18
Katibaw si Jetro ni Ayuwanna si Musa
1 Na si Jetro, ya imam ma lahat Midiyan, matoꞌa isab si Musa, bay makakale pasal kaheya tabang si Yawe ma disi Musa sampay ma saga bangsana Israꞌil. Bay konoꞌ sigām tapaluwas eꞌna min lahat Misil. 2-3 Si Jetro itu bay angokoman si Sippura hꞌnda si Musa maka duwangan anakna, waktu bay kapamapoleꞌ iya eꞌ hꞌllana. Si Gersoma ya ōn anakna dakayuꞌ inān. “Sabab,” yuk si Musa, “aku itu aꞌa liyu ma nggaꞌi ka lahatku.” 4 Si Eleꞌeserb ya ōn anakna pasunuꞌ. “Sabab,” yuk si Musa, “tinabangan aku eꞌ Tuhan ya pagtuhanan mmaꞌku. Kalappasan aku eꞌna min pangꞌntanan Piraꞌun waktu iya bilahi amonoꞌ ma aku.”
5 Manjari, takale paꞌin eꞌ si Jetro pasal kahālan si Musa itu, patibaw iya pehēꞌ ni pahantiꞌan disi Musa, ya ma atag būd Tuhan ma lahat paslangan. Inaꞌan isab ameyaꞌ ma iya hꞌnda si Musa maka duwangan anakna. 6 Aniyaꞌ isab tambuku bay pinabeyaꞌ eꞌ si Jetro ni si Musa, yukna, “Piꞌilu aku patibaw ni kaꞌa, beyaꞌ isab hꞌndanu maka duwangan anaknu.” 7 Na, song paꞌin atꞌkka disi Jetro, pehēꞌ si Musa anampang. Pagꞌndaꞌna ma matoꞌana, magtūy iya parukuꞌ. Aubus, siniyum eꞌna matoꞌana. Magaddat-iyaddati sigā boꞌ yampa pasōd ni deyom lumaꞌ si Musa tolda. 8 Sinuli-sulihan si Jetro eꞌ si Musa pasal kamemon bay nihinang eꞌ si Yawe ma Piraꞌun maka ma aꞌa Misil kamemon, sabab min lasana ma bangsa Israꞌil. Sinuli-suli isab pasal kasigpitan ya kalabayan sigām ma lꞌngnganan sigām, maka buwattingga kalappas PANGHŪꞌ-Yawe ma sigām.
9-10 Makakale paꞌin si Jetro pasal kahāpan kamemon ya tahinang eꞌ PANGHŪꞌ-Yawe ma saga bangsa Israꞌil, kinōgan iya. Yukna, “Pudjita si Yawe, ya bay angalappasan kaꞌam min komkoman Piraꞌun maka saga bangsana. Sanglitanta iya, ya bay amaluwas kaꞌam min pagbanyagaꞌan. 11 Kataꞌuwanku na, akawasa giꞌ si Yawe min katuhan-tuhanan kamemon ya pagtaꞌatan manusiyaꞌ, sabab tapareyoꞌ eꞌna saga aꞌa Misil ya bay amissokoꞌ kaꞌam bangsa Israꞌil.” 12 Puwas eꞌ aniyaꞌ dakayuꞌ hayop binowa eꞌ si Jetro matoꞌa si Musa panukbal ni Tuhan, tinunuꞌ ma katibuꞌukanna. Maka aniyaꞌ giꞌ susumbaliꞌan saddī tinukbal isab. Jari magtipun si Harun maka kamemon saga pagmattoꞌahan bangsa Israꞌil boꞌ magjamu maka si Jetro ma matahan Tuhan.
13 Pagꞌllaw dakayuꞌ, inaꞌan si Musa analassay palkalaꞌ ya binowa ni iya eꞌ saga aꞌa kamemon. Magabut-abut sigām magtimuk ma sakalibutna min subu-subu sampay ni kasangoman. 14 Pagꞌndaꞌ si Jetro ma hinang si Musa itu abuhat makalanduꞌ, yukna ma iya, “Angay ka angkan maghinang buwattilu ma baꞌanan aꞌa ilu! Angay subay kaꞌa dangan-dangannu ya analassay baꞌanan palkalaꞌ sigām, maka sigām ya magtꞌnggehan ma sakalibutnu sampay ni kasangoman?”
15 Ya sambung si Musa ma matoꞌana, “Bapaꞌ, angkan buwattitu, sabab aku ya pangaruhan sigām pasal kahandak Tuhan. 16 Bang aniyaꞌ palkalaꞌ pagsaggaꞌan sigām sumiyan-sumiyan, aku ya amituwahan sigām pasal saraꞌ maka panohoꞌan Tuhan.”
17 Yuk si Jetro ma iya, “Ā, mbal taluwaꞌ hinangnu ilu. 18 Ahusaꞌ makalanduꞌ. Binaleꞌ ka sampay saga aꞌa ya angalagaran kaꞌa. Mbal takoleꞌnu bang halam aniyaꞌ anabangan kaꞌa. 19 Na,” yuk si Jetro isab, “kalehun pahāp, aniyaꞌ garaꞌ pangahūganku kaꞌa, mura-murahan isab bang paꞌin pataptap Tuhan ma kaꞌa. Kaꞌa ya subay paharap ni Tuhan gantiꞌ saga aꞌa Israꞌil bang aniyaꞌ palkalaꞌ sigām. Ati pasampayun baꞌanan palkalaꞌ itu ni Tuhan boꞌ kinataꞌuwan bang ai kahandakna. 20 Pataꞌuhun sigām pasal kasaraꞌan maka panohoꞌan Tuhan. Panduꞌin sigām pasal addat-tabiꞌat ya patut bineyaꞌ eꞌ sigām maka hinang ya wajib nihinang. 21 Subay ka isab ameneꞌ saga aꞌa min bangsa Israꞌil. Ya peneꞌnu subay aꞌa taga-pangitaꞌu, aꞌa magmatāw ma Tuhan, aꞌa kapangandolan ya mbal katambahan maka sīn. Buwanin sigām kapatut magmakōk ma pagkahi sigām dakompolan, sangpūꞌ ka ma dakompolan, limampūꞌ ka, dahatus ka, atawa dangibu. 22 Patꞌnnaꞌun sigām analassay palkalaꞌ ma saga aꞌa Israꞌil sakahabaꞌ llaw. Sagōꞌ bang palkalaꞌ landuꞌ ahunit, ya mbal takoleꞌ niusay eꞌ sigām, subay pinasampay ni kaꞌa. Bang palkalaꞌ aluhay-luhay, sigām ya analassay. Minnēꞌ palampung hinangnu pagka aniyaꞌ seheꞌnu magtabang. 23 Na, bang beyaꞌnu garaꞌku itu, maka bang panohoꞌan Tuhan du isab, mbal ka sakit ahusaꞌ. Magpoleꞌan isab baꞌanan saga aꞌa itu ma halam na aniyaꞌ makasasaw deyom atay sigām.”
24 Manjari bineyaꞌ eꞌ si Musa garaꞌ kamemon bay pangahūg matoꞌana inān ma iya. 25 Tapeneꞌ eꞌna saga lꞌlla taga-pangitaꞌu min saga bangsa Israꞌil. Pinatꞌnnaꞌ sigām magmakōk ma kompolan pagkahi sigām, aniyaꞌ magmakōk ma sangpūꞌ, aniyaꞌ ma limampūꞌ, aniyaꞌ ma dahatus, aniyaꞌ isab ma dangibu. 26 Binuwanan sigām kapatut analassay palkalaꞌ kahabaꞌ llaw. Bang palkalaꞌ aluhay-luhay, sigām ya analassay. Sagōꞌ bang palkalaꞌ ahunit, pinasampay ni si Musa.
27 Na, pinabaꞌid si Jetro eꞌ ayuwanna si Musa boꞌ pinatulak amoleꞌ ni lahatna.