16
Pagkakan min Tuhan
1 Palabay paꞌin daka pilangꞌllaw ya kahantiꞌ bangsa Israꞌil ma Ilim, magbeyaꞌ sigām kamemon palanjal minnēꞌ. Jari itu, ma bulan karuwana min bay kaluwas sigām min lahat Misil, sangpūꞌ maka lima kasobangan, makasampay na sigām ni lahat Sīn, ya ma olangan Ilim maka Būd Turusina.a Paslangan asal lahat Sīn itu, ahunit pamihaꞌan kalluman. 2 Sakali itu, mahēꞌ paꞌin sigām ma lahat Sīn, magkarugalan kamemon saga aꞌa Israꞌil pasal kulang pagkakan sigām. 3 Ya pahꞌlling sigām ma si Musa maka si Harun, “Ahāp kami amatay min kahandak PANGHŪꞌ ma lahat Misil lagiꞌ. Ahāp bay pamangan kami mahēꞌ. Aniyaꞌ saga sumbaliꞌan nilohoꞌan maka palauk indaginis, pila-pila ya kabayaꞌan kami. Sagōꞌ ndaꞌunbi kahālan kami buwattinaꞌan, itiyaꞌ kami tabowabi ni paslangan itu boꞌ patay otas kamemon.”
4 Sakali itu, pagka buwattēꞌ pagmusmud saga aꞌa Israꞌil, angallam PANGHŪꞌ-Yawe ma si Musa, yukna, “Paniyaꞌanta kam pagkakan saliꞌ sapantun ulan deyoꞌ min langit. Sohoꞌun saga aꞌa ilu paluwas min kalumaꞌan sigām amuwaꞌ pagkakan kahabaꞌ llaw. Ya tatimuk eꞌ sigām subay sarang-sarang pagkakan sigām ma dangꞌllaw sadja. Minnēꞌ kasulayanku sigām bang ameyaꞌ ma panohoꞌanku atawa mbal. 5 Ya taꞌadjal eꞌ sigām ma llaw kaꞌnnomna subay nilipat duwa boꞌ sarang pagkakan duwangꞌllaw.” Ya du inaꞌan pangallam Tuhan.
6 Manjari amissala si Musa maka si Harun ma kamemon bangsa Israꞌil. “Abay kohap ilu,” yuk sigā, “kamattanan kam in Tuhanbi si Yawe bay amowa kaꞌam paluwas min lahat Misil. 7 Pagsalung subu isab makaꞌndaꞌ kam sahaya si Yawe, sabab takale eꞌna pagdugalbi ma iya. Nggaꞌi ka kami ya pagdugalanbi, sabab nggaꞌi kami ya tag-sohoꞌan.” 8 Yuk si Musa isab, “PANGHŪꞌ-Yawe ya amuwanan kaꞌam sumbaliꞌan pagkakanbi kohap, maka tinapay pagkakanbi kahabaꞌ subu, pila-pila ya makaꞌssohan kaꞌam. Sabab hatina takale eꞌ PANGHŪꞌ pagdugalbi. Maka nggaꞌi ka kami ya pagdugalanbi sagōꞌ Tuhan. Nggaꞌi ka kami ya tag-kapatut.”
9 Puwas eꞌ ahꞌlling si Musa ma si Harun, yukna, “Sohoꞌun saga aꞌa ilu kamemon paharap ni PANGHŪꞌ sabab takale eꞌna pagdugal sigām.” 10 Sakali itu, sabu paꞌin si Harun amissala ma saga aꞌa inān, na, paꞌalop sigām tudju ni paslangan. Magtūy saruꞌun-duꞌun taꞌndaꞌ eꞌ sigām sahaya si Yawe asinag min deyom gabun.
11 Yukna ma si Musa, 12 “Takaleku pagdugal saga aꞌa Israꞌil. Buwattitu ya pangahakanu ma sigām, ‘Abay kohap itu amangan kam isi sumbaliꞌan, maka salung subu amangan kam pagkakan sampay kam asso na. Minnēꞌ kataꞌuwanbi in aku si Yawe ya Tuhanbi.’ ”
13 Na, abay kohap paꞌin, apꞌnnoꞌ magtūy kauman sigām eꞌ saga manuk-manuk ūl-ūlb landuꞌ aheka. Jari aniyaꞌ susumbaliꞌan takakan sigām. Pagsubu isab, abaseꞌ eꞌ aluꞌ sakalibut kalumaꞌan. 14 Atohoꞌ paꞌin, aniyaꞌ saliꞌ luwa aes anipis-nipis toꞌongan patꞌnnaꞌ ma kuwit tanaꞌ. 15 Pagꞌndaꞌ saga aꞌa Israꞌil, halam kinataꞌuwan eꞌ sigām bang ai, angkan sigām magtilaw-tilaw danseheꞌan, yuk-i, “Ai ilu?”
Ya sambung si Musa, “Pagkakan koꞌ ilu ya pamuwan PANGHŪꞌ ma kaꞌam. 16 Sinōꞌ kam eꞌ PANGHŪꞌ animuk pagkakan ilu pila-pila ya kagunahanbi ma dangꞌllaw. Gantaꞌunbi duwa gantang ma aꞌa dangan maka dangan sasuku paokom ma lumaꞌbi.”
17 Na, bineyaꞌ eꞌ saga aꞌa Israꞌil ya bay panohoꞌan Tuhan eꞌ. Aniyaꞌ sigām bay animuk aheka, aniyaꞌ isab bay animuk arikiꞌ. 18 Sagōꞌ pagtꞌppong paꞌin, saga aꞌa bay animuk aheka mbal maglabi, maka saga aꞌa isab bay animuk arikiꞌ mbal magkulang. Atopod sigām saliꞌ-saliꞌ. 19 Ahꞌlling giꞌ si Musa ma sigām, yukna, “Subay kam daꞌa angapin pagkakanbi salung.” 20 Sagōꞌ aniyaꞌ sigām kaseheꞌan mbal ameyaꞌ ma pahꞌlling si Musa-i, ati aniyaꞌ kinapin eꞌ sigām. Pagsalung paꞌin, na, niulat na maka bau haluꞌ. Jari akagit atay si Musa ma sigām.
21 Manjari itu, kahabaꞌ-kahabaꞌ subu, animuk pagkakan saga aꞌa kamemon, pila-pila ya kagunahan sigām. Ya halam tatimuk atunaw lullun eꞌ llaw. 22 Sagōꞌ taꞌabut paꞌin llaw kaꞌnnomna, nilipat duwa ya tinimuk eꞌ sigām, hatina mpat gantang ma aꞌa dangan maka dangan. Sakali itu, makataꞌu paꞌin baꞌanan aꞌa pagbebeyaꞌan pasal pagtimuk aheka ilu, magtūy sigām anumbung pehēꞌ ni si Musa. 23 Ya sambung si Musa ma sigām, yukna, “Makajari du, sabab aniyaꞌ panohoꞌan PANGHŪꞌ pasal llaw kapituꞌna, buwattitu. ‘Salung ya llaw paghali-hali, llaw mulliya pagtataꞌatbi ma PANGHŪꞌ-Yawe.’ Manjari adjalunbi ya bay tatimukbi insiniꞌ. Bang kabayaꞌanbi angahinang dī tinapay, na hinangunbi. Bang kabayaꞌanbi kinakan sadja, bꞌllahunbi na. Ai-ai takapin subay tinauꞌ pagkakanbi salung.”
24 Jari tinauꞌ eꞌ sigām kapinna pagkakan sigām ma llaw kapituꞌna, buwat bay pamituwa si Musa. Halam niulat, halam isab bauwan. 25 Pagka llaw kapituꞌna na, ahꞌlling si Musa ma sigām, yukna, “Kakanunbi na pagkakan ya tatauꞌbi ilu, sabab ya na itu llaw kapituꞌna, llaw paghali-hali, llaw mulliya pagtaꞌat ni PANGHŪꞌ. Mbal kam makapuwaꞌ tinapay ma tanaꞌ ma llaw itu. 26 Nnom llaw ya pagtimukbi, sagōꞌ bang taꞌabut llaw kapituꞌna, ya llaw mulliya pagtaꞌat ni Tuhan, halam aniyaꞌ tatimukbi.”
27 Na, ya du isab, minsan buwattēꞌ pamituwa si Musa, aniyaꞌ saga aꞌa paluwas min kalumaꞌan arak animuk kinakan ma llaw kapituꞌ, sagōꞌ halam toꞌongan aniyaꞌ tabāk. 28 Angkan amissala PANGHŪꞌ ma si Musa, yukna, “Kaꞌam saga bangsa Israꞌil, sumiyan kam pahali anaggaꞌ saga saraꞌ panohoꞌanku? 29 Entomunbi, aku si Yawe ya amatꞌnnaꞌan kaꞌam llaw mulliya itu pagtaꞌatbi ma aku. Ya heꞌ sababna angkan kam buwananku pagkakan nilipat duwa ma llaw kaꞌnnomna boꞌ makasarangan kaꞌam duwangꞌllaw. Subay kam patotog ma lumaꞌbi ma llaw kapituꞌna, daꞌa kam magluwas-luwas.” 30 Manjari pahali-hali saga aꞌa Israꞌil inān ma llaw kapituꞌna.
31 Ya pangōn saga bangsa Israꞌil ma tinapay inān manna.c Luwana saliꞌ binhiꞌ anahut-nahut walnaꞌ poteꞌ. Ahāp nanamna, saliꞌ bāng-bāng lamuran gulaꞌ buwani.
32 Yuk si Musa ma sigām, “Ya panohoꞌan PANGHŪꞌ isab, subay tauꞌta duwa gantang manna boꞌ supaya taꞌndaꞌ luwana eꞌ panubuꞌtam magpangkat-mamangkat. Jari kinataꞌuwan eꞌ sigām ma sinosōng pasal tinapay ya bay pamuwan Tuhan pagkakantam ma lahat paslangan, masa lagiꞌ kapamowana kitam alaꞌan min lahat Misil.” 33 Yuk si Musa isab ma si Harun, “Angāꞌ ka garapun boꞌ isihun duwa gantang manna. Patꞌnnaꞌun ma matahan PANGHŪꞌ boꞌ tinauꞌ mainaꞌan pamaentom saga panubuꞌtam pangkat-mamangkat.”
34 Bineyaꞌ magtūy eꞌ si Harun panohoꞌan PANGHŪꞌ itu. Pinatꞌnnaꞌ eꞌna garapun isihan manna ma dahuan Baꞌul Paljanjiꞌan boꞌ tinauꞌ pahāp. 35 Manjari itu, in bangsa Israꞌil inān magkakanan manna na paꞌin ma deyom mpatpūꞌ tahun, sampay ni waktu katꞌkka sigām ni lahat taga-aꞌa. Subay bay taꞌabut bihing lahat Kanaꞌan boꞌ yampa sigām pahali amangan. 36 (Epa ya tꞌppongan sigām ma masa awal eꞌ, lima gantang ma da-epa.)