26
Lumaꞌ Pangarapan ni Tuhana
1 Na, amalman Tuhan ma si Musa, yukna, “Buwattitu ya pangahinangbi Lumaꞌ Pangarapan ni aku. Angahinang kam sangpūꞌ sugpat kultina landuꞌ ahāp kakanaꞌna pinaglamuran salban bilu, salban taluk maka salban keyat boꞌ ahāp luwana. Pabuldahinbi isab luwa malaꞌikat pikpikan ma aꞌa apanday magbubulda. 2 Saga sugpat kultina itu subay dasaliꞌ sukuranna kamemon, pitundꞌppa tahaꞌna maka dandꞌppa lambuna. 3 Jari lima sugpatna subay tinahiꞌ pinagbihing-bihing boꞌ tahinang dakayuꞌ kultina atibuꞌuk, damikiyanna lima sugpat takapin.b 4-6 Patahiꞌun tainga-tainga kakanaꞌ bilu ma bihing kultina aheya inān karuwa, hatina lima-limampūꞌ heka tainga-tainga maganggop-anggop. Pahinangun isab limampūꞌ kakansing bulawan pamarakayuꞌ duwa kultina inān supaya arakayuꞌ deyom Lumaꞌ Pangarapan ilu.
7 “Pagubus, pahinangun saga kultina min bulbul kambing, sangpūꞌ maka dda heka sugpatna pangalapis kultina deyom. 8 Saga sugpat itu subay dasaliꞌ sukuranna kamemon, tahaꞌna pitundꞌppa maka tongaꞌ, lambuna dandꞌppa. 9 In sugpat bulbul kambing itu subay tinahiꞌ pinagbihing-bihing isab, lima heka sugpat ma kultina dakayuꞌ, nnom heka sugpat ma kultina dakayuꞌ. Ya kultina nnom sugpatna subay pinasangon ma dahuan lumaꞌ tampal ni pagsosōran, maka sugpatna katapusan subay nilupiꞌ duwa. 10 Patahiꞌun tainga-tainga kakanaꞌ ma tōng kultina karuwa, lima-limampūꞌ hekana. 11 Pahinangun isab limampūꞌ kakansing tumbaga pamarakayuꞌ kultina bulbul kambing itu karuwa. 12 Na, pagka maglabi asal tōng kultina ya talupiꞌ duwa, subay patontonan di-na ma kōkan lumaꞌ. 13 Ya du tōng kultina ma bihing lumaꞌ karuwambilaꞌ, maglabi isab tongaꞌ sin tongaꞌ dꞌppa. Jari in labina itu subay paꞌabut ni tanaꞌ boꞌ katambunan kultina ya ma deyom. 14 Pahinangun duwa ginis turung isab panurung kaluhaꞌan tolda. Kuwit bili-bili lꞌlla nianjibihan keyat ya pangahinang turung itu dakayuꞌ, maka kuwit duyung ya pangahinang turung katapusan.c”
Dinding ma Lumaꞌ Pangarapan
15 Angallam giꞌ Tuhan ma disi Musa yukna, “Angahinang kam saga papagan dinding min kayu akasya pamarindingan Lumaꞌ Pangarapan. 16 Duwandꞌppa maka tongaꞌ langkawna, tꞌllu hꞌkka lambuna ma dakayuꞌ sugpat. 17 Saga papagan ilu kamemon subay nihinangan lagsak duwa hekana patuwaꞌ min deyoꞌanna. 18-21 Pahinangun duwampūꞌ heka papagan dinding ma dambilaꞌ lumaꞌ maka ma dambilaꞌ. Pasasalun isab mpatpūꞌ durukan hāg min pilak aponod, hatina duwa durukan ma papagan dakayuꞌ maka dakayuꞌ pamatukan lagsak eꞌ. 22 Hinangunbi isab nnom papagan pangandinding ma tōng lumaꞌ tampal ni sꞌddopan, 23 maka duwa papagan isab ma duguna karuwa. 24 Papagtapilun saga papagan ma dugu itu min deyoꞌ sampay pariyataꞌ. Diyataꞌna subay pinasulug ni dakayuꞌ gallang boꞌ mbal magpuklas. 25 Manjari waluꞌ heka papagan pangandinding ma kōkan lumaꞌ, sangpūꞌ isab maka nnom durukanna nihinang min dī pilak. Hatina duwa durukan ma saga papagan ilu dakayuꞌ maka dakayuꞌ.
26-27 “Angahinang kam saga batang-batang kayu akasya pamahogot dinding, lima-lima hekana ma bihing lumaꞌ karuwambilaꞌ, lima isab ma kōkan tampal ni sꞌddopan. 28 Ya batang-batang ma tꞌngngaꞌ dinding subay paꞌabut min tōng lumaꞌ dakayuꞌ ni dakayuꞌ. 29 Putusinbi bulawan saga papagan dinding sampay saga batang-batangna. Angahinang kam saga gallang bulawan isab pamasulugan saga batang-batang eꞌ.”
30 Angallam giꞌ Tuhan ma disi Musa, “Ya pangahinangbi Lumaꞌ Pangarapan ma aku subay pasaliꞌ toꞌongan ni suntuꞌan ya bay paꞌndaꞌanku kaꞌa ma diyataꞌ būd itu.”
Kultina Pangalikus Lumaꞌ Pangarapan Tuhan
31 Yuk Tuhan, “Hinangunbi dakayuꞌ kultina pangalikus deyom Lumaꞌ heꞌ, tampal ni kōkan. Kultina itu subay nihinang min kakanaꞌ landuꞌ ahāp, pinaglamuran salban bilu, salban taluk maka salban keyat. Pabuldahin isab luwa malaꞌikat pikpikan ma aꞌa apanday magbubulda. 32 Hinangunbi hāg mpat hekana min kayu akasya ati patꞌnggehun ma mpat durukan dī pilak. Putusunbi hāg ilu maka bulawan, pēꞌinbi isab saga sasabit bulawan panagnatan kultina. 33-34 Pagubus, pasagnatun kultina ilu min deyoꞌ saga kakansing bay pamarakayuꞌ duwa kultina pangatop. Jari in Lumaꞌ Pangarapan tabilik duwa na. Tampat Sussi ya pangōn bilik tampal ni pagsosōran, Tampat Mahasussi ya pangōn bilik ma liyu kultina tampal ni kōkan. Mainaꞌan ya pamatꞌnnaꞌanbi Baꞌul Pagtauꞌan Sulat Paljanjiꞌan, tinurungan asal maka turungna. 35 Ya lamisahan bulawan subay pinatꞌnnaꞌ ma luwasan kultina, ma bihing lumaꞌ tampal ni kowan. Ya palitaꞌan pituꞌ sangana subay pinatꞌnnaꞌ tampal ni gibang, maganggop maka lamisahan.
36 “Angahinang kam kultina panambol lawang pagsosōran ni Lumaꞌ. Hinangunbi min kakanaꞌ ahāp isina, binulda isab maka salban bilu, taluk maka keyat. 37 Hinangunbi lima hāg min kayu akasya pinutusan bulawan. Sasalunbi isab lima durukan tumbaga pamatꞌnnaꞌan saga hāg eꞌ. Pagubus, hinangunbi saga sasabit bulawan panagnatan kultina.”