19
Ma Būd Turusina
1-2 Na, makauntas paꞌin saga bangsa Israꞌil min Repidim, atꞌkka na sigām ni dakayuꞌ lahat, ōnna Paslangan Turusina. Angahinang sigām paghantiꞌan mainaꞌan ma deyoꞌan Būd Turusina. Sahali bulan ya katꞌkka sigām pinaꞌan, ma bulan katꞌlluna min bay kalaꞌan sigām min Misil.
3 Manjari itu patukad si Musa minnēꞌ boꞌ paharap ni Tuhan, ati nilinganan iya eꞌ si Yawe min būd, yuk-i, “Ya na itu pamissalanu ma saga aꞌa Israꞌil, hatina saga panubuꞌ si Yakub. 4 ‘Bay na taꞌndaꞌbi bang ai bay tahinangku ma saga bangsa Misil maka bang buwattingga eꞌku bay amowa kam piꞌitu ni aku. Ya pamowaku ma kaꞌam saliꞌ sapantun belleꞌ amowa baꞌanan anakna ma pikpikna. 5 Na buwattinaꞌan, aniyaꞌ pangalapalku ma kaꞌam. Bang kam ameyaꞌ toꞌongan ma panohoꞌanku maka amogbog ma paljanjiꞌanku maka kaꞌam, na, kaꞌam ya peneꞌku min deyom kabangsa-bangsahan kamemon ma babaw dunya. Manjari kaꞌam ya palsukuꞌanku landuꞌ ahalgaꞌ ma atayku. Sukuꞌku asal katilibut dunya itu, 6 sagōꞌ kaꞌam ya itungku bangsaku sussi maka tubuꞌan kaimaman maghinang ma aku.’ Na,” yuk Tuhan, “ya du ilu lapal-kabtangan ya pamissalanu ma saga aꞌa Israꞌil.”
7 Manjari palūd si Musa minnēꞌ ati sohoꞌna patimuk saga pagmattoꞌahan bangsa Israꞌil. Makatimuk paꞌin, pinasampay eꞌna ni sigām saga lapal-kabtangan kamemon ya sinōꞌ eꞌ Tuhan pangahakana ma sigām. 8 Na, dauyunan saga aꞌa Israꞌil inān kamemon ati anambung sigām magsama-sama. “Beyaꞌ kami ai-ai panohoꞌan si Yawe ma kitam.” Jari pinasampay eꞌ si Musa ni PANGHŪꞌ-Yawe ya panambung sigām.
9 Angallam giꞌ PANGHŪꞌ-Yawe ma si Musa, yukna, “Piꞌilu aku ni kaꞌa min gabun magdoꞌom-doꞌom boꞌ supaya takale suwalaku eꞌ saga aꞌa ilu hinabuku magsuli-suli maka kaꞌa. Ati tabowa sigām amꞌnnal toꞌongan ma kaꞌa sampay ni kasaumulan.”
Angahaka isab si Musa ma PANGHŪꞌ pasal bay pahꞌlling saga aꞌa heꞌ, 10 ati amissala PANGHŪꞌ ma iya, yukna, “Pehēꞌ na ka ni saga aꞌa ilu. Pasukuꞌun sigām ma aku llaw itu maka salung. Sohoꞌun sigām angandakdakan saga badjuꞌ sigām, 11 boꞌ supaya sigām asakap pagabut simuddai. Sabab simuddai ya llaw katulunku ni būd Turusina ma pangꞌndaꞌ sigām kamemon. Si Yawe aku, ya Tuhan-asal-Tuhan.” 12 Angallam giꞌ Tuhan-i. “Patꞌnnaꞌun gindan,” yukna, “boꞌ aniyaꞌ pangahāran saga aꞌa, maka sohoꞌun sigām kamayaꞌ-mayaꞌ. Subay halam aniyaꞌ min sigām paliyu minnaꞌan boꞌ patukad ni būd atawa paꞌabut ni deyoꞌanna. Bang gantaꞌ aniyaꞌ aꞌa paꞌabut atawa pagiꞌik ni būd itu, subay iya pinapatay. 13 Ya pamapatay ma iya subay batu atawa panaꞌ, mbal iya makajari niꞌntanan maka tangan. Ai na ka manusiyaꞌ, ai na ka hayop, bang paꞌabut ni būd, mbal manjari pinasagaran allum. Malaingkan, bang takale lling tanduk kambing tiniyup, yampa sigām makajari patukad ni atag būd eꞌ.”
14 Puwas eꞌ, makalūd paꞌin si Musa min būd, pinasukuꞌ eꞌna ni Tuhan saga aꞌa Israꞌil kamemon ati nirakdakan saga sꞌmmek sigām. 15 Amissala giꞌ si Musa, yukna, “Subay kam angamomos kamemon boꞌ kam sakap ma llaw simuddai. Daꞌa isab kam maghulid lꞌlla maka dꞌnda sampay apuwas min llaw inaꞌan.”
16 Na, pagsimuddai subu paꞌin, aniyaꞌ lꞌggon maka lāt, maka aniyaꞌ gabun magdoꞌom-doꞌom ma diyataꞌ būd eꞌ. Aniyaꞌ isab tanduk-kambing tiniyup, landuꞌ akosog llingna. Jari magpamidpid min tāw saga aꞌa kamemon ya ma pustu inān. 17 Na, minaliman saga aꞌa inān eꞌ si Musa, binowa paluwas min atag paghantiꞌan sigām eꞌ boꞌ paharap ni Tuhan. Jari inaꞌan sigām magtꞌnggehan ma deyoꞌan būd. 18 Aputus Būd Turusina eꞌ humbu sabab bay patulun pinaꞌan si Yawe ma deyom keyat api. Patꞌbbud humbu inān buwat humbu min lapohan landuꞌ aheya. Ajogjog isab katibuꞌukan būd, akosog jogjogna. 19 Ya pagtiyup tanduk-kambing inān pasōng na paꞌin kosogna, boꞌ pasōng. Amissala si Musa ati sinambungan iya eꞌ lꞌggon, ya na suwala Tuhan.
20 Inaꞌan asal si Yawe bay patulun ni puttuk Būd Turusina boꞌ lingananna si Musa sinōꞌ patukad pehēꞌ ni iya. Jari patukad magtūy si Musa 21 boꞌ aniyaꞌ pahꞌlling PANGHŪꞌ-Yawe ma iya. Yukna, “Palūd na ka pehēꞌ. Bandaꞌin saga aꞌa inān subay daꞌa paliyu min gindan ya pangahāran sigām, minsan buwattingga bayaꞌ sigām angꞌndaꞌ ma aku. Tantu aheka sigām amatay bang gantaꞌ paliyu. 22 Minsan saga imam, ya biyasa pasekot ma aku, subay anussi di-sigām. Bang sigām mbal ameyaꞌ, patꞌkkahanku sigām mulkaꞌ.”
23 Yuk si Musa ni PANGHŪꞌ, “Mbal makatukad saga aꞌa Israꞌil ni Būd Turusina itu sabab kaꞌa ya bay anohoꞌ kami amatꞌnnaꞌ jangkaꞌan ma sakalibutna. Būd itu subay nihalliꞌan boꞌ minulliya ma kaꞌa sadja.”
24 Ya sambung PANGHŪꞌ ma si Musa, “Palūd giꞌ ka amowa si Harun piꞌitu. Sagōꞌ daꞌa pasagarin saga kaimaman maka baꞌanan saga aꞌa paliyu min jangkaꞌan boꞌ piꞌitu angꞌndaꞌ ma aku. Bang sigām makaliyu, patꞌkkahanku sigām mulkaꞌ.” 25 Sakali palūd na si Musa ni deyoꞌan būd boꞌ pangahakana ma saga aꞌa ya lapal Tuhan eꞌ.