17
Boheꞌ Paluwas min Batu Lakit
1 Na, pauntas na saga bangsa Israꞌil kamemon min lahat Sīn boꞌ angalatun lahat, piꞌingga-piꞌingga ya panohoꞌan PANGHŪꞌ-Yawe ma sigām. Taꞌabut paꞌin lahat Repidim, pahantiꞌ sigām mainaꞌan sagōꞌ halam aniyaꞌ boheꞌna niꞌinum. 2 Jari anoway saga aꞌa Israꞌil ma si Musa. Yuk sigām, “Buwanin kami boheꞌ.”
Anambung magtūy si Musa yukna, “Angay aku panowayanbi? Angay sulayanbi si Yawe?”
3 Sagōꞌ atohoꞌ toꞌongan kꞌllong sigām, ya angkan sigām angandugal ma si Musa, yuk-i, “Angay kami bay bowanu alaꞌan min Misil boꞌ supaya patay boheꞌ kami kamemon maka saga kaꞌanakan kami sampay isab baꞌanan hayop kami?”
4 Na, pagka buwattēꞌ pahꞌlling sigām, parahing si Musa ni PANGHŪꞌ angamuꞌ tabang, yukna, “Ya Tuhanku, inayku saga aꞌa itu? Agon-agon aku pinagbantung eꞌ sigām.”
5 Anambag PANGHŪꞌ ma si Musa, yukna, “Palꞌngngan ka parahū min saga aꞌa ilu. Pabeyaꞌun isab ma kaꞌa saga kamattoꞌahan bangsa Israꞌil kaseheꞌ. Bowahun tungkud ya bay pangalubaknu ma sapaꞌ Nīl. Pehēꞌ na ka,” yuk Tuhan. 6 “Anꞌngge du aku ma matahannu mahēꞌ ma bihing batu lakit ya ma tampalan būd Horeb. Pagtꞌkkanu pehēꞌ, lubakun batu inān maka tungkudnu, ati aniyaꞌ boheꞌ patubud minnaꞌan pamainum saga aꞌa.” Bineyaꞌ eꞌ si Musa panohoꞌan Tuhan itu ma matahan saga pagmattoꞌahan bangsa Israꞌil. 7 Ya pangōn si Musa ma atag boheꞌ inān Massaa maka Mereba, ma sabab kapamūng-mūng saga bangsa Israꞌil maka halam bay amarassaya ma PANGHŪꞌ-Yawe, pagka yuk sigām, “Itiyaꞌ bahāꞌ si Yawe ma kitam? Atawa halam?”
Bangsa Amalek Taraꞌug eꞌ Bangsa Israꞌil
8 Na, ma Repidim paꞌin bangsa Israꞌil, nirugpak sigām eꞌ saga bangsa Amalek. 9 Manjari anohoꞌ si Musa ma si Yussaꞌ, ya nakuraꞌ sundalu. Yuk si Musa, “Peneꞌin kitam saga lꞌlla ati bowahun sigām magbonoꞌ maka bangsa Amalek inān. Pagsalung, anꞌngge aku ma diyataꞌ būd ilu maka eꞌku angꞌntan tungkud ya bay pamuwan aku eꞌ Tuhan.”
10 Bineyaꞌ eꞌ si Yussaꞌ panohoꞌan si Musa heꞌ. Binowa eꞌna saga aꞌana angatu ma bangsa Amalek. Sagōꞌ si Musa maka si Harun, maka seheꞌ sigām si Hūr, bay patukad ni diyataꞌ būd eꞌ. 11 Satꞌggol pinaꞌangkat eꞌ si Musa tanganna karuwambilaꞌ angandaꞌug saga bangsa Israꞌil. Sagōꞌ bang pinareyoꞌ, bangsa Amalek ya angandaꞌug. 12 Manjari itu, taꞌabut paꞌin angalongkoy tangan si Musa, aniyaꞌ batu binowahan iya eꞌ si Harun maka si Hūr pamatingkōꞌan iya. Anꞌngge sigām duwangan min bihing si Musa karuwambilaꞌ amaꞌangkat tanganna, manjari atotog sampay pasꞌddop mata llaw. 13 Na, minnēꞌ taraꞌug baꞌanan sundalu bangsa Amalek eꞌ disi Yussaꞌ.
14 Pagubus, amissala PANGHŪꞌ ma si Musa, yukna, “Sulatun pakaradjaꞌan itu boꞌ mbal takalipat. Pakalehun isab si Yussaꞌ, sabab lapnasku bangsa Amalek itu sampay sigām alungay tūy min pangentom manusiyaꞌ.” 15 Manjari amangkat batu si Musa nihinang pagkulbanan ni Tuhan. Yawe-Nissi ya pangōn si Musa ma pagkulbanan-i, hatina ‘si Yawe ya Panjiku.’ 16 Yuk si Musa, “Patꞌnggehunbi panji si Yawe. Binantahan eꞌna saga bangsa Amalek magpangkat-mamangkat.”