27
Lamisahan Pagtunuꞌan Tutukbalan
1 Magpanohoꞌan lagiꞌ Tuhan ma si Musa, yukna, “Angahinang kam lapohan pagtunuꞌan kulban min kayu akasya. Magpasagiꞌ lambuna maka tahaꞌna sangpūꞌ hꞌkka saliꞌ-saliꞌ, nnom hꞌkka langkawna. 2 Hinangunbi pussuk-pussuk kayu ma mpat duguna, saliꞌ luwa tanduk. Kayuna subay dalos maka kayu ya pangahinangan baran lapohan. Jari putusunbi kamemonna maka dī tumbaga. 3 Hinangunbi isab baꞌanan kapanyapanna min tumbaga, buwat saga undam panaluran abu, saga kakagis, saga garul pangisihan lahaꞌ susumbaliꞌan, saga tutugsuk aheya, sampay saga pangisihan baga. 4 In lapohan ilu subay nihinangan pangayakan min tumbaga, maka gallang tumbaga isab ma duguna kaꞌmpat. 5 Pagubus, pasangonun pangayakan itu ni deyom baran lapohan min deyoꞌ paga-paga akiput, saga ma tongaꞌan kīdna. 6 Hinangun tanggungan isab min kayu akasya pinutus maka tumbaga 7 boꞌ pinasulug pehēꞌ ni gallang ma kīd lapohan karuwambilaꞌ bang subay nihangkut. 8 Beyaꞌunbi suntuꞌan lapohan bay paꞌndaꞌanku ma kaꞌa mainaꞌan lagiꞌ ma diyataꞌ būd. Hinangunbi min papan, luwana saliꞌ tuꞌung halam turungna.”
Halaman ma Lumaꞌ Sussi
9-13 Angallam giꞌ Tuhan ma si Musa, yukna, “Subay aniyaꞌ halaman ma sakalibut Lumaꞌ Pangarapan, tahaꞌna duwampūꞌ maka limandꞌppa, luhana sangpūꞌ maka duwandꞌppa maka tongaꞌ. Kultina landuꞌ ahāp kakanaꞌna ya panasak halaman itu, maka hāg nnompūꞌ hekana panagnatan kultina. Duwa-duwampūꞌ heka hāg min bihingna tampal ni uttalaꞌ maka ni satan, sangpūꞌ-sangpūꞌ isab min bihingna tampal ni sobangan maka ni sꞌddopan. Saga hāg itu kamemon subay nileboran maka pilak, maka subay nihinangan durukan min dī tumbaga. Pinēꞌan sasabit pilak isab panagnatan kultina.
14-15 “Ma sasak tampal ni sobangan, pahinangun duwa kultina lima-limandꞌppa tahaꞌna panasak halaman min karuwambilaꞌ lalabayan ya pagsōd-luwasan aꞌa. Subay tꞌllu hāg jukup maka durukanna min bihing lalabayan tampal ni kowan, tꞌllu isab tampal ni gibang. Hatina kulang-kulang mpat dꞌppa ya tahaꞌ sasak min karuwambilaꞌ.
16 “Hinangunbi kultina panambol pagsosōran halaman, limandꞌppa tahaꞌna. Ya pangahinangbi subay kakanaꞌ ahāp binuldahan maka salban bilu, taluk maka keyat. Subay aniyaꞌ hāg panagnatan kultina inān, mpat hekana jukup maka durukanna. 17 Kamemon saga hāg ma sasak inān subay nilebod maka lebod-lebod dī pilak, subay aniyaꞌ sasabitna isab nihinang min dī pilak. Tumbaga ya pangahinang saga durukan hāg eꞌ. 18 Duwampūꞌ maka mpat dꞌppa ya tahaꞌ halaman itu, sangpūꞌ maka duwandꞌppa luhana. Dandꞌppa maka duwa hꞌkka ya langkaw kultinana, ahāp isab kakanaꞌna. Aniyaꞌ isab durukan tumbaga ma baꞌanan saga hāgna. 19 Jari kapanyapan ai-ai ya ginuna ma Lumaꞌ Pangarapan itu nihinang min tumbaga. Ya du saga bale pangengkotan Lumaꞌ Pangarapan maka sasakna, tumbaga isab.”
Nsꞌllan Pangꞌnsꞌllan Palitaꞌan ma Lumaꞌ Sussi
20 Ahꞌlling giꞌ Tuhan ma si Musa yukna, “Sohoꞌun saga bangsa Israꞌil amowahan kaꞌa nsꞌllan jaituna halam aniyaꞌ sapalna boꞌ aniyaꞌ pangꞌnsꞌllan saga palitaꞌan boꞌ mbal magkapꞌdda keyatna. 21 Wajib si Harun maka saga anakna angayuput saga palitaꞌan ya patꞌnnaꞌ ma deyom Tolda Pagsasabuhanb min luwasan kultina ya pangalikus baꞌul isihan Sulat Paljanjiꞌan. Palitaꞌan ilu subay akeyat na paꞌin ma haddarat PANGHŪꞌ-Yawe min waktu abay kohap sampay ni kasubuhan. Subay bineyaꞌ panohoꞌan itu eꞌ saga bangsa Israꞌil kamemon magpangkat-mamangkat.”