13
Pamasukuꞌ Kasiyakahan ma Tuhan
1 Magkallam isab PANGHŪꞌ-Yawe ma si Musa, yukna, 2 “Pamasukuꞌunbi ma aku saga anak kasiyakahan lꞌlla kamemon, sabab aku ya tag-sukuꞌ ma kamemon ya dahū paluwas ma kaꞌam bangsa Israꞌil, ai na ka manusiyaꞌ, ai na ka hayop.”
3 Manjari ahꞌlling si Musa ma saga aꞌa Israꞌil, yukna, “Entomunbi llaw kalaꞌanbi itu min lahat Misil, lahat bay pamanyagaꞌan kaꞌam. Entomunbi pahāp sabab ya na itu llaw bay kapamaluwas kaꞌam eꞌ si Yawe sabab min kosog kawasana. Daꞌa isab kam amangan ai-ai taga-pasulig ma llaw ītu. 4 Ilu kam maglaꞌanan buwattinaꞌan min lahat Misil, ma Bulan Abib ya bulan panagnaꞌan tahun. 5 Binowa na kam eꞌ PANGHŪꞌ ni lahat bay panganjanjiꞌna ma kaꞌmbo-mboꞌantam, ya lahat paglahatan asal eꞌ saga bangsa Kanaꞌan, bangsa Hīt, bangsa Amor, bangsa Hīb maka bangsa Jibus. Ahāp sidda lahat inān, apꞌnnoꞌ eꞌ kalluman landuꞌ ahāp. Manjari, bang kam tapasōd na eꞌ PANGHŪꞌ ni deyom lahat eꞌ, subay kam angisbat paghinang itu pamudjibi Tuhan kahabaꞌ-kahabaꞌ tahun bang taꞌabut bulan Abib itu. 6 Manjari ma deyom pitungꞌllaw paghinang itu, mbal kam makajari amangan ai-ai taga-pasulig. Taꞌabut paꞌin llaw kapituꞌna, subay kam magpajamu pamaheyabi ma PANGHŪꞌ-Yawe. 7 Ma deyom pitungꞌllaw ilu mbal kam makajari amangan ai-ai taga-pasulig. Subay halam aniyaꞌ pasulig tabāk ma lahatbi ilu minsan maingga-maingga. 8 Taꞌabut paꞌin waktu paghinang itu, suli-sulihinbi saga anakbi bang ai sababna. Ya yukbi ma sigām, ‘Angkan aku angisbat paghinang itu sabab nientom bay tabang PANGHŪꞌ-Yawe ma aku waktu kalaꞌanku min lahat Misil.’ ” 9 Ahꞌlling giꞌ si Musa, yukna, “In kahinangan itu saliꞌ sapantun tandaꞌ binaggot ma tanganbi maka ma tuktukbi, pamaentom kaꞌam in saraꞌ panohoꞌan PANGHŪꞌ subay taptap pahꞌllingbi. Sabab hatina in kaꞌam ilu bay binowa eꞌ PANGHŪꞌ paluwas min lahat Misil sabab min kosog kawasana. 10 Subay sabuhunbi paghinang itu sakahabaꞌ tahun bang taꞌabut waktuna.”
11 Amissala lagiꞌ si Musa, yukna, “Pinasampay du kam eꞌ PANGHŪꞌ-Yawe ni lahat bangsa Kanaꞌan, lahat bay panganjanjiꞌna pinamuwan ma kaꞌam sampay ma saga kaꞌmboꞌ-mboꞌanbi. 12 Makatꞌkka paꞌin kam ni lahat eꞌ, subay pasukuꞌunbi ma PANGHŪꞌ saga anakbi lꞌlla kasiyakahan kamemon. Damikiyanna saga anak hayop ya dahū lꞌlla nianakan, subay pinasukuꞌan PANGHŪꞌ isab. 13 Sagōꞌ bang saga anak kuraꞌ ya dahū nianakan mbal taluwaꞌ kinulban. Gom paꞌin nilꞌkkat, hatina subay aniyaꞌ anak bili-bili atawa kambing sinumbaliꞌ gantiꞌna. Bang anak kuraꞌ mbal lꞌkkatbi, na subay pinōngan buliꞌ-kꞌllongna. Saga anakbi lꞌlla kasiyakahan isab, subay nilꞌkkat maka susumbaliꞌan pagkulbanbi ni Tuhan.
14 “Ma sinosōng isab, bang kam gantaꞌ tinilaw eꞌ anakbi pasal paghinang kasiyakahan ilu bang ai sababna, ya sambungbi subay buwatittu. ‘Ma sabab kapamowa PANGHŪꞌ ma kami paluwas min lahat Misil, ya lahat amanyagaꞌ, maka min kosog kawasana isab. 15 Bay atuwas sidda kōk Piraꞌun ma waktu inān ati mbal toꞌongan anugutan kami alaꞌan minnēꞌ, pinapatay eꞌ PANGHŪꞌ saga anak lꞌlla kasiyakahan kamemon ma kaluhaꞌan lahat Misil, manusiyaꞌ ka atawa hayop. Ya heꞌ sababna angkan subay pamasukuꞌku ma PANGHŪꞌ saga anak lꞌlla ai-ai ya dahū paluwas, maka anakku lꞌlla kasiyakahan subay lꞌkkatku maka anak bili-bili atawa kambing.’ 16 Ya hinang itu saliꞌ sapantun tandaꞌ binaggot ma tangantam atawa ma tuktuktam pamaentom kitam pasal bay kapamowa PANGHŪꞌ ma kitam paluwas min lahat Misil, min kosog kawasana isab.” Minnēꞌ aubus kabtangan si Musa.
Bangsa Israꞌil Palintas ni Dambilaꞌ Sꞌllang
17 Manjari, tapaluwas paꞌin saga bangsa Israꞌil eꞌ Piraꞌun, halam sigām binowa eꞌ Tuhan palabay min lān tudju ni lahat Pilistin, minsan asekot-sekot. Tuꞌud halliꞌanna bangsa Israꞌil bang sigām agon-agon nirugpak eꞌ saga aꞌa amowa sigām magbonoꞌ, maraiꞌ alꞌkkas apinda pikilan sigām ati bilahi sigām pabalik pehēꞌ ni Misil. 18 Angkan na sigām binowa eꞌ Tuhan labay min lahat paslangan tampal ni Tahik Keyat.a Magtinakos asal sigām boꞌ asakap magbonoꞌ.
19 Paglaꞌan sigām min Misil, binowa eꞌ disi Musa saga toꞌolang bangkay si Yusup, sabab ma waktu allum lagiꞌ si Yusup, bay pasapana saga anakna. Yukna ma sigām, “Tantu kam tinabang eꞌ Tuhan ma sinosōng boꞌ kam makaluwas min lahat Misil itu. Amay-amayanta kam, bang taꞌabut waktu kaluwasbi, bowahunbi isab bangkayku.”
20 Na, alaꞌan paꞌin bangsa Israꞌil itu min lahat Sokkot, pahantiꞌ sigām ma Etam, dakayuꞌ lahat ma kasekotan paslangan. 21 Manjari inaꞌan PANGHŪꞌ-Yawe anganjagahan sigām ma palꞌngnganan. Sakahabaꞌ llaw inaꞌan iya ma dahuan sigām amandogahan sigām min deyom gabun-Tuhan. Sakahabaꞌ sangom inaꞌan iya ma deyom api-Tuhan amuwanan sigām kasawahan. Minnēꞌ sigām makalꞌngngan llaw-sangom. 22 Mbal alaꞌan gabun-Tuhan inān min mundaꞌan sigām ma waktu llaw, mbal isab alaꞌan api-Tuhan ma waktu sangom.