22
Saraꞌ Pasal Tangkawan Altaꞌ
1 Angallam giꞌ Tuhan yukna, “Bang aniyaꞌ aꞌa makatangkaw sapiꞌ atawa bili-bili boꞌ sinumbaliꞌ eꞌna atawa pinabꞌllihan, na, buwattitu hatulanna: aꞌa inān subay pinatꞌnnaꞌan kasāꞌan. Bang dakayuꞌ du sapiꞌ bay tatangkawna, subay sapiꞌ lima hekana ya panganggantiꞌna ni aꞌa bay panangkawan. Bang dakayuꞌ du bili-bili, subay mpat bili-bili isab ya panganggantiꞌna.
2 “Bang aniyaꞌ pananangkaw taꞌabut parumpās ni deyom lumaꞌ aꞌa waktu sangom boꞌ binonoꞌ pinapatay, mbal karusahan aꞌa bay makabonoꞌ iya. 3 Sagōꞌ bang aniyaꞌ pananangkaw taꞌabut ma waktu llaw boꞌ yampa binonoꞌ pinapatay, aꞌa makabonoꞌ inān subay katōngan dusa sabab pagtuꞌuranna amapatay. Ai-ai tinangkaw subay ginantiꞌan eꞌ aꞌa bay makatangkaw, sagōꞌ bang halam ai-aina panganggantiꞌ, in iya baranna subay pinabꞌllihan nihinang ata, ati bꞌllihanna ya panganggantiꞌ ma aꞌa katangkawan.
4 “Bang aniyaꞌ dakayuꞌ hayop tinangkaw, boꞌ tabāk ma komkoman panangkaw ma halam bay niꞌinay, ya panangkaw inān subay amayad nilipat duwa. Hatina bang dakayuꞌ sapiꞌ atawa kuraꞌ atawa bili-bili ya tinangkaw, subay duwa hekana ya pamayad.
5 “Bang aꞌa magpakan saga hayopna ma tanaꞌ atawa ma kabbun boꞌ halam jagahanna pahāp ati waꞌi pehēꞌ saga hayop amangan pananom ma huma aꞌa saddī, na buwattitu hatulanna. Ya panganggantiꞌ tinanom magkaꞌat eꞌ subay pananom landuꞌ ahāp min huma tag-dapu hayop eꞌ.
6 “Bang aniyaꞌ angandokot api ma tanaꞌna, boꞌ pasuleyab keyatna ni sꞌggit sampay talapay tatunuꞌ saga tinanom maka anihan ya sukuꞌ aꞌa dakayuꞌ, na, buwattitu hatulanna: ya aꞌa makarokot tunuꞌ inān subay anganggantiꞌ ai-ai bay magkaꞌat.
7 “Bang aniyaꞌ aꞌa amatauꞌ sīn atawa altaꞌ ma seheꞌna, ati tatangkaw min lumaꞌ pagtatauꞌan inān, na, buwattitu hatulanna. Bang tasaggaw aꞌa bay makatangkaw, ya kasāꞌan ma iya subay halgaꞌ altaꞌ inān nilipat duwa. 8 Sagōꞌ bang mbal tabāk aꞌa bay makatangkaw, ya aꞌa pagtauꞌan altaꞌ inān subay binowa ni lugal paghuwisana boꞌ pinariksaꞌ pahāp bang iya ya bay angāꞌ altaꞌ heꞌ. 9 Tiyap-tiyap aniyaꞌ palkalaꞌ pasal pagdapu altaꞌ, ai na ka sapiꞌ, ai na ka kuraꞌ, ai na ka bili-bili, minsan isab badjuꞌ atawa ai-ai bay tapuwaꞌ, na, buwattitu hatulanna. Duwangan aꞌa magdapuhan altaꞌ inān subay binowa ni paghuwisan boꞌ sinalassay palkalaꞌ sigām. Manjari ya aꞌa taluwaꞌ hukuman saga huwis eꞌ subay pinatꞌnnaꞌan kasāꞌan. Ya pamayadna ma aꞌa dangan subay halgaꞌ altaꞌ inān nilipat duwa.
10 “Bang aniyaꞌ aꞌa amatauꞌ hayopna ma seheꞌna, buwat saga sapiꞌna, kuraꞌna atawa bili-bilina, boꞌ amatay atawa kapaliꞌan ma pagtauꞌan, atawa sinaggaw eꞌ aꞌa saddī, na, buwattitu hatulanna. 11 Ya aꞌa bay pangandolan subay pinasapa ma matahan si Yawe, in iya halam bay makainay hayop inān. Maka tag-dapu hayop inān subay ameyaꞌ sadja ma panapa seheꞌna heꞌ. Puwas isab iya min kasāꞌan pagka buwattēꞌ sapana. 12 Sagōꞌ bang hayop inān tatangkaw hinabuna ma deyoman aꞌa kapangandolan eꞌ, na, aꞌa inān subay anganggantiꞌ sabab iya ya bahalaꞌ. 13 Bang saupama hayop inān bay magkaꞌat eꞌ sattuwa, ya kapin patayna subay binowa pinaꞌndaꞌan ni huwis. Jari mbal iya sinōꞌ anganggantiꞌ.
14 “Bang aꞌa angindam hayop boꞌ amatay atawa kapaliꞌan ma halam mainaꞌan tag-dapuna, hayop inān subay ginantiꞌan eꞌ aꞌa bay angindam. 15 Sagōꞌ bang mainaꞌan asal tag-dapu hayop eꞌ, mbal pinagantiꞌ aꞌa bay makaindam. Ya balikna, bang hayop inān bay sinukayan, subay mbal pinagantiꞌ aꞌa bay anukay heꞌ. Panukayna ya taitung bayadna.”
Hatulan Saraꞌ Pasal Pagkahi Manusiyaꞌ
16 “Bang aꞌa amidjakan budjang magbihing maka iya, boꞌ budjang inān halam giꞌ taga-tunang, ya lꞌlla inān subay pinabayad ungsud. Manjari hꞌndana na. 17 Sagōꞌ bang mbal angahoꞌ mattoꞌa dꞌnda itu maka mbal tabowa magsulut, na, mbal nilanjalan pagkawin. Ya lꞌlla inān subay amayad kasāꞌan, pila-pila ya kataluwaꞌan pangungsud budjang.
18 “Dꞌnda maghihinang pantak atawa palkataꞌan subay pinapatay.
19 “Sasuku magdꞌnda maka hayop subay pinapatay.
20 “Sasuku magkulban atawa magtukbal ai-aina tudju ni pagtuhanan saddī min aku si Yawe, aꞌa inān subay pinapatay.
21 “Bang aniyaꞌ aꞌa bangsa liyu patꞌnnaꞌ ma lahatbi, daꞌa jahulakaꞌunbi sabab bangsa liyu isab kam waktu bay kapaglahatbi ma lahat Misil.
22 “Daꞌa kam angakkal ma balu dꞌnda atawa aniya-niya ma anak iluꞌ. 23 Bang sigām gantaꞌ talaꞌatbi boꞌ angamuꞌ-ngamuꞌ ni aku, tantu sigām tabangku. 24 Apasuꞌ atayku sampay amatꞌkkahan kaꞌam mulkaꞌ. Pasagaranta kam binonoꞌ eꞌ saga bantabi, manjari tabalu hꞌndabi, tailuꞌ anakbi.
25 “Bang kam magpautang sīn ma aꞌa miskin ya pagkahibi bangsa Israꞌil, daꞌa anakinbi sīn heꞌ. Daꞌa kam anengoran saga aꞌa ya magusahaꞌan sīn. 26 Bang aꞌa isab angutang sīn ni kaꞌam boꞌ anandaꞌ jubana, juba ilu subay tinūran ni iya kahabaꞌ kohap, song paꞌin pasꞌddop llaw. 27 Sababna halam aniyaꞌ pakꞌmmosna saddī. Bang mbal tūrannu ati angamuꞌ iya tabang ma aku, tantu iya kaleku sabab maꞌaseꞌ asal aku.
28 “Daꞌa toꞌongan kam ahꞌlling pangkal pasal Tuhan. Daꞌa kam anuknaꞌan pagbebeyaꞌanbi bangsa Israꞌil isab.
29 “Panukbalinbi aku min tinanom ya taꞌanibi, maka min boheꞌ anggul ya tapꞌggaꞌbi. Daꞌa kam atakal.
“Pamasukuꞌunbi ma aku anakbi lꞌlla siyaka. 30 Ya du isab saga anak lꞌlla ya dahū pinaganakan ma baꞌanan hayopbi. Ai na ka anak sapiꞌ, ai na ka anak bili-bili, ai na ka anak kambing, subay pamasukuꞌbi isab ma aku. Dapituꞌ ya pamaruruꞌbi ma inaꞌna, sagōꞌ taꞌabut paꞌin llaw kawaluꞌna, subay pagkulbaninbi aku.
31 “Kaꞌam ya bangsa palsukuꞌanku, angkan kam mbal makajari amangan isi hayop bay takeket eꞌ sattuwa talun. Gom paꞌin timaninbi pagkakan saga eroꞌ.”