23
Saraꞌ Pasal Kaul-Piꞌil Abontol
1 “Daꞌa kam amasaplag suli-suli ma halam aniyaꞌ kabꞌnnalanna. Daꞌa kam anaksiꞌ puting ma mundaꞌan saraꞌ pangandapitbi ma aꞌa alaꞌat jaguniꞌna. 2 Daꞌa kam ameyaꞌ maghinang kalaꞌatan ma saukat ya heꞌ kahinangan kahekaꞌan. Daꞌa kam pauyun anaksiꞌ puting ma kahekaꞌan aꞌa ma mundaꞌan saraꞌ. 3 Daꞌa bogboginbi aꞌa miskin bang tinandanan ni saraꞌ ma saukat miskin iya, luwal bang abontol pangandaꞌawana.
4 “Bang kam makalanggal sapiꞌ atawa kuraꞌ bay makapuwas min engkotna, subay tūranbi magtūy ni tag-dapuna, minsan iya bantabi. 5 Damikiyanna isab bang aniyaꞌ taꞌndaꞌbi kuraꞌ mbal makatꞌngge pagka kabuhatan eꞌ duwaꞌanna, daꞌa pasagarinbi. Tabanginbi tag-dapuna minsan ya aꞌa kabꞌnsihannu asal.
6 “Daꞌa pabengkokunbi hukuman ma aꞌa miskin bang aniyaꞌ palkalaꞌna ma saraꞌ. Pabontolunbi sadja. 7 Bang aniyaꞌ pagtunaꞌ nggaꞌi ka bꞌnnal, daꞌa kam palamud. Daꞌa kam amatꞌnnaꞌ hukuman kamatay ma aꞌa halam aniyaꞌ sāꞌna atawa dusana. Sabab mbal papuwasku aꞌa min dusana bang iya amatꞌnnaꞌ hukuman abengkok. 8 Kaꞌam saga aꞌa amalꞌngngan saraꞌ, daꞌa kam anambut tatambahan min aꞌa pinahukum ma kaꞌam. Sabab minsan saraꞌ abontol, bang pagkatambahan mbal ahāp eꞌna angusay palkalaꞌ. Nirustaꞌ eꞌna aꞌa abontol minsan bꞌnnal saksiꞌna.
9 “Bang aniyaꞌ aꞌa bangsa liyu patꞌnnaꞌ ma lahatbi, daꞌa jahulakaꞌunbi, sabab bangsa liyu isab kam, waktu bay kapaglahatbi ma lahat Misil.”
Saraꞌ Pasal Tahun Kapituꞌna
10 “Nnom tahun subay pagtanombi kahuma-humaꞌanbi maka paganibi isab saga buwaꞌna. 11 Sagōꞌ taꞌabut paꞌin tahun kapituꞌna, in tanaꞌ inān subay pinasagaran na ma deyom dantahun eꞌ. Daꞌa araruhunbi, daꞌa isab tanominbi. Jari ai-ai atomoꞌan di-na subay pamuwanbi ma saga pagkahibi miskin. Maka ai-ai halam takakan eꞌ sigām, pagkakan saga sattuwa talun na. Buwattēꞌ du isab ya saga poꞌonanbi anggul maka saga kakayuhanbi jaitun, subay pinasagaran pagkakan saga aꞌa miskin.
12 “Maghinang kam ma deyom nnom llaw, sagōꞌ taꞌabut paꞌin llaw kapituꞌna subay kam pahondong maghinang. Minnēꞌ aniyaꞌ llaw pamahali saga sapiꞌbi maka saga kuraꞌbi, sampay isab saga atabi maka aꞌa bangsa liyu ya paokom ma kaꞌam. Jari pahāp palasahan sigām pabīng.
13 “Beyaꞌunbi pahāp kamemon ya panohoꞌanku itu ma kaꞌam. Amay-amay, daꞌa taꞌatunbi saga pagtuhanan saddī min aku. Minsan ōn sigām subay mbal sabbutbi.”
Saga Paghinang Bangsa Israꞌil
14 Angallam giꞌ Tuhan, yukna, “Subay tꞌllu paghinang ya isbatbi na paꞌin pamaheyabi ma aku ma deyom dantahun.
15 “Kaissana, Paghinang Tinapay Halam Pasuligna. Hinangunbi paghinang itu ma bulan Abib, sabab ya na heꞌ bulan bay kalaꞌanbi min lahat Misil. Ma deyom pitungꞌllaw ya kapaghinangbi ma hinang itua subay tinapay halam taga-pasulig ya pagkakanbi, buwat bay panohoꞌanku ma kaꞌam.
“Ebot-ebot, bang kam angarap ni aku sumiyan-sumiyan, subay kam amowa tutukbalan.
16 “Karuwana, Paghinang Anihan Dahūb, ya pinaghinang ma waktu paganibi saga buwaꞌ tinanom ya dahū ajatu.
“Katꞌlluna, Paghinang Anihan Damuli, ya pinaghinang song paꞌin waktu paghaggut, waktu pagtimukbi kamemon saga buwaꞌ tinanom. 17 Manjari tꞌllu waktu ma deyom dantahun ya pangarap kamemon saga kalꞌllahanbi ma matahan si Yawe ya panghūꞌbi.”
18 Yuk Tuhan isab, “Bang kam magkulban susumbaliꞌan, daꞌa pabeyaꞌunbi pagkakan ai-ai taga-pasulig. Daꞌa tauꞌunbi lanab min kukulbanan kakanbi salung.
19 “Bang kam anagnaꞌ magani tinanom atawa magpusuꞌ buwaꞌ kayu, peneꞌunbi ya ahāp toꞌongan boꞌ bowahunbi ni Lumaꞌ Pangarapan ni si Yawe ya Tuhanbi.
“Bang kam anumbaliꞌ anak kambing boꞌ bꞌllabi, daꞌa lamurinbi gatas inaꞌna.”
Malaꞌikat Pinamalim ma Bangsa Israꞌil
20 Angallam giꞌ Tuhan, yukna, “Na! Itiyaꞌ sohoꞌku dakayuꞌ malaꞌikat anganjagahan kaꞌam ma lꞌngngananbi, ati pinasampay kam eꞌna ni lahat ya tagamahanku kaꞌam. 21 Kalehunbi bissalana, beyaꞌunbi isab panohoꞌanna. Daꞌa iya saggaꞌunbi sabab tantu kam mbal niampun eꞌna pagka inaꞌan ma iya kawasaku. 22 Bang iya kalebi pahāp, maka bang beyaꞌbi kamemon panohoꞌanku ma kaꞌam, bantahanku sasuku amantahan kaꞌam, atuhanku isab sasuku angatu ma kaꞌam. 23 Parahū min kaꞌam malaꞌikatku boꞌ kam tabowana tudju ni lahat ya paglahatan saga bangsa Amor, bangsa Hīt, bangsa Pirissi, bangsa Kanaꞌan, bangsa Hīb maka bangsa Jibus. Pahalamku saga bangsa inān kamemon. 24 Daꞌa kam pasujud atawa magsumba ma pagtuhanan saga bangsa inān, daꞌa kam palamud ma kahinangan sigām. Pakaꞌatunbi toꞌongan saga taꞌu-taꞌuc ya pagtuhanan sigām, podjakunbi isab saga batu paosol ya minulliya eꞌ sigām. 25 Taꞌatunbi aku, ya Tuhanbi Yawe. Jari buwananku kahāpan ma pagkakanbi maka ma paginumbi. Mbal kam katꞌkkahan saki. 26 Halam isab aniyaꞌ dꞌnda kapakpakan ma sakalibut lahatbi, anganak sigām kamemon. Patahaꞌku isab umulbi kamemon.
27 “Parahū aku min kaꞌam amakitāw saga kabangsa-bangsahan ya talanggalbi ma lahat inān. Palengogku pikilan sigām supaya sigām mbal makaꞌatu ma kaꞌam, gom paꞌin sigām pataikut boꞌ maglahian. 28 Bowaku saga bangsa Hīb, saga bangsa Kanaꞌan maka saga bangsa Hīt maglaꞌanan min dahuanbi, buwat sapantun aꞌa pinagkeket eꞌ tabungay. 29 Sagōꞌ mbal palaꞌanku saga aꞌa inān kamemon ma deyom dantahun sabab arikiꞌ giꞌ puhuꞌbi. Bang sigām gantaꞌ tinighan pinalaꞌan, tantu kam mbal makagaga. Apꞌnnoꞌ kahuma-humaꞌanbi eꞌ sꞌggit-manꞌggit, maka paheka na paꞌin baꞌanan saga sattuwa talun angalaꞌat kaꞌam. 30 Palaꞌanku saga bangsa inān painut-inut sampay kam paheka na, boꞌ kam makapagbayaꞌ ma lahat eꞌ.
31 “Manjari,” yuk Tuhan, “paluhaku lahat ya pamasukuꞌku ma kaꞌam. Tinagnaꞌan min Tahik Keyat sampay ni Tahik Pilistin,d min lahat paslangan isab tudju ni sapaꞌ Alpurati. Ndeꞌanku isab ni pagbayaꞌanbi saga kabangsa-bangsahan ya patꞌnnaꞌ mahēꞌ. Jari bang taꞌabut na waktuna, kaꞌam ya anꞌggal paluwas min lahat eꞌ. 32 Daꞌa kam amiha pagsulutan maka saga bangsa inān atawa pagtuhanan sigām. 33 Daꞌa pasagarinbi saga bangsa inān magdalahat maka kaꞌam boꞌ kam mbal tabowa-bowa eꞌ sigām angahinang dusa ni aku. Tantu kam tajallat palamud anumba saga pagtutuhanan sigām.”