11
Balaꞌ Katapusan: Kamatay Pagsiyakahan
1 Na, aniyaꞌ asal bay pangallam PANGHŪꞌ-Yawe ma si Musa, ya yukna, “Dakayuꞌ laꞌa mulkaꞌ takapin pamatꞌkkaku ma Piraꞌun sampay ma saga aꞌana bangsa Misil, boꞌ yampa kam tinugutan paluwas minnitu. Tinꞌggal kam eꞌna supaya kam pinalaꞌan pagsakali. 2 Hakaꞌin saga aꞌa Israꞌil dꞌnda-lꞌlla,” yukna, “in sigām subay angamuꞌ pamulawan ni saga bangsa Misil ya magsekot lumaꞌ maka sigām.” 3 Min kahandak PANGHŪꞌ ya angkan ahāp pangatayan saga bangsa Misil tudju ni bangsa Israꞌil. Kapagmahaltabatan isab si Musa baranna eꞌ saga wakil sultan maka saga aꞌa Misil kamemon.
4 Manjari itu, aniyaꞌ pamalman Tuhan pamalatun eꞌ si Musa ma Piraꞌun, yukna, “Ya na itu palman Tuhan Yawe, ‘Sangom ilu, tongaꞌ bahangi, palabay du aku min deyom lahat Misil. 5 Ma paglabayku, amatay kamemon saga lꞌlla pagsiyakahan ma bangsa Misil, tinagnaꞌan min anak Piraꞌun ya pinusakaꞌan magsultan, sampay ni anak ata ya maggiling gandum. Damikiyanna isab amatay saga hayop ya dahū bay nianakan. 6 Jari landuꞌ akosog ya paglemong saga aꞌa kamatayan ma katilibut Misil. Min awal sampay ni ahil, halam aniyaꞌ pagtangis buwattēꞌ kosogna. 7 Malaingkan in bangsa Israꞌil maka baꞌanan hayop sigām mbal ainay, mbal minsan tinanghulan eꞌ eroꞌ.’ Minnēꞌ,” yuk si Musa ma Piraꞌun, “makataꞌu kam aniyaꞌ pagbiddaꞌan pinatꞌnnaꞌ eꞌ si Yawe ma bangsa Misil maka bangsa Israꞌil. 8 Pareyoꞌ du isab ni aku saga wakilnu ilu kamemon angamuꞌan aku junjung bang paꞌin aku alaꞌan sampay saga bebeyaꞌanku kamemon. Bang taꞌabut na inaꞌan-i, alaꞌan du aku.” Akagit makalanduꞌ atay si Musa, mbal agon kasandalan. Magtūy iya alaꞌan min matahan Piraꞌun.
9 Na, aniyaꞌ bay pangallam PANGHŪꞌ ma si Musa, ya yukna, “Piraꞌun ilu, mbal toꞌongan akale ma kaꞌam boꞌ supaya paheka lagiꞌ saga hinangku makainu-inu ya paniyaꞌku ma lahat Misil.” 10 Ya katobtobanna, minsan tahinang eꞌ si Musa maka si Harun saga kahinangan makainu-inu itu kamemon ma matahan Piraꞌun, in kōkna masi na paꞌin pinatuwas eꞌ PANGHŪꞌ. Ya heꞌ sababna angkan mbal tugutanna saga aꞌa Israꞌil paluwas min lahatna.