15
Kalangan si Musa
1 Na, magpangalang disi Musa maka saga bangsa Israꞌil pamudji sigām ni si PANGHŪꞌ. Ya na itu kalangan sigām:
Magkalangan aku ni Yawe
sabab abantug daꞌuganna.
Kalarukan eꞌna saga kuraꞌ ni tahik,
talapay isab saga aꞌa magpanguraꞌ.
2 Si Yawe ya amuwanan aku kosog,
in iya pagkalanganku
pagka aku kalappasanna.
In iya Tuhanku, pudjiku iya,
Tuhan isab kamattoꞌahanku, paheyaku ōnna.
3 Aesog asal si Yawe ma pagbonoꞌan,
si Yawe ya ōnna.
4 Saga kalesa sukuꞌ Piraꞌun
sampay baꞌanan kasundaluhanna
kalarukan eꞌ Tuhan ni tahik.
Saga jiniral Piraꞌun ya katapusan aesog,
waꞌi alembo ma Tahik Keyat.
5 Heꞌ na sigām ma tꞌngngaꞌ sꞌllang
saliꞌ hantang batu patꞌnde ni kalaloman.
6 O Yawe, kaꞌa ya Sangat-Kawasa,
kosognu mbal tapulaꞌ-pulaꞌ.
Tapodjak saga palbantahannu
sabab min kosog kawasanu.
7 Pinahantak sasuku angatu ma kaꞌa
pagka sigām taluwaꞌ kosog kawasanu.
Atunuꞌ sigām saliꞌ sapantun sagmot
pagka taluwaꞌ mulkaꞌnu.
8 Pabūd tahik sabab min kosog napasnu,
Anꞌngge goyak saliꞌ hantang dinding,
Akompol isab tꞌngngaꞌ sꞌllang.
9 Yuk pangabbu saga palbantahannu,
“Apasku saga aꞌa Israꞌil sampay saggawku,
Sukuꞌku pangaltaꞌ ya tatabanku min sigām.
Karūlan aku ameneꞌ ai-ai kanapsuhanku.
Hublutku kalisku,” yuk banta inān,
“boꞌ papatayku sigām kamemon.”
10 Sagōꞌ kaꞌa, Tuhan, pagtiyupnu mintꞌdda
alimun magtūy palbantahannu eꞌ tahik.
Patꞌnde sigām ma timbang
saliꞌ sapantun tinggaꞌ.
11 O Yawe, halam aniyaꞌ makasaliꞌ ni kaꞌa
ma deyom katuhan-tuhanan ya pagtaꞌatan manusiyaꞌ.
Halam toꞌongan aniyaꞌ saliꞌnu.
Kaꞌa iya sangat mahasussi, sangat asahaya,
sangat akawasa,
sangat makahinang saga hinang makatāw-tāw
ya kainu-inuhan aꞌa.
12 Pinabantang sadja tangannu kowan,
magtūy aliyaw saga banta kami eꞌ gumi.
13 Ya Tuhan, mbal amaluba kasi-lasanu
ma saga aꞌa kalappasannu,
angkan sigām malimnu.
Bowanu sigām ni lahatnu mulliya
sabab min kosog kawasanu.
14 Makakale saga bangsa liyu pasal pakaradjaꞌan itu,
kinoblaꞌan sigām sampay amidpid.
Saga aꞌa Pilistin sinōd tāw mbal kasandalan,
15 Saga datuꞌ bangsa Edom agawa makalanduꞌ,
pagbebeyaꞌan bangsa Mowab niumagad.
Saga bangsa Kanaꞌan alanyap sadja,
angorog-ngorog sigām sabab min tāw.
16 Sinōd tāw kamemon saga kabangsa-bangsahan
ma sabab kosog kawasanu.
Anꞌngge sadja sigām sampay makalabay na saga aꞌanu,
ya talꞌkkatnu min pagbanyagaꞌan.
17 O Tuhan, tantu kami pasampaynu ni lahatnu
boꞌ patꞌnnaꞌ ma būd ya palsukuꞌannu lissi,
ni patꞌnnaꞌan ya tapeneꞌnu,
ni paglumaꞌan sussi ya tahinangnu.
18 O Yawe, kaꞌa Tuhan-asal-Tuhan,
makapagbayaꞌ du ka salama-lama.”
19 Na, ya na inaꞌan kalangan disi Musa. Manjari itu, ma waktu kapehēꞌ ni tꞌngngaꞌ tahik saga sundalu Piraꞌun magpanguraꞌ, maka saga kalesana pagbobonoꞌ sampay baꞌanan kuraꞌna, alimun sigām kamemon eꞌ tahik ya pinabīng ni baina eꞌ PANGHŪꞌ. Sagōꞌ in bangsa Israꞌil maglꞌngnganan ma katꞌbbahan sampay makatꞌkka ni dambilaꞌ.
20 Sakali magkalangan si Mariyam, dakayuꞌ nabi ya danakan si Harun dꞌnda. Angāꞌ iya tambul-tambulna maka eꞌna angigal. Bineyaꞌan isab iya eꞌ saga karꞌndahan magpamowa tambul-tambul di-sigām maka magpangigal isab. 21 Magkalangan si Mariyam ma baꞌanan seheꞌna inān, yukna,
“Pagkalanginbi si Yawe pamudjibi ma iya,
sabab abantug daꞌuganna.
Kalarukan eꞌna saga kuraꞌ ni tahik,
tabeyaꞌ isab saga aꞌa magpanguraꞌ.”
Boheꞌ Apaꞌit ma Lahat Mara
22 Na, binowa eꞌ si Musa saga bangsa Israꞌil alaꞌan min Tahik Keyat inān tudju ni lahat paslangan ya pinagōnan Sūr. Tꞌllungꞌllaw ya tꞌggol sigām maglꞌngngan-lꞌngngan ma lahat paslangan eꞌ ma halam aniyaꞌ boheꞌ tabāk sigām. 23 Sakali, makaꞌabut paꞌin sigām ni Mara, mbal tainum boheꞌ mainaꞌan sabab landuꞌ apaꞌit. Angkan na lahat inān pinagōnan ‘Mara’, sabab hatina ‘apaꞌit.’ 24 Manjari pinagdugalan si Musa eꞌ saga aꞌa Israꞌil. Yuk sigām, “Arōy! Daka ai na inumtam itu!”
25 Parahing si Musa ni PANGHŪꞌ-Yawe angamuꞌ tabang ati pinaꞌndaꞌan iya dambatang kayu-kayu. Niāꞌ kayu itu eꞌ si Musa boꞌ larukanna ni deyom boheꞌ apaꞌit eꞌ. Paglaruk itu, magtūy atꞌbbag boheꞌ inān, ahāp niꞌinum.
Manjari itu, mahēꞌ paꞌin bangsa Israꞌil ma lahat Mara heꞌ, aniyaꞌ saraꞌ pamatꞌnnaꞌ eꞌ PANGHŪꞌ panulayanna ma sigām bang ameyaꞌ atawa mbal. 26 Yukna, “Bang kam pakale toꞌongan ma aku, ya Tuhanbi si Yawe, maka bang kam angahinang kabontolan ya makasulut atayku, maka bang kam amogbog isab ma panohoꞌanku maka pamituwaku kamemon, na, mbal kam patꞌkkahanku saga saki ya bay patꞌkkaku ma saga bangsa Misil eꞌ. Aku si Yawe ya magpauliꞌ saga sakibi.”
27 Pagubus, palanjal na sigām sampay taꞌabut pagboheꞌan niōnan Ilim. Sangpūꞌ maka duwa ya heka tuburan boheꞌ mainaꞌan, maka pitumpūꞌ poꞌonan hulma.a Jari pahantiꞌ sigām mainaꞌan ma bihing boheꞌ.