20
Sangpūꞌ Saraꞌ Panohoꞌan Tuhan
1 Manjari buwattitu saga lapal-kabtangan ya pamalman Tuhan, 2 “Aku si Yawe ya Tuhanbi, ya bay amowa kaꞌam palaꞌan min lahat Misil, lahat bay pamanyagaꞌan kaꞌam.
3 “Wajib kam daꞌa magtuhan saddī min aku.
4 “Wajib kam daꞌa angahinang tuhan-tuhan angaluwa ai-ai ma diyataꞌ langit, atawa ma gintanaꞌan, atawa ma tahik. 5 Wajib kam daꞌa pasujud atawa anumba ma baꞌanan tuhan-tuhan inān, sabab si Yawe aku, ya Tuhanbi. Abꞌnsi aku niagawan kapagtuhanku eꞌ sai-sai. Patꞌkkahanku katiksaꞌan sasuku anaikutan aku, papoleꞌku dusana ni saga anak-mpuna magpangkat-mamangkat sampay ni mpuna kengkeng. 6 Sagōꞌ sasuku magmalasa ma aku maka ameyaꞌ isab ma panohoꞌanku, patꞌkkaku lasaku tuman ma saga anak-mpuna sampay ni saga panubuꞌna magibu-ibuhan pangkat.
7 “Wajib kam daꞌa anabbut ōn si Yawe ya pagtuhananbi ma halam aniyaꞌ pūsna tantu, sabab itungku taga-dusa sasuku anabbut ōnku ma halam kapūsanna.
8 “Bogboginbi Llaw Paghali, pagka Llaw Mulliya tudju ni aku. 9 Makajari kam maghinang atawa magusaha ma deyom nnom llaw, 10 sagōꞌ ya llaw kapituꞌna wajib pinagmulliya pamudjibi ma aku ya Tuhanbi si Yawe. Subay halam aniyaꞌ ma kaꞌam maghinang ai-ai ma llaw inaꞌan-i. Ai na ka kaꞌam baranbi, ai na ka kaꞌanakanbi, ai na ka ipatanbi dꞌnda-lꞌlla, ai na ka hayopbi, subay toꞌongan pahali maghinang. Minsan aꞌa bangsa liyu ya pahantiꞌ ma lumaꞌbi, subay mbal isab maghinang. 11 Kalnaꞌ aku si Yawe ya Tuhanbi. Nnom llaw ya bay pamapanjariku langit maka dunya maka tahik, sampay kamemon isina. Sagōꞌ taꞌabut paꞌin llaw kapituꞌna, pahali na aku maghinang. Angkan minulliya eꞌku llaw inān, nihinang llaw pamaheyabi ma aku.
12 “Pagaddatinbi inaꞌ-mmaꞌbi boꞌ supaya atahaꞌ pangumulanbi ma lahat ya pamuwan kaꞌam eꞌ si Yawe ya Tuhanbi.
13 “Wajib kam daꞌa amonoꞌ ma pagkahibi manusiyaꞌ.
14 “Wajib kam daꞌa magjina.
15 “Wajib kam daꞌa anangkaw.
16 “Wajib kam daꞌa anaksiꞌ puting pasal pagkahibi manusiyaꞌ.
17 “Wajib kam daꞌa anganapsuhan lumaꞌ pagkahibi. Daꞌa kanapsuhinbi ai-ai sukuꞌ pagkahibi, ai na ka hꞌndana, ai na ka ipatanna dꞌnda-lꞌlla, ai na ka sapiꞌna atawa kuraꞌna.”
18 Na, magpamidpid min tāw baꞌanan aꞌa Israꞌil, pagka takale eꞌ sigām lꞌggon maka tanduk-kambing pinagtiyup pakosog. Taꞌndaꞌ isab eꞌ sigām lāt maka būd angahumbu. Angagad sadja sigām min kalawakan. 19 Yuk sigām ma si Musa, “Bang paꞌin kaꞌa sadja ya amissala ma kami, ati pakale du kami. Sagōꞌ daꞌa papagsuwalahun Tuhan ni kami, sabab makapatay koꞌ inān.”
20 Yuk si Musa ma sigām, “Daꞌa kam tināw. Sinulayan sadja kam eꞌ Tuhan bang buwattingga pameyaꞌbi ma iya. Kabayaꞌanna ma kaꞌam subay magmatāw ma iya supaya kam mbal makapagdusa.”
21 Jari angagad-ngagad giꞌ saga aꞌa kamemon inān min kalawakan. Luwal si Musa ya pasekot ni atag karoꞌom-doꞌoman ya patulunan Tuhan.
Hatulan pasal Pangarapan ni Tuhan
22 Sakali amalman giꞌ PANGHŪꞌ-Yawe ma si Musa, yukna, “Palatunun palmanku itu ni saga bangsa Israꞌil. Ya yuknu, ‘Kasaksiꞌanbi na in aku bay ahꞌlling ni kaꞌam min diyataꞌ langit. 23 Daꞌa pagtuhaninbi saga taꞌu-taꞌu ya hinangbi min pilak atawa min bulawan. Subay halam aniyaꞌ pagtuhananbi saddī min aku.
24 “ ‘Ya pangarapanbi ma aku subay tanaꞌ pinagtambak. Mainaꞌan ya pangulbananbi saga bili-bilibi maka kambing maka sapiꞌ ya sumbaliꞌbi boꞌ tinunuꞌ ma katibuꞌukanna. Maka mainaꞌan isab ya pagduwaꞌahanbi salamat. Maingga-maingga lugal ya peneꞌku panabbutanbi ōnku, piꞌilu du aku amuwanan kaꞌam kahāpan. 25 Bang kam saupama anambak batu pangarapanbi ma aku, subay batu halam bay pinagsapsapan, sabab batu bay kasapsapan asammal ma aku. 26 Lāgi, daꞌa kam angahinang haronan pariyataꞌanbi ni tambak batu ilu, sabab taꞌndaꞌ harapanbi hinabubi pariyataꞌ.’ ”