12
Paglakad ma Bangsa Israꞌil
1 Manjari itu, mainaꞌan lagiꞌ si Musa maka si Harun ma lahat Misil, aniyaꞌ pamalman PANGHŪꞌ ma sigā. 2 Yukna, “In bulan itu subay itungbi bulan panagnaꞌan tahun. 3 Pataꞌuhunbi saga ummat bangsa Israꞌil kamemon. Bang taꞌabut sangpūꞌ kasobangan ma bulan tagnaꞌan itu, saga lꞌlla magmakōk ma lumaꞌ pakaniya-pakaniya subay angāꞌ anak bili-bili atawa kambing pagkulban sigām. 4 Bang isab aniyaꞌ aꞌa magtaiꞌanak mbal makaubus amangan dakayuꞌ bili-bili, subay sigām magbahagiꞌ maka pagkahi sigām magsekot lumaꞌ. Sagōꞌ bistahunbi pahāp puhuꞌbi boꞌ supaya atopod eꞌbi amangan. 5 Ya hayop peneꞌbi subay hayop lꞌlla dantahun umulna, halam isab aniyaꞌ sallaꞌna, ai na ka bili-bili, ai na ka kambing. 6 Jagahinbi saga hayop ya tapeneꞌbi sampay taꞌabut sangpūꞌ maka mpat kasobangan ma bulan ilu. Pagabay kohap ma llaw inaꞌan, ya kaꞌam ummat bangsa Israꞌil kamemon subay magsama-sama anumbaliꞌ saga hayopbi. 7 Puwas eꞌ, subay kam angāꞌ lahaꞌ sumbaliꞌan ilu boꞌ pahirinbi ni diyataꞌ bowaꞌ lawang maka ni bihingna karuwambilaꞌ ma lumaꞌ ya pagkakananbi hayop-i. 8 Na, sangom paꞌin, ya hayop ilu subay tinapa boꞌ pinagkakan maka sayul apaꞌit maka tinapay halam bay pinasuligan. 9 In isi hayop ilu mbal manjari niꞌintaꞌ atawa nilagaꞌ, subay tinapa ma katibuꞌukanna, beyaꞌ na isab kōkna, tapeꞌna sampay pagdayaw baranna. 10 Bang aniyaꞌ takapin, daꞌa tauꞌunbi sampay ni kasubuhan, subay tinunuꞌ. 11 Ya pagkakanbi subay asapat hinabubi magsakap atulak. Subay kam magbinadjuꞌ, magsinontoron, magtinaumpaꞌ, magtinungkud. Hinang Paglakad koꞌ ilu, hinang pamaheyabi ma aku PANGHŪꞌ-Yawe.
12 “Ma sangom ilu du,” yuk PANGHŪꞌ, “palabay aku min deyom lahat Misil amapatay saga lꞌlla pagsiyakahan kamemon, ai na ka manusiyaꞌ, ai na ka hayop. Pagmulkaꞌanku saga pagtutuhanan bangsa Misil kamemon, sabab si Yawe aku, ya Tuhan-asal-Tuhan. 13 In lahaꞌ pamahidbi ma bihing bowaꞌ lawang tahinang paltandaꞌan ma saga lumaꞌ ya patꞌnnaꞌanbi. Jari pagꞌndaꞌku lahaꞌ ilu, lakaranta sadja kam, ati halam aniyaꞌ kamulahan patꞌkka ni kaꞌam ma waktu kapangamulkaꞌku lahat Misil.”
14 Angallam giꞌ PANGHŪꞌ, yukna, “Llaw itu subay pagjamuhunbi sakahabaꞌ tahun magpangkat-mamangkat pamaentoman bay kahāpku ma kaꞌam. Hatulan itu subay taptap bogboginbi. 15 Ma deyom pitungꞌllaw,” yukna, “ya tinapay pagkakanbi subay halam aniyaꞌ pasuligna. Ma llaw tagnaꞌan ma dapituꞌ inān, sinōꞌ kam angalaꞌanan pasulig kamemon min deyom kalumaꞌanbi. Sabab sai-sai makakakan ai-ai taga-pasulig ma deyom dapituꞌ heꞌ, mbal na taitung bangsa Israꞌil. 16 Subay kam magtipun magsambahayang ma llaw tagnaꞌan dapituꞌ heꞌ, damikiyanna du isab ma llaw kapituꞌna. Mbal kam makajari maghinang ai-ai ma deyom duwangꞌllaw pagsambahayang eꞌ, luwal hinangbi magadjal pagkakan.
17 “Hinangunbi Hinang Tinapay Halam Pasuligna, pangentomanbi llaw bay kapamowaku kaꞌam magtumpuk-manumpuk paluwas min lahat Misil. Paghinangunbi llaw inaꞌan-i sakahabaꞌ tahun sampay ni kasaumulan. 18 Kahabaꞌ bulan panagnaꞌan tahun, subay kam magkakan tinapay halam taga-pasulig, tinagnaꞌan min waktu abay kohap ma sangpūꞌ maka lima kasobangan sampay ni abay kohap isab ma duwampūꞌ maka duwa kasobangan. 19 Subay halam aniyaꞌ pasulig tabāk ma deyom kalumaꞌanbi ma deyom pituꞌ llaw ilu. Sai-sai amangan ai-ai kalamuran pasulig, ai na ka aꞌa liyu, ai na ka aꞌa porol bangsa Israꞌil, mbal taitung jamaꞌa bangsa Israꞌil. 20 Maꞌai-maꞌai paglahatanbi wajib kam daꞌa amangan kinakan bay kalamuran pasulig. Ya sadja takakanbi ma deyom dapituꞌ subay pagkakan halam aniyaꞌ pasuligna.”
21 Puwas eꞌ, nilinganan eꞌ si Musa saga pagmattoꞌahan bangsa Israꞌil kamemon. Atipun paꞌin, magpanohoꞌan iya ma sigām, yukna, “Kaꞌam kamemon kaniya-kaniya subay pasaꞌut ameneꞌ anak bili-bili atawa anak kambing sinumbaliꞌ boꞌ supaya kam magtaiꞌanak maghinang Hinang Paglakad. 22 Angāꞌ kam isab dakayuꞌ sanga-sanga jambangan hissup boꞌ tꞌnnoꞌinbi ni lahaꞌ bay pasalud ma pinggan. Abaseꞌ paꞌin, pahirinbi lahaꞌ ilu ni bowaꞌ lawang lumaꞌbi, ni diyataꞌna maka ni bihingna karuwambilaꞌ. Na, ma waktu inaꞌan subay halam aniyaꞌ min kaꞌam minsan dangan paluwas min lumaꞌ sampay ni kasubuhan. 23 Sabab ma sangom inaꞌan du, palabay si Yawe min lahat Misil angamulkaꞌan saga aꞌa Misil. Sagōꞌ kaꞌam ilu lakaranna du pagka taꞌndaꞌna lahaꞌ ma bihing bowaꞌ lawangbi. Mbal pasagaranna malaꞌikat pangmumulkaꞌ pasōd ni deyom lumaꞌbi amapatay kaꞌam.”
24 Yuk si Musa isab, “Saga panohoꞌan itu wajib subay bogboganbi magpangkat-mamangkat salama-lama. 25 Bogboginbi isab hinang pagkulban itu bang kam makatꞌkka na ni lahat ya bay panganjanjiꞌ ma kaꞌam eꞌ PANGHŪꞌ-Yawe. 26 Lāgi bang kam saupama tinilaw eꞌ saga kaꞌanakanbi bang ai sababna ya angkan kam maghinang buwattēꞌ, 27 panduꞌinbi sigām. Yukbi, ‘Hinang koꞌ itu pamudji ma PANGHŪꞌ, hinang pangentoman bay Paglakadna ma kitam. In kaꞌanakan siyaka bangsa Misil bay pagmulkaꞌanna, saguwāꞌ kalumaꞌantam bangsa Israꞌil bay kalakaran eꞌna. Ya heꞌ sababna angkan kitam maghinang buwattitu.’ ” Pagkale saga ummat Israꞌil kamemon ma lling si Musa itu, magtūy sigām pasujud amudji Tuhan. 28 Pagubus, patūy saga aꞌa Israꞌil angahinang buwat bay panohoꞌan PANGHŪꞌ ma si Musa maka si Harun eꞌ.
29 Manjari itu, taꞌabut paꞌin tongaꞌ bahangi, pinapatay eꞌ PANGHŪꞌ-Yawe saga lꞌlla kamemon ya anak siyaka ma bangsa Misil. Tinagnaꞌan min anak Piraꞌun ya pinusakaꞌan pagsultanna sampay ni anak pilisu ma deyom kalabusu, sampay isab hayop ya dahū bay nianakan, waꞌi pinapatay kamemon. 30 Makabatiꞌ magtūy Piraꞌun maka saga aꞌa kawakilanna ma hinabu sangom inān, sampay saga aꞌa Misil kamemon makabatiꞌ du isab. Aheya paglemong ma sakalibut lahat Misil sabab halam aniyaꞌ lumaꞌ sigām ma halam kamatayan.
Maglaꞌanan Bangsa Israꞌil min Misil
31 Na, ma sangom inaꞌan du, magpanohoꞌan Piraꞌun ma si Musa maka si Harun subay paharap ni iya. Makaharap paꞌin, yukna ma sigā, “Ē! Alaꞌan kam min saga bangsaku, kaꞌam baranbi sampay bangsabi Israꞌil! Alaꞌan kam pehēꞌ amudji si Yawe buwat bay pangamuꞌbi! 32 Bowahunbi saga kahayop-hayopanbi buwat yukbi, bang paꞌin kam maglaꞌanan na. Maka amuꞌ-amuꞌinbi aku duwaꞌa.”
33 Ya du saga aꞌa Misil kamemon, akosog eꞌ sigām angamuꞌ ni saga aꞌa Israꞌil subay alaꞌan magdaiꞌ-daiꞌ. “Sababna,” yuk sigām, “bang kam mbal alaꞌan, tantu kami magpatayan kamemon!” 34 Sakali itu, pagka mbal makatꞌggol, binowa eꞌ saga aꞌa Israꞌil addunan tinapay sigām ma halam giꞌ pinalamuran pasulig. Jari pinutus sampay pangisihanna maka sꞌmmek boꞌ yampa tinanggung eꞌ sigām. 35 Bineyaꞌ isab eꞌ bangsa Israꞌil bay panohoꞌan si Musa ma sigām, hatina magpangamuꞌ sigām saga pamulawan maka sꞌmmek min saga aꞌa Misil. 36 Ya katꞌkkahanna, saga aꞌa Israꞌil bay kabuwanan ai-ai pangamuꞌ sigām ma bangsa Misil, pagka alunuk pangatayan saga aꞌa Misil tudju ni sigām, sabab min kawasa PANGHŪꞌ. Jarina landuꞌ aheka pangaltaꞌ sukuꞌ Misil bay taꞌāꞌ eꞌ saga aꞌa Israꞌil.
37 Na, maglꞌngnganan bangsa Israꞌil min daꞌira Ramisis tudju ni kauman Sokkot. Ya heka puhuꞌ sigām saga nnom hatus ngibu bang hal lꞌlla niꞌitung, saddī karꞌndahan maka kaondeꞌ-ondeꞌan. 38 Aheka du isab aꞌa bangsa saddī pasambeyaꞌ ma sigām, maka aheka isab katumpukan bili-bili, kambing maka sapiꞌ tabowa sigām. 39 Makahantiꞌ paꞌin, ya addunan bay binowa eꞌ sigām min Misil tahinang tinapay na, tinapay halam aniyaꞌ pasuligna. Addunan inān halam bay kalamuran pasulig sabab nilogos sigām eꞌ bangsa Misil subay alaꞌan magdaiꞌ-daiꞌ. Halam sigām pinarūl minsan angamomos kinakan palutuꞌ sigām.
40 Na, mpat hatus maka tꞌllumpūꞌ tahun ya tꞌggol bay kapaglahat sigām bangsa Israꞌil ma lahat Misil. 41 Ajukup paꞌin mpat hatus maka tꞌllumpūꞌ tahun eꞌ, ma llaw inaꞌan du, ya na waktu kaluwas saga aꞌa sukuꞌ PANGHŪꞌ magtumpuk-manumpuk min lahat Misil. 42 PANGHŪꞌ-Yawe ya bay anganjagahan sigām ma sangom eꞌ boꞌ supaya paluwasna sigām min lahat Misil. Ya heꞌ sababna angkan saga aꞌa Israꞌil subay magjaga bang taꞌabut sangom inaꞌan-i sakahabaꞌ tahun sampay ni kasaumulan, pamaheya sigām ma PANGHŪꞌ.
Kalꞌngnganan Pasal Hinang Paglakad
43 Aniyaꞌ giꞌ isab kabtangan PANGHŪꞌ-Yawe ma si Musa maka si Harun, yukna, “Buwattitu kalꞌngngananna bang kam maghinang Hinang Paglakad. Bang aꞌa saddī bangsana, mbal makajari palamud amangan. 44 Makajari du bang aꞌa bay bꞌllibi magata, bang paꞌin bay taislambi. 45 Sagōꞌ bang aꞌa liyu ya pahantiꞌ ma kaꞌam atawa aꞌa ginadjihan maghinang ma deyomanbi, mbal makajari.
46 “Bang kam amangan sumbaliꞌan pagkulban, subay ma deyom lumaꞌ bay pangadjalan iya, mbal makajari binowa paluwas. Daꞌa isab pōngunbi toꞌolangna minsan dakayuꞌ. 47 Wajib isab saga jamaꞌa Israꞌil kamemon maghinang pagjamu itu, 48 sagōꞌ sasuku halam taislam, mbal makajari palamud magjamu. Ya balikna, bang aniyaꞌ aꞌa bangsa saddī bilahi maghinang Hinang Paglakad pamaheyana ma PANGHŪꞌ-Yawe, boꞌ aꞌa inān atꞌggol na asal maglahat mailu ma kaꞌam, makajari du bang paꞌin iya taislam sampay saga lꞌlla kamemon ma deyomanna. Aꞌa inān taitung saliꞌ porol aꞌa Israꞌil. 49 Manjari saliꞌ du panohoꞌan ya pinatꞌnnaꞌan kaꞌam kamemon, porol bangsa Israꞌil ka atawa bangsa saddī ya maglahat asal mainaꞌan ma kaꞌam.” Ya heꞌ kabtangan Tuhan.
50 Na, bineyaꞌ eꞌ saga bangsa Israꞌil kamemon bay panohoꞌan PANGHŪꞌ ma si Musa maka si Harun. 51 Jari ma llaw inaꞌan du, in bangsa Israꞌil magtumpuk-manumpuk tabowa na eꞌ PANGHŪꞌ-Yawe paluwas min lahat Misil.