14
1 Angallam na isab PANGHŪꞌ-Yawe ma si Musa, yukna, 2 “Sohoꞌun saga aꞌa Israꞌil palibut boꞌ pahantiꞌ ma atag kauman Pī-Hahirut, mahēꞌ ma tongaꞌan Migdul maka Tahik Keyat, ma anggopan isab kauman Baꞌal-Sepon. 3 Sabab bang taꞌndaꞌ eꞌ Piraꞌun bangsa Israꞌil magsōng-suhut, pinikil eꞌna maraiꞌ in kaꞌam alungay pagka kam maglibut-libut sadja ma lahat paslangan.” 4 Angallam giꞌ Tuhan, yukna, “Patuwasku isab kōk Piraꞌun boꞌ sohoꞌna saga sundaluna angapasa kaꞌam. Sagōꞌ daꞌugku iya sampay kasundaluhanna. Jari in pangandaꞌugku inān amuwanan aku kabantugan, lāgi magkahagad saga bangsa Misil in aku si Yawe, ya Tuhan-asal-Tuhan.” Ati bineyaꞌ eꞌ saga bangsa Israꞌil bay panohoꞌan Tuhan eꞌ.
5 Sakali itu, kahakaꞌan paꞌin Piraꞌun pasal bangsa Israꞌil waꞌi alahi, apinda pikilanna. Ya du saga wakilna, ati magsusun sigām. “Arōy,” yuk sigām, “mbal manjari! Waꞌi pasagarantam saga aꞌa Israꞌil alaꞌan min lahat itu ati alungay min kitam saga banyagaꞌ ya bay maghinang ma kitam!” 6 Angkan pinasakap eꞌ Piraꞌun kalesana pagbobonoꞌ,b maka sinōꞌ isab saga kasundaluhanna magsakap. 7 Binowa eꞌ Piraꞌun baꞌanan kalesana kamemon sampay saga sundalu ya pagmakōkan kalesa inān pakaniya-pakaniya. Beyaꞌ isab saga kalesana ya katapusan ahāp, nnom hatus hekana. 8 Manjari itu, atuwas na paꞌin kōk Piraꞌun ya sultan lahat Misil sabab min kabayaꞌan PANGHŪꞌ, angkan apasna bangsa Israꞌil, ya anawakkal paluwas min lahatna ma mata mairan. 9 Ya magpangapas inān baꞌanan kasundaluhan Piraꞌun, saga sundalu magpanguraꞌ, baꞌanan saga kalesa pagbobonoꞌ sampay kakompol-kompolan sundalu magtapeꞌ. Taꞌabut eꞌ sigām bangsa Israꞌil inaꞌan pahantiꞌ ma bihing Tahik Keyat, ma kasekotan kauman Pi-Hahirut maka Baꞌal Sepon.
10 Manjari itu, asekot paꞌin pinaꞌan Piraꞌun maka saga kasundaluhanna, taꞌndaꞌ sigām eꞌ saga aꞌa Israꞌil. Pagꞌndaꞌ itu, magtūy sigām sinōd tāw ati parahing ni PANGHŪꞌ-Yawe angamuꞌ tabang. 11 Amūng-mūng sigām ma si Musa, yuk-i, “Mbal manjari hinangnu itu, atiyaꞌ kami bowanu paluwas min lahat Misil! Halam bahāꞌ aniyaꞌ pangubulan ma lahat Misil, ya angkan kami bowanu piꞌitu magpatayan ma lahat paslangan? 12 Bay ka pahꞌllingan kami ma lahat Misil giꞌ, ya yuk kami ma kaꞌa, ‘Pasagarin kami maghinang giꞌ ma bangsa Misil.’ Padpad kami amatay ma lahat paslangan itu, gom lagiꞌ kami magpaꞌata ma sigām.”
13 Anambung si Musa, yukna, “Daꞌa kam agawa. Pahogotun pangatayanbi ati taꞌndaꞌbi bang buwattingga eꞌ Tuhanta Yawe angalappas ma kaꞌam. Puwas min llaw itu, mbal na taꞌndaꞌbi pabīng saga aꞌa Misil ilu. 14 Patotog kam, sabab PANGHŪꞌ ya gantiꞌbi amonoꞌ sigām.”
15 Angallam giꞌ PANGHŪꞌ-Yawe ma si Musa, yukna, “Angay ka angamuꞌ tabang na paꞌin ni aku? Sohoꞌun palanjal saga aꞌa Israꞌil ilu. 16 Pabantangun isab tungkudnu paharap ni tahik boꞌ abahagiꞌ duwa. Manjari paniyaꞌ katohoꞌan ma tꞌngngaꞌ tahik palabayanbi bangsa Israꞌil tudju parambilaꞌ. 17 Patuwasku du kōk saga aꞌa Misil boꞌ supaya sigām tabowa angapas kaꞌam sampay ni tꞌngngaꞌ tahik. Jari pasōng giꞌ kabantuganku sabab pangandaꞌugku min Piraꞌun maka saga kasundaluhanna, ai na ka sigām ameyaꞌ min kalesa pagbonoꞌ, ai na ka sigām magpanguraꞌ. 18 Paheya gom paꞌin kabantuganku ati magparassaya saga bangsa Misil kamemon in aku si Yawe, ya Tuhan-asal-Tuhan, pagka taraꞌugku Piraꞌun maka kasundaluhanna kamemon.”
19 Puwas eꞌ in malaꞌikat Tuhan ya bay parahū asal ma mundaꞌan bangsa Israꞌil, pasuhut na ni buliꞌan. Damikiyanna isab gabun-Tuhan ya bay ma dahuan, pasuhut isab ni buliꞌan. 20 Jari magpatiꞌllot na gabun inān ma saga bangsa Israꞌil maka baꞌanan kompolan sundalu Misil. Taluwaꞌ kalendoman saga sundalu Misil, sagōꞌ saga aꞌa Israꞌil ma deyom kasawahan na paꞌin minsan sangom. Jari halam bay makapagsekot saga aꞌa Misil maka saga aꞌa Israꞌil waktu sangom inān sampay ni kasubuhan.
21 Sakali itu pinabantang eꞌ si Musa tungkudna paharap ni tahik. Pagpabantangna paꞌin, magtūy aniyaꞌ baliyu akosog pinatꞌkka eꞌ PANGHŪꞌ min sobangan animpus ni kasubuhan. Minnēꞌ aniyaꞌ katohoꞌan ma tꞌngngaꞌ tahik. Jari abahagiꞌ duwa tahik 22 boꞌ aniyaꞌ tꞌbbahan palabayan saga bangsa Israꞌil parambilaꞌ. Maka tahik inān tahinang saliꞌ dinding min bihing sigām karuwambilaꞌ.
23 Magtūy paꞌapas saga sundalu Misil ma sigām, beyaꞌ isab saga kalesa Piraꞌun kamemon maka saga aꞌana magpanguraꞌ, paurul ma sigām sampay ni tahik. 24 Na, song paꞌin pakꞌllat llaw, paromol PANGHŪꞌ min deyom gabun maka api. Taꞌndaꞌna baꞌanan kompolan saga sundalu Misil, ati aheya hiluhalaꞌ pamatꞌkkana ma sigām. 25 Pinaloblob eꞌna saga silikan kalesa sigām ya angkan sigām kahunitan magsōng-suhut. Yuk saga sundalu Misil, “Tinabangan saga bangsa Israꞌil itu eꞌ si Yawe, angkan halam aniyaꞌ dapattam. Sūng kitam alahi!”
26 Angallam giꞌ PANGHŪꞌ-Yawe ma si Musa, yukna, “Pabantangun tangannu boꞌ palalom tahik pabalik, ati boꞌ alimun baꞌanan saga sundalu Misil, beyaꞌ isab saga kalesa sigām maka saga kompolan sundalu magpanguraꞌ.” 27 Magtūy pinabantang eꞌ si Musa tanganna paharap ni tahik. Pagkꞌllat llaw paꞌin, pabīng na tahik ni bay baina. Alahi baꞌanan aꞌa Misil inān kalu makapuwas, sagōꞌ nilokoban sigām eꞌ PANGHŪꞌ maka tahik. 28 Jari makabīng paꞌin tahik ni bay baina, alembo kasundaluhan Piraꞌun kamemon, ya bay angapas saga bangsa Israꞌil sampay ni tahik. Talapay saga kalesa sigām maka baꞌanan sundalu magpanguraꞌ. Halam aniyaꞌ takapin allum minsan dakayuꞌ.
29 Sagōꞌ saga bangsa Israꞌil, palꞌngngan ma katohoꞌan sampay paꞌabut ni dambilaꞌ. Aniyaꞌ tahik saliꞌ hantang dinding min bihing sigām karuwambilaꞌ. 30 Jari ma llaw inaꞌan, lappasan saga aꞌa Israꞌil eꞌ PANGHŪꞌ min pangꞌntanan saga bangsa Misil. Taꞌndaꞌ eꞌ sigām baꞌanan saga bangkay aꞌa Misil ma bihing tahik. 31 Na, pagꞌndaꞌ saga aꞌa Israꞌil itu ma kosog kawasa PANGHŪꞌ-Yawe ya bay pangandaꞌugna ma saga bangsa Misil eꞌ, magtūy sigām magmatāw ma iya. Jari angandol sigām ma iya sampay ma sosohoꞌanna si Musa.