makalaꞌan paꞌin si Musa, ahꞌlling ma Piraꞌun saga wakilna, yuk-i, “Sampay sumiyan bahāꞌ ya panasat aꞌa itu ma kitam? Tugutin bangsa inān alaꞌan supaya sigām makapagsumba ni si Yawe ya Tuhan sigām. Halam giꞌ bahāꞌ kataꞌuwannu in lahat Misil itu magkaꞌat na?”
8 Angkan na si Musa maka si Harun tabowa magharap maka Piraꞌun pabīng. Yukna ma sigā, “Ahoꞌ, makajari. Pehēꞌ na kam magsumba ni Tuhanbi si Yawe. Sagōꞌ sai na paꞌin ameyaꞌ ma kaꞌam?”
9 Yuk sambung si Musa, “Magbeyaꞌ kami kamemon, ondeꞌ-ondeꞌ mattoꞌa. Bowa kami isab saga kaꞌanakan kami dꞌnda-lꞌlla. Damikiyanna saga kahayopan-hayopan kami, sabab aniyaꞌ paghinang pamudji kami si Yawe.”
10 Agsai ahꞌlling Piraꞌun, “Mattan koꞌ ilu,” yukna, “aniyaꞌ maksudbi mbal ahāp. Hakaꞌanta kam, subay aheya tabang si Yawe ma kaꞌam boꞌ yampa aku tabowa anugutan kaꞌam paluwas minnitu, beyaꞌ isab karꞌndahanbi maka kaondeꞌ-ondeꞌan! 11 Ē! Mbal kam tugutanku. Subay lꞌlla sadja ya nirūlan paluwas anumba si Yawe, sabab ya du inaꞌan pangamuꞌbi na paꞌin.” Magtūy pinalaꞌan na si Musa maka si Harun min matahan Piraꞌun.
12 Sakali aniyaꞌ giꞌ pangallam PANGHŪꞌ ma si Musa, yukna, “Pabantangun tangannu tudju ni lahat Misil supaya angulatup piꞌilu baꞌanan ampan dulu boꞌ amangan saga tinanom kamemon, ingga-ingga ya halam magkaꞌat eꞌ tigtigan aes.”
13 Na, tapabantang paꞌin eꞌ si Musa tungkudna tudju ni katanaꞌ-tanaꞌan Misil, magtūy aniyaꞌ baliyu akosog pinatumbuk eꞌ PANGHŪꞌ luwas min sobangan, min llaw inaꞌan sampay ni kasubuhan. Taꞌabut paꞌin subu, inaꞌan na saga ampan dulu bay tabowa eꞌ baliyu heꞌ. 14 Manjari sakalingkal lahat Misil maka kahuma-humaꞌanna kamemon waꞌi katꞌppakan ampan dulu landuꞌ aheka. Sangay min awal sampay ni ahil, halam bay buwattēꞌ hekana. 15 Aettom kuwit tanaꞌ pagka aliput eꞌ ampan dulu. Aubus pinagkakan tinanom kamemon ya takapin min bay hunus tigtigan aes. Beyaꞌ na saga buwaꞌ kayu. Halam aniyaꞌ dahun takapin ma saga poꞌon kayu kamemon maka tinanom kamemon ma sakalibutan Misil.
16 Pagka buwattēꞌ, magdaiꞌ-daiꞌ Piraꞌun amalinganan si Musa maka si Harun. Mainaꞌan paꞌin, yukna ma sigā, “Taga-rusa aku ma si Yawe ya pagtuhananbi. Taga-rusa isab ma kaꞌam. 17 Na ampununbi dusaku min tꞌdda sadja laꞌa. Maka amuꞌ-amuꞌinbi aku duwaꞌa ni Tuhanbi si Yawe, bang paꞌin alaꞌan min aku balaꞌ makamula itu.”
18 Pagubus itu, angꞌbba disi Musa min Piraꞌun boꞌ angamuꞌ tabang ni PANGHŪꞌ-Yawe. 19 Na, pinapinda eꞌ PANGHŪꞌ baliyu min sobangan inān, manjari baliyu min sꞌddopan na landuꞌ akosog makabowa baꞌanan saga ampan inān pehēꞌ ni dilaut Tahik Keyat. Halam aniyaꞌ ampan dulu takapin ma lahat Misil, minsan dakayuꞌ. 20 Sagōꞌ ya kōk Piraꞌun masi pinatuwas eꞌ PANGHŪꞌ, angkan halam tugutanna saga aꞌa Israꞌil paluwas min lahatna.
Balaꞌ Kasiyamna: Kalendoman
21 Sakali itu, aniyaꞌ pangallam PANGHŪꞌ ma si Musa, yukna, “Paꞌangkatun tangannu tudju ni langit boꞌ angalendom bitu-bituhan ma sakalibut lahat Misil ilu.” 22 Na, waꞌi pinaꞌangkat eꞌ si Musa tanganna. Magtūy angalendom ma lahat Misil ma deyom tꞌllungꞌllaw. 23 Mbal na makapagꞌndaꞌ saga aꞌa Misil danseheꞌan, mbal minsan makalaꞌan min kalumaꞌan sigām tꞌllungꞌllaw tꞌggolna. Sagōꞌ asawa ma jadjahan paglahatan saga aꞌa Israꞌil.
24 Magtūy pinalinganan si Musa eꞌ Piraꞌun. Mainaꞌan paꞌin, yuk Piraꞌun ma iya, “Pehēꞌ na kam anumba ni si Yawe ya Tuhanbi. Makajari isab ameyaꞌ sampay anak-hꞌndabi, saguwāꞌ subay taꞌbba maitu baꞌanan bili-bilibi maka kambingbi maka sapiꞌbi.”
25 Anambung si Musa ma Piraꞌun, yukna, “Subay kami dūlannu amowa saga hayop kami boꞌ aniyaꞌ sinumbaliꞌ maka tinunuꞌ panukbal ni Tuhan kami si Yawe. 26 Subay ameyaꞌ ma kami saga kahayop-hayopan kami kamemon. Subay halam aniyaꞌ niꞌbbahan minsan dakayuꞌ, sabab kagunahan kami hayop kaseheꞌan itu pangahulmat kami ni Tuhan Yawe. Maka mbal giꞌ kinataꞌuwan bang hayop ingga ya pineneꞌ pagkulban. Subay na kami atꞌkka pehēꞌ ni pagsumbahan boꞌ yampa kinataꞌuwan.”
27 Sagōꞌ pinatuwas eꞌ PANGHŪꞌ-Yawe kōk Piraꞌun inān, angkan iya mbal toꞌongan anugutan saga Israꞌil paluwas min lahatna. 28 Yuk Piraꞌun ma si Musa, “Alaꞌan kam min matahanku. Amay-amay, daꞌa ka pabaihuꞌ ma aku pabīng. Ya llaw pakaꞌndaꞌnu ma aku, ya na llaw kamataynu.”
29 “Ahoꞌ,” yuk si Musa, “kaꞌa ya beyaꞌku. Mbal aku pabaihuꞌ ma kaꞌa pabalik.”