21
1 Na, angallam giꞌ Tuhan ma si Musa yukna, “Itiyaꞌ na baꞌanan saraꞌ panohoꞌanku ya subay palatunnu ni saga aꞌa Israꞌil.”
Saraꞌ Pasal Pangipat Ata
2 Yuk Tuhan, “Bang kam amꞌlli pagkahibi bangsa Hibrani nihinang ata, ya tꞌggolna maghinang ma kaꞌam subay mbal palabi min nnom tahun. Taꞌabut paꞌin tahun kapituꞌna subay iya paluhayaꞌunbi ma halam aniyaꞌ bayadna. 3 Bang ata halam taga-hꞌnda ma waktu kasōdna ni pangipatannu, patut iya dangan-danganna pinaluhaya. Damikiyanna bang ata bay makabowa hꞌnda, subay amowa hꞌndana isab ma waktu kaluwasna. 4 Bang aniyaꞌ isab ata bay pinahꞌndaꞌan eꞌ aꞌa paꞌatahanna, ati aniyaꞌ anakna dꞌnda-lꞌlla minnēꞌ, in anak-hꞌndana inān subay taitung sukuꞌ aꞌa paꞌatahanna heꞌ. Hal iya dangan-danganna pinaluwas. 5 Malaingkan, bang ata inān magsubali in iya alasa ma aꞌa paꞌatahanna sampay ma saga anak-hꞌndana, ati mbal bilahi pinaluhaya min pagatahanna, na buwatittu hatulanna: 6 in aꞌa inān subay binowa eꞌ nakuraꞌna ni lugal paghukuman.a Mainaꞌan paꞌin, subay iya pinabihing eꞌ nakuraꞌna ni tambol lawang atawa ni hāgna ati boꞌ nilowangan taingana. Pagka buwattēꞌ, tattap na iya maghinang ma aꞌa paꞌatahanna inān satꞌggolna allum.
7 “Na, bang aniyaꞌ aꞌa amabꞌllian anakna budjang nihinang ata, in dꞌnda inān mbal tapaluhaya buwat ata lꞌlla. 8 Bang iya mbal makasulut nakuraꞌna ya bay arak angāꞌ iya hꞌnda, in mattoꞌa dꞌnda heꞌ subay binuwanan lawang angalꞌkkat iya min pagatahan. Halam aniyaꞌ kapatut ma aꞌa paipatanna amabꞌllian iya ni aꞌa bangsa saddī, sabab kabalubahan bay janjiꞌna ma iya. 9 Bang saupama aniyaꞌ aꞌa amꞌlli dakayuꞌ budjang pamahꞌndana ma anakna, ya addatna tudju ni iya subay dasaliꞌ maka addatna ni anakna lissi. 10 Bang aꞌa isab maghꞌndaꞌan atana dꞌnda, boꞌ aniyaꞌ giꞌ dꞌnda saddī pagkaluꞌana, in hꞌndana poꞌon inān mbal manjari siniya-siya. Subay iya binuwanan ai-ai kapatutna, hatina pagkakan, panꞌmmek, paghulid maka hꞌllana. 11 Bang lꞌlla inān mbal gantaꞌ amuwanan iya ai-ai kapatutna, na, subay iya paluhayana ma halam aniyaꞌ bayadna.
Saraꞌ Pasal Pagbonoꞌ
12 “Sasuku angalaꞌugan pagkahina boꞌ amatay, aꞌa inān wajib subay pinapatay. 13 Sagōꞌ bang halam taniyat eꞌ aꞌa makabonoꞌ inān, tuꞌud gantaꞌanna min Tuhan, subay iya alahi ni lahat patapukan ya song peneꞌanku kaꞌam (Tuhan ya ahꞌlling). 14 Sagōꞌ bang aꞌa anganiyat amapatay aꞌa dangan boꞌ tapapatayna, aꞌa inān subay pinapatay minsan iya amalut ma tampat pagkulbanan ma aku. Laꞌaninbi iya minnēꞌ, papatayhunbi.
15 “Sai-sai angalaꞌugan mmaꞌna atawa inaꞌna subay pinapatay.
16 “Sai-sai taꞌabut bay anaggaw pagkahina manusiyaꞌ subay pinapatay. Minsan waꞌi pinabꞌllian aꞌa bay tasaggawna heꞌ, atawa minsan isab masi ma deyomanna, subay pinapatay.
17 “Sai-sai anuknaꞌan mmaꞌna atawa inaꞌna subay pinapatay.
18-19 “Bang aniyaꞌ duwangan aꞌa maglugat boꞌ dangan ya angalaꞌugan seheꞌna, buwat saga anuntuk atawa amꞌppok iya maka batu, aꞌa inān mbal kasāꞌan luwal bang amatay seheꞌna heꞌ. Bang iya hal tabowa palege ma pabahakanna, boꞌ makabungkal du sampay makalꞌngngan na ma luwasan lumaꞌ minsan magtungkud-tungkud, na, ya aꞌa bay angalaꞌug inān subay pinaꞌatas amayaran ai-ai pagtambal iya sampay kauliꞌan toꞌongan. Subay pinaꞌatas isab anganggantiꞌ usahana satꞌggolna mbal makausaha.
20 “Bang aniyaꞌ aꞌa angalubakan atana dꞌnda atawa lꞌlla, boꞌ amatay magtūy, subay iya sināꞌan. 21 Sagōꞌ bang ata inān mbal amatay sagōꞌ palege sadja saga duwa ni tꞌllungꞌllaw boꞌ yampa makabungkal, in aꞌa bay makalubak mbal kasāꞌan sabab atana asal, sukuꞌna.
22 “Bang aniyaꞌ saga aꞌa magsuntuk, boꞌ aniyaꞌ dꞌnda abꞌttong talapay ati tabowa anganak ma mbal giꞌ bulananna, sagōꞌ mbal ainay baranna, buwattitu hatulanna: ya aꞌa bay anganjudjal dꞌnda heꞌ subay pinaluwasan pangandiyat, pila-pila ya kabayaꞌan hꞌllana, bang paꞌin daꞌa palabi min diyat ya pangahād eꞌ saga kahuwisan. 23 Malaingkan bang dꞌnda ilu paliꞌan aheya, ya pangandiyat subay pinapagtongod maka paliꞌna. Bang paliꞌ makamatay, kamatay ya pangandiyat. 24 Bang mata ya magkaꞌat subay mata isab pangandiyat. Bang empon subay empon, bang tangan subay tangan, bang tapeꞌ subay isab tapeꞌ. 25 Bang tunuꞌ, subay tunuꞌ, bang bakat subay bakat, bang alom subay alom.
26-27 “Bang aniyaꞌ aꞌa angalaꞌugan atana, lꞌlla ka atawa dꞌnda, boꞌ magkaꞌat matana atawa emponna, in atana inān subay pinaluhaya paluwas min pagatahanna. Ya heꞌ pangandiyat ma matana atawa emponna.
28 “Bang aniyaꞌ aꞌa amatay tinanduk eꞌ sapiꞌ mandangan, ya sapiꞌ inān subay binantung sampay amatay. Isina mbal manjari kinakan, sagōꞌ tag-dapu mbal taluwaꞌ sināꞌan. 29 Malaingkan bang sapiꞌ heꞌ panananduk asal, boꞌ halam bay sinasak atawa niengkotan eꞌ tag-dapu minsan bay kasanggupan, na, saddī hatulanna. Bang sapiꞌ panananduk ya makapatay aꞌa, subay binantung. Maka tag-dapuna subay pinapatay isab. 30 Malaingkan bang bilahi saga usba-waris aꞌa ya patay tanduk eꞌ, in tag-dapu sapiꞌ makajari amuwan kasāꞌan gantiꞌ baranna supaya mbal pinapatay, pila-pila ya niamuꞌ eꞌ sigām. 31 Buwattēꞌ du isab bang ondeꞌ-ondeꞌ lꞌlla atawa dꞌnda ya amatay tinanduk eꞌ sapiꞌ. 32 Bang aniyaꞌ isab ata aꞌa amatay eꞌ sapiꞌ, ata lꞌlla ka atawa ata dꞌnda, ya tag-dapu sapiꞌ heꞌ subay amayad tꞌllumpūꞌ pilak tibuꞌuk.b
33 “Bang aꞌa angalaꞌanan tambol min lowang pagboheꞌan, atawa aꞌa bay angahinang lowang aheya boꞌ halam bay tambunanna, buwatittu hatulanna: bang aniyaꞌ hayop, sapiꞌ ka atawa kuraꞌ, ahūg pareyom, 34 aꞌa inān subay amayaran aꞌa tag-dapu hayop eꞌ. Jari sukuꞌ na ma iya in patay hayop eꞌ.
35 “Bang aniyaꞌ sapiꞌ lꞌlla ya sukuꞌ aꞌa dangan ananduk sapiꞌ lꞌlla dakayuꞌ boꞌ amatay, na buwattitu hatulanna: ya sapiꞌ allum subay pinabꞌllihan ati bꞌllihanna subay binahagiꞌ duwa ma duwangan tag-dapu heꞌ. Ya du isi sapiꞌ amatay heꞌ, subay binahagiꞌ duwa. 36 Arapun, bang kinataꞌuwan in sapiꞌ heꞌ panananduk asal, boꞌ halam bay sinasak atawa niengkotan eꞌ tag-dapuna, aꞌa inān subay anganggantiꞌan sapiꞌ amatay. Jari sukuꞌ na ma iya patay hayop eꞌ.”