28
Panꞌmmek Imam Alanga
1 Amalman giꞌ Tuhan ma si Musa, yukna, “Palinganin danakannu si Harun maka saga anakna lꞌlla, ya si Nadab, si Abihu, si Eleyasar maka si Itamar. Pasaddīhun sigām min pagkahi sigām bangsa Israꞌil boꞌ tahinang imam maghinang ni aku. 2 Pahinangin si Harun saga badjuꞌ alingkat ya tōp panꞌmmek imam alanga, supaya iya patut pinagmahaltabatan. 3 Bowahun magsuli-suli baꞌanan saga aꞌa ataꞌu magtahiꞌ ya bay buwananku kapandayan. Sōꞌun sigām angahinang saga badjuꞌ panꞌmmek si Harun, jari pabiddaꞌ iya min kahekaꞌan aꞌa ati tagꞌllal imam maghinang ni aku. 4 Buwattitu saga sꞌmmek ya pamahinangnu ma saga aꞌa magtatahiꞌ: kaissana puyuꞌ patꞌnnaꞌ ma daggaha, karuwana lampik sꞌmmek ya niōnan epod, katꞌlluna juba, kaꞌmpatna badjuꞌ buldahan, kalimana sulban, katapusanna kambot. Ya du ilu saga panꞌmmek ahalgaꞌ ya nihinangan danakannu si Harun maka saga anakna lꞌlla supaya sigām tagꞌllal imam maghinang ni aku. 5 Subay lubid-lubid bulawan maka salban bilu, taluk maka keyat ya ginuna eꞌ sigām, maka subay kakanaꞌ ahāp tꞌnnunanna.”
Pangahinang Epod
6 “Hinangun epoda min kakanaꞌ ahāp isina maka min lubid-lubid bulawan. Salban bilu, taluk maka keyat isab ya pangangguna eꞌ sigām ya apanday magbulda. 7 Epod itu subay tinahiꞌan duwa sablayan ma bahana karuwambilaꞌ boꞌ ahāp tꞌnnaꞌna ma baran imam. 8 Subay aniyaꞌ sambung ahāp hinanganna isab, nihinang min kakanaꞌ ahāp maka min lubid-lubid bulawan, boꞌ binulda maka salban bilu, taluk maka keyat. Sambung itu subay dalos asal maka baran epod.
9 “Pagubus, angāꞌ ka saga palmata onekb duwa hekana pangukilan ōn saga anak si Israꞌilc kasangpūꞌ maka duwa. 10 Subay pinagsunuꞌ-sunuꞌ pangumulan sigām, nnom ōn sigām ma palmata dakayuꞌ, nnom isab ma dakayuꞌ. 11 Paukilun pahāp ma aꞌa apanday maghinang palmata maka singsing. Sasalunbi isab duwa kaitd bulawan pamatꞌnnaꞌan duwa palmata ilu. 12 Manjari in duwa kait eꞌ subay pinasangon ma diyataꞌ sablayan epod boꞌ aniyaꞌ pangentoman saga anak si Israꞌil. Pagka buwattēꞌ, in ōn saga bangsa Israꞌil tatanggung eꞌ si Harun ma hadaratku,” yuk PANGHŪꞌ, “ati taentomku sigām. 13-14 Pasasalun duwa kait bulawan maka duwa kili-kili bulawan, tinabid-tabid saliꞌ luwa lubid. Jari in kili-kili itu subay pinaengkot ni kait eꞌ.”
Pangahinang Puyuꞌ-Daggaha
15 “Na,” yuk Tuhan, “pahinangun puyuꞌ-daggaha pangꞌndaꞌan kahandak Tuhan. Pahinangun ma aꞌa taga-kapandayan. Sohoꞌun pinasaliꞌ ni bay hinangan epod eꞌ, hatina kakanaꞌ ahāp isina pinaglamuran lubid-lubid bulawan, binuldahan isab maka salban bilu, taluk maka keyat. 16 Kakanaꞌ puyuꞌ itu subay nilupiꞌ duwa boꞌ amasagiꞌ dahꞌkka tahaꞌna, dahꞌkka isab lambuna. 17 Patꞌnnaꞌun saga palmata kaginisane sangpūꞌ maka duwa hekana ma dahuan puyuꞌ. Saga palmata itu subay pinagtād-tād mpat, tꞌllu-tꞌllu hekana ma dantād. Ya ma tād diyataꞌ subay rubi (palmata alutuꞌ keyatna), topas (palmata kuning), maka berel (palmata jaliꞌ-jaliꞌ). 18 Ya ma tād pasunuꞌ subay turkwis (palmata bilu magbꞌttik-bꞌttik), sappir (palmata alutuꞌ biluna), maka emeral (palmata alutuꞌ gaddungna). 19 Ma tād pasunuꞌ giꞌ subay jasint (palmata bilu magbꞌttik-bꞌttik), agat (palmata magjaliꞌ-jaliꞌ kausun maka poteꞌ), maka amitis (palmata taluk). 20 Ma tād deyoꞌ katapusan subay krisolit (palmata biyaning), onek (palmata kausun jaliꞌ-jaliꞌ), maka jasper (palmata intan gaddung). Bulawan ya pamakaitan saga palmata itu kamemon. 21 Manjari in sangpūꞌ maka duwa palmata itu subay niukilan saga ōn anak si Israꞌil lꞌlla, saliꞌ hantang ukilan singsing. Ōn aꞌa dakayuꞌ ma palmata dakayuꞌ pakaniya-kaniya.”
22 Ahꞌlling giꞌ Tuhan ma si Musa yukna, “Hinangun duwa kili-kili min bulawan tinabid-tabid boꞌ aniyaꞌ pangengkot puyuꞌ, 23-26 maka hinangun isab mpat singsing bulawan tinahiꞌ pehēꞌ ni mpat dugu puyuꞌ, min bukutna. Pagubus, engkotin tōng kili-kili bulawan inān ni duwa singsing puyuꞌ. Engkotin tōngna dakayuꞌ isab ni duwa kait ya pamatukan palmata boꞌ pasangon ni sablayan epod, min dahuan baha. 27 Hinangun lagiꞌ singsing bulawan saddī, duwa hekana isab, ati tahiꞌun ni tōng sablayan epod, ma atag sambungna. 28 In singsing puyuꞌ damuli itu subay niengkotan ni singsing epod maka lubid bilu boꞌ supaya mbal angalambe puyuꞌ min baran imam.
29 “Manjari itu,” yuk Tuhan, “sakahabaꞌ waktu kapasōd si Harun ni Tampat Sussi ma deyom Lumaꞌ Pangarapan aku, inaꞌan ma atag jantungna puyuꞌ ya pangꞌndaꞌan kahandakku. Inaꞌan isab mainaꞌan saga ōn anak si Israꞌil tabowa eꞌna pamaentoman aku, si Yawe. 30 Patꞌnnaꞌun isab in Urim maka Tummimf ma deyom puyuꞌ inān supaya tabowa ma atag jantung si Harun bang iya pasōd ni hadaratku sumiyan-sumiyan waktu. Jari aniyaꞌ ma iya pangꞌndaꞌan boꞌ tataꞌuna bang ai kahandakku,” yuk PANGHŪꞌ, “pasal saga bangsa Israꞌil.”
Kapanyapan Kaseheꞌ ya Panꞌmmek Imam
31 Amalman giꞌ Tuhan ma si Musa, yukna, “Buwattitu ya pangahinangbi juba pangalapis epod. Hinangunbi min kakanaꞌ bilu halam aniyaꞌ lamudna, 32 maka hinangin lowang ma tꞌngngaꞌna boꞌ aniyaꞌ pasulugan kōk aꞌa. Lowang itu subay sinulsi pahāp boꞌ mbal alꞌkkas ageseꞌ bang sinulug. 33-34 Paꞌari-arihun kumpiꞌ juba maka buwaꞌ-buwaꞌ dalimaꞌg nihinang min salban bilu, taluk maka keyat. Subay aniyaꞌ bagting-bagting bulawan isab pinagꞌllot-ꞌllot maka buwaꞌ-buwaꞌ heꞌ. 35 Wajib si Harun subay magsinꞌmmek juba itu hinabuna maghinang ni aku, jari takale lling bagting-bagting inān ma waktu kasōdna ni hadaratku ma Tampat Mahasussi. Takale isab ma waktu kaluwasna, ati mbal ya pinapatay. Aku si Yawe ya Tuhanbi.”
36 Ahꞌlling giꞌ PANGHŪꞌ ma si Musa, yukna, “Amasasal ka dakayuꞌ tapak-tapak dī bulawan niukilan maka kabtangan itu, ‘Sussi-manussi Pamasukuꞌ si Yawe.’ Ukilanna subay saliꞌ ukilan singsing. 37 Pasangonun lubid bilu ma tapak-tapak ilu pamaengkot iya ni dahuan imam. 38 Tapak-tapak inān subay pabatuk ma tuktuk si Harun, jari bang asāꞌ eꞌ saga aꞌa Israꞌil anukbal ai-ai, tatanggung eꞌ si Harun kasāꞌan sigām. In tapak-tapak inān subay paddas ma tuktukna sakahabaꞌ waktu boꞌ tataimaꞌ eꞌ PANGHŪꞌ-Yawe saga tutukbalan ummat Israꞌil.
39 “Patꞌnnunun kakanaꞌ ahāp isina nihinang badjuꞌ pamadjuꞌ si Harun, maka sulban isab maka sabitan. Sabitanna itu subay binuldahan eꞌ aꞌa magbubulda. 40 Ya du saga anak si Harun lꞌlla, subay nihinangan badjuꞌ maka sabitan maka porong, hatina panꞌmmek alingkat supaya sigām patut pinagmahaltabatan. 41 Pasulugun saga panꞌmmek itu ma danakannu si Harun (yuk Tuhan ma si Musa) maka ma saga anakna. Pagubus, busugin kōk sigām maka nsꞌllan jaitun boꞌ tagꞌllal imam. Pasukuꞌun sigām ma aku sadja supaya sigām makapaghinang ni aku.
42 “Pahinangin sigām sauwal-sauwal isab panambun harapan sigām min hawakan sampay ni paꞌa. 43 Wajib sigām subay magsulug sauwal-sauwal ilu sakahabaꞌ waktu kapasōd sigām ni deyom Tolda Pagsasabuhan,h atawa bang sigām pasekot pehēꞌ ni lapohan pagtukbalan ma Tampat Sussi boꞌ magimam ni aku mainaꞌan. Bang sigām gantaꞌ pasōd ma halam asauwal, dusa makapatay koꞌ inān. Panohoꞌan itu subay binogbogan eꞌ si Harun maka saga panubuꞌna salama-lama tahun.”