24
Paljanjiꞌan Tuhan Pinahogot
1 Sakali itu, angallam giꞌ PANGHŪꞌ-Yawe ma si Musa, yukna, “Patukad ka ni aku. Pabeyaꞌun isab si Harun maka duwangan anakna si Nadab maka si Abihu, sampay saga pagmattoꞌahan bangsa Israꞌil pitumpūꞌ hekana. Kahekaꞌanbi ilu subay anumba ni aku min katāhan. 2 Kaꞌa Musa, subay dangan-dangannu sadja makasekot piꞌitu ni aku. Mbal makasekot saga seheꞌnu ilu. Ya du saga aꞌa Israꞌil inān, mbal isab makabeyaꞌ ma kaꞌa patukad ni diyataꞌ būd itu.”
3 Na, palūd pinaꞌan si Musa angahaka ni kahekaꞌan aꞌa inān pasal saga saraꞌ maka panohoꞌan kamemon bay pamalman eꞌ PANGHŪꞌ-Yawe. Pagkale sigām, magtūy sigām magdauyun anambung, yuk-i, “Beyaꞌ kami ya pamalman eꞌ si Yawe ilu.” 4 Manjari tasulat eꞌ si Musa saga saraꞌ panohoꞌan PANGHŪꞌ inān kamemon.
Pagdaiꞌ llaw paꞌin, abatiꞌ na si Musa boꞌ paluwas anambak batu ma bihing būd, nihinang pagtukbalan kulban. Angosol isab iya saga batu sangpūꞌ maka duwa hekana pamandogahan sangpūꞌ maka duwa bangsa Israꞌil. 5 Pagubus, magpanohoꞌan si Musa ma saga ondeꞌ bahaꞌu bangsa Israꞌil. Sinōꞌ sigām pinaꞌan anukbal kulban ni PANGHŪꞌ, saga susumbaliꞌan tinunuꞌ ma katibuꞌukanna. Aniyaꞌ isab saga anak sapiꞌ lꞌlla tinukbal eꞌ sigām pagduwaꞌa salamat. 6 Sinalud eꞌ si Musa lahaꞌ bay sinumbaliꞌ heꞌ. Santongaꞌ niꞌisi eꞌna ni saga pinggan aheya, santongaꞌ isab pinigsikan ni lugal pagkulbanan eꞌ.a 7 Puwas eꞌ niāꞌ eꞌ si Musa Sulat Paljanjiꞌan boꞌ binassa patanog ma saga ummat inān. Ya panambung sigām, “Beyaꞌ kami ai-ai bay pamalman eꞌ si Yawe, bogbogan kami panohoꞌanna.”
8 Na, pagka buwattēꞌ panambung sigām, niāꞌ eꞌ si Musa saga pinggan bay panaluranna lahaꞌ hayop ati pigsikanna ni saga ummat eꞌ. Yuk si Musa, “Lahaꞌ itu pamahogot paljanjiꞌan si Yawe, ya pinatꞌnnaꞌan kaꞌam labay min saga panohoꞌanna itu kamemon.”
9 Pagubus, patukad na disi Musa, si Harun, si Nadab maka si Abihu ni diyataꞌ būd, tabeyaꞌ isab saga pagmattoꞌahan bangsa Israꞌil pitumpūꞌ hekana. 10 Ma būd paꞌin, taꞌndaꞌ eꞌ sigām Tuhan ya pagtuhanan mboꞌ sigām si Israꞌil. Jari aniyaꞌ saliꞌ lantay luwa palmata bilu taꞌndaꞌ eꞌ sigām ma deyoꞌan tapeꞌna, datꞌllak maka langit. 11 Sagōꞌ halam niꞌinay eꞌ Tuhan saga pagmakōkan bangsa Israꞌil eꞌ. Taꞌndaꞌ iya eꞌ mata sigām hinabu sigām magduwaꞌa salamat.
12 Manjari itu ahꞌlling PANGHŪꞌ pabalik ma si Musa, yukna, “Patukad ka piꞌitu ni aku ni diyataꞌ būd itu. Maitu lagiꞌ ka boꞌ ka buwananku duwa batu amasagiꞌ. Itiyaꞌ tasulatku saga panohoꞌan ya pamanduꞌku ma saga ummat ilu.”
13 Magtūy magsakap si Musa maka tendogna si Yussaꞌ boꞌ patukad ni būd Tuhan. 14 Yuk si Musa ma saga pagmattoꞌahan bangsa Israꞌil, “Lagarinbi lagiꞌ kami maitu sampay kami makabīng piꞌitu. Ilu mailu ma kaꞌam si Harun maka si Hūr. Sigām ya analassay bang aniyaꞌ palkalaꞌbi.”
15 Na, makatukad paꞌin si Musa, katambunan Būd Turusina eꞌ gabun. 16 Patulun isab sahaya si Yawe ni pussuk būd eꞌ. Jari animpus gabun inān nnom llaw tꞌggolna. Taꞌabut paꞌin pitungꞌllaw, angalingan PANGHŪꞌ-Yawe ma si Musa min deyom gabun. 17 Malaingkan in sahaya si Yawe saliꞌ tunuꞌ aheya makalanduꞌ bang ma pangꞌndaꞌ saga bangsa Israꞌil. 18 Manjari itu, patukad na si Musa boꞌ pasōd ni deyom gabun, ati mpatpūꞌ bahangi ya katꞌnnaꞌna ma diyataꞌ būd eꞌ.