25
Lumaꞌ Tolda ya Pangarapan ni Tuhan
1 Jari mahēꞌ paꞌin ma diyataꞌ būd, angallam PANGHŪꞌ-Yawe ma si Musa, yukna, 2 “Sohoꞌun saga bangsa Israꞌil amowahan aku huhulmatan. Sambutun ai-ai pamuwan eꞌ sigām bang paꞌin hilas min deyom pangatayan sigām dangan maka dangan. 3 Buwattitu saga huhulmatan ya patut sambutnu min saga aꞌa inān: bulawan, pilak maka tumbaga, 4 salban walnaꞌ bilu, taluk maka keyat, kakanaꞌ poteꞌ ahāp hinanganna, maka bulbul kambing pangahinang kakanaꞌ. 5 Kuwit bili-bili lꞌlla isab bay nianjibihan keyat, maka kuwit duyung, kayu akasya, 6 nsꞌllan jaitun ma palitaꞌan, saga pamapā ya pamahamut nsꞌllan panganggꞌllal imam, maka ginisan pamapā kamanyan, 7 ginisan palmata isab pamalingkat epod maka puyuꞌ-daggaha ya panꞌmmek imam alanga.”
8 Yuk Tuhan isab, “Sohoꞌun saga bangsa Israꞌil angahinangan aku Lumaꞌ Sussi supaya aku makamailu ma sigām. 9 Ya pangahinangbi lumaꞌ itu maka kamemon kapanyapanna subay pasaliꞌ ni suntuꞌan ya song paꞌndaꞌanku ni kaꞌa.”
Baꞌul Paljanjiꞌan
10 Yuk Tuhan isab, “Sohoꞌun sigām angahinang baꞌul min kayu akasya, lima hꞌkkaa tahaꞌna, tꞌllu hꞌkka lambuna, tꞌllu hꞌkka isab langkawna. 11 Baꞌul itu subay pinutus deyom-luwasanna maka bulawan porol. Kakīranna isab subay pinalingkat maka gipis bulawan. 12 Hinangunbi mpat gallang bulawan boꞌ patliꞌunbi pehēꞌ ni tapeꞌ baꞌul inān, duwa gallang min bihing baꞌul dambilaꞌ, duwa isab min dambilaꞌ. 13 Hinangunbi saga tanggungan min kayu akasya, boꞌ putusinbi bulawan. 14 Tahinang paꞌin, pasulugunbi ni gallang ya ma bihing baꞌul boꞌ aniyaꞌ pananggungan. 15 Ya tanggungan itu mbal manjari nilaꞌanan min panuluganna. 16 Na pagubus, patꞌnnaꞌunbi ma deyom Baꞌul Paljanjiꞌan ya paltandaꞌan song pamuwanku ma kaꞌam.
17 “Hinangunbi turung sinasal min bulawan porol, lima hꞌkka tahaꞌna, tꞌllu hꞌkka lambuna. Turung Pagtaubatan koꞌ inān. 18-19 Sasalunbi isab duwa malaꞌikat pikpikanb min tōng turung karuwa, langkus bulawanna maka bulawan turung. 20 Saga malaꞌikat pikpikan itu subay pinapagharap maka subay angandomolan turung. In pikpik sigām subay pabꞌllat pariyataꞌ boꞌ makalandungan turung baꞌul. 21 Pagubus paꞌin, nnaꞌun ma deyom Baꞌul Paljanjiꞌan ilu ya sulat paltandaꞌan song pamuwanku ma kaꞌa, ati turungin. 22 Manjari pasabu aku ma kaꞌa, Musa, ma llotan duwa malaꞌikat pikpikan ya ma turung Baꞌul Paljanjiꞌan eꞌ. Piꞌilu du aku amasampay ni kaꞌa saga saraꞌ kamemon ya panohoꞌanku ma saga bangsa Israꞌil.”
Lamisahan Pamatꞌnnaꞌan Tinapay
23 Magkallam giꞌ Tuhan ma disi Musa yukna, “Hinangunbi lamisahan min kayu akasya, mpat hꞌkka tahaꞌna, duwa hꞌkka lambuna, tꞌllu hꞌkka isab langkawna. 24 Putusunbi maka bulawan porol, boꞌ palingkatunbi kīdna kaꞌmpat maka gipis bulawan. 25 Hinangunbi paga-paga daꞌmpāt-tangan lambuna ma sakalibut lamisahan eꞌ, boꞌ palingkatunbi isab maka bulawan gipis. 26 Hinangunbi mpat gallang bulawan boꞌ patliꞌunbi pehēꞌ ni mpat dugu lamisahan eꞌ, ma diyataꞌan saga tapeꞌna. 27 Pasekotun saga gallang eꞌ ni paga-paga boꞌ aniyaꞌ pamasulugan tanggungan bang nihangkut piꞌingga-piꞌingga. 28 Saga tanggungan ilu subay nihinang min kayu akasya pinutusan bulawan. 29 Damikiyanna isab saga kapanyapan ma Lumaꞌ Pangarapan, hinangunbi min bulawan porol, buwat saga laiꞌ, saga pinggan maka saga pangisihan binu-anggul ya binuꞌusan pangahulmat ma Tuhan. 30 Jari lamisahan ilu ya pamatꞌnnaꞌanbi Tinapay Hadaratc boꞌ aniyaꞌ ma matahanku sakahabaꞌ waktu.”
Palitaꞌan ma Deyom Lumaꞌ Pangarapan
31 Magkallam giꞌ Tuhan, yukna, “Anasal kam baran palitaꞌan min bulawan porol, dalos hinanganna min buliꞌna sampay ni batangna, beyaꞌ isab saga pinggan-pinggan ya pinagukilan saliꞌ luwa sumping.d 32 In batangna subay magsangae nnom, tꞌllu min dambilaꞌ batang, tꞌllu isab min dambilaꞌ. 33 Maka sangana inān subay nihinangan pinggan-pinggan saliꞌ luwa sumping almon, tꞌllu hekana ma saga sanga kaꞌnnom pakaniya-kaniya. 34 Ya du batang palitaꞌan, subay nihinangan pinggan-pinggan mpat hekana saliꞌ luwa sumping almon. 35 Jari aniyaꞌ dakayuꞌ pinggan-pinggan min deyoꞌ saga sanga panagnaꞌan, dakayuꞌ min deyoꞌ saga sanga tꞌngngaꞌan, dakayuꞌ isab min deyoꞌ sanga ma diyataꞌ. Nnom sangana kamemon. 36 Subay dalos hinangan palitaꞌan itu kamemon, baranna maka saga sumping-sumpingna maka saga sangana. Bulawan ponod ya pangahinang iya.
37 “Manjari, angahinang kam saga palitaꞌan maka sumbuhan pituꞌ hekana. Pagubus, patꞌnnaꞌunbi ma baran palitaꞌan boꞌ supaya patudju sawana ni dahuan. 38 Hinangunbi isab saga kapanyapan palitaꞌan, buwat saga sisipit pamahāp sumbuhan maka saga talam-talamna. 39 Ya buhat bulawan pangahinangbi palitaꞌan itu sampay kamemon saga panyapna subay tꞌllumpūꞌ maka mpat kilu. 40 Ebot-ebot,” yuk Tuhan ma si Musa, “beyaꞌun suntuꞌan bay paꞌndaꞌanku ma kaꞌa ma diyataꞌ būd itu.”