29
Kapanganggꞌllal ma Imam
1 Angallam giꞌ Tuhan ma si Musa, “Buwattitu hatulanna bang pasaddīnu disi Harun magimam tudju ni aku. Peneꞌun dakayuꞌ anak sapiꞌ lꞌlla maka duwa bili-bili lꞌlla halam aniyaꞌ sallaꞌna. 2 Ngāꞌunbi isab tirigu pinu halam aniyaꞌ pasuligna boꞌ hinangunbi tinapay maka mamun anahut kalamuran nsꞌllan, maka bāng-bāng anipis-nipis pinahiran nsꞌllan. 3 Nnaꞌun ai-ai itu ni deyom dakayuꞌ ambung boꞌ yampa tukbalin ni aku, pinapagbeyaꞌ maka sapiꞌ maka duwa bili-bili heꞌ. 4 Pagubus, bowahun si Harun maka saga anakna lꞌlla pehēꞌ ni atag pagsosōran Tolda Pagsasabuhan ati pandihun sigām maka boheꞌ. 5 Aubus paꞌin bay pinandi, pasꞌmmekin si Harun saga sꞌmmek imam. Dahū badjuꞌ, boꞌ juba, boꞌ epod isab maka puyuꞌ-daggaha. Pakambotin isab hawakanna maka sambung ya ahāp hinanganna heꞌ. 6 Pasulbanin kōkna boꞌ patꞌnnaꞌun tapak-tapak ni dahuwan sulban eꞌ. 7 Puwas eꞌ, angāꞌ ka nsꞌllan jaitun ya ginuna panganggꞌllal, boꞌ busugin pehēꞌ ni kōk si Harun. 8 Bowahun isab saga anak si Harun lꞌlla boꞌ pinasulugan saga badjuꞌ imam. 9 Paporongin kōk sigām maka pakambotin isab hawakan sigām. Buwattēꞌ ya panganggꞌllalnu disi Harun magimam, iya sampay saga anakna lꞌlla. Manjari tubuꞌan sigām magpangkat-mamangkat ya pinatꞌnnaꞌ magimam sampay ni kasaumulan.”
10 Ahꞌlling lagiꞌ Tuhan ma si Musa, yukna, “Na, ya sapiꞌ lꞌlla bay peneꞌnu subay pinasekot ni pagsosōran Tolda Pagsasabuhan. Bowahun si Harun maka saga anakna amatꞌnnaꞌ tangan sigām ma kōk sapiꞌ heꞌ, 11 boꞌ yampa sumbaliꞌun ma matahanku ma atag lawang Tolda Pagsasabuhan. 12 Angāꞌ ka lahaꞌ min bay tasaludnu boꞌ pahirun pehēꞌ ni saga dugu lapohan tumbaga.a Tōng tangannu ya pamahid. Buꞌusin isab saga lahaꞌ takapin nireyoꞌ lapohan eꞌ.
13 “Pagubus, ngāꞌun lanab sapiꞌ ilu kamemon, ya lanab amikit ma tinaꞌina, maka buliꞌ-atayna, maka kidninab karuwa jukup maka lanabna. Tunuꞌun pehēꞌ ni diyataꞌ lapohan tumbaga. 14 Sagōꞌ ya isi sapiꞌ maka kuwitna maka tinaꞌina subay tinunuꞌ ma luwasan pustu. Pagtaubatan koꞌ inān panganggantiꞌ paldusahan saga imam.”
15 Angallam lagiꞌ Tuhan, yukna, “Angāꞌ ka dakayuꞌ bili-bili lꞌlla min bay peneꞌnu ati bowahun si Harun maka saga anakna amatꞌnnaꞌ tangan sigām ma kōk bili-bili heꞌ. 16 Sumbaliꞌun magtūy, maka salurun lahaꞌna boꞌ pigsikun pehēꞌ ni mpat bihing lapohan tumbaga inān. 17 Pagubus, pagkꞌllot-kꞌllotun baran bili-bili heꞌ. Koseꞌin tinaꞌina maka saga tapeꞌna boꞌ bangkatun ni kōkna maka isina. 18 Manjari in baran bili-bili ilu subay tinunuꞌ ma katibuꞌukanna ma diyataꞌ lapohan tumbaga. Pagkulban tinunuꞌ koꞌ inān panukbalbi ni aku. Kasulutan isab aku ma hamutna,” yuk PANGHŪꞌ.
19 “Angāꞌ ka isab bili-bili dakayuꞌ, ati bowahun si Harun maka saga anakna amatꞌnnaꞌ tangan sigām ma kōkna. 20 Sumbaliꞌun boꞌ salurun lahaꞌna. Angakup ka dangkuriꞌ lahaꞌ boꞌ peherun pehēꞌ ni tōng tainga si Harun maka saga anakna, tampal ni kowan. Peherun isab ni dambilaꞌ bokol tangan sigām kowan maka ni bokol tapeꞌ sigām, kowan du isab. Pagubus, pigsikun lahaꞌ ni mpat bihing lapohan tumbaga heꞌ. 21 Angāꞌ ka isab lahaꞌ min bay pamigsikannu ni lamisahan, beyaꞌ isab saga nsꞌllan jaitun. Jari pigsikun ni disi Harun maka saga anakna, lapayun isab saga sꞌmmek sigām. Minnēꞌ sigām tasussi ma baran maka ma sꞌmmek, hatina sukuꞌ na sigām ma aku.
22 “Angāꞌ ka lanab min bili-bili karuwana sabab bili-bili panganggꞌllal imam koꞌ ilu. Angāꞌ ka lanab togelna, maka lanab ya amikit ma tinaꞌina, maka buliꞌ-atayna sampay saga kidnina karuwa jukup maka lanabna. Pabeyaꞌun isab paꞌana kowan. 23 Ameneꞌ ka tinapay min ambung ya patꞌnnaꞌ ma matahanku. Subay dakayuꞌ tinapay atibuꞌuk, dakayuꞌ mamun-mamun kalamuran nsꞌllan, maka dakayuꞌ bāng-bāng anipis, halam aniyaꞌ pasuligna kamemon. 24 Ndeꞌin saga tinapay ilu maka saga kꞌllotan bili-bili ni pangꞌntanan si Harun maka saga anakna. Paꞌangkatun kamemonna ma sigām pangahulmat ma aku, ya Tuhanbi si Yawe. 25 Pagubus, sambutun pabalik min tangan sigām boꞌ tunuꞌun pehēꞌ ni diyataꞌ lapohan pagtunuꞌan, beyaꞌ maka susumbaliꞌan ya tinunuꞌ ma katibuꞌukanna ati kasulutan aku ma hamutna. Pagkulban tinunuꞌ koꞌ inān panukbalbi ma aku, si Yawe. 26 Pagāꞌnu daggaha bili-bili bay sinumbaliꞌ panganggꞌllal ma si Harun, angkatun ma matahanku dahū pangahulmatnu ma aku, jari ma kaꞌa na.
27 “Pasukuꞌunbi ma aku dahū saga bahagiꞌ bili-bili ya palsukuꞌan disi Harun maka saga anakna, hatina daggaha maka paꞌa ya bay niangkat pangahulmat ma aku. 28 Buwattēꞌ lꞌngngananna salama-lama tahun bang aniyaꞌ susumbaliꞌan tinukbal pagduwaꞌa salamat ni si Yawe eꞌ saga aꞌa Israꞌil. Daggaha maka paꞌa subay pamasukuꞌ eꞌ saga bangsa Israꞌil pagkakan si Harun maka anak-panubuꞌna.
29 “Na, saga sꞌmmek pagimam si Harun inān subay pamusakaꞌ saga panubuꞌna, panꞌmmek sigām ma waktu pamatꞌnnaꞌ sigām magimam, waktu isab pamusug kōk sigām maka nsꞌllan jaitun. 30 Jari sasuku pinatꞌnnaꞌ magimam pasꞌlleꞌ min si Harun boꞌ pasōd ni deyom Tolda Pagsasabuhan maghinang ni aku ma Tampat Sussi, wajib subay magbinadjuꞌ sꞌmmek si Harun pitungꞌllaw tꞌggolna.
31 “Manjari angāꞌ na ka isi min bili-bili ya bay sinumbaliꞌ panganggꞌllal ma disi Harun. Lohoꞌin ma halaman Lumaꞌ Sussi 32 ati pamakanun ma si Harun maka saga anakna ma atag pagsosōran Tolda Pagsasabuhan. Kapin tinapay bay ma deyom ambung ya palauk. 33 Luwal sigām ya taga-kapatut amangan saga pagkakan ilu, sabab bay panukbal ni aku pagtaubatan dusa sigām ma waktu kapanganggꞌllal sigām magimam. Sukuꞌ Tuhan koꞌ inān angkan halam sai-na makajari amangan saddī min disi Harun. 34 Bang isab aniyaꞌ isi bili-bili atawa tinapay angapin sampay ni kasubuhan, subay tinunuꞌ. Mbal manjari kinakan sabab bay pinama-Tuhan.
35 “Na,” yuk Tuhan ma si Musa, “beyaꞌun hatulan kamemon ya panohoꞌanku itu pasal panganggꞌllal ma si Harun maka saga anakna. Paghinang ilu subay pitungꞌllaw tꞌggolna. 36 Anumbaliꞌ ka sapiꞌ lꞌlla kahabaꞌ llaw ma deyom dapituꞌ. Pagkulban panaubatan dusa koꞌ inān, maka pamalaꞌan tamak dusa isab min lapohan pagtunuꞌan. Busugin isab maka nsꞌllan pamasussi boꞌ pinama-aku sadja. 37 Subay pitungꞌllaw ya tꞌggolbi maghinang saga hinang itu magbalik-balik, hinang pamalaꞌan tamak dusa maka hinang pamasussi. Manjari asussi sidda lapohan itu, maka asussi isab ai-ai makasagid pehēꞌ.”
Susumbaliꞌan ya Tinukbal Kahabaꞌ Llaw
38-39 Amalman lagiꞌ Tuhan ma si Musa, yukna, “Ya panukbalbi ni aku ma lamisahan pagtunuꞌan subay duwa anak bili-bili dantahun umulna. Dakayuꞌ ilu subay tukbalbi ma aku ma waktu subu, dakayuꞌ isab ma abay kohap. Buwattēꞌ hinangbi sakahabaꞌ llaw. 40 Pabeyaꞌunbi ma bili-bili subu dagantang tirigu pinu kalamuran dalitru nsꞌllan jaitun. Tumpahinbi isab dalitru binu-anggul pangahulmatbi ma aku. 41 Damikiyanna bili-bili dakayuꞌ ya tinukbal abay-kohap, subay pinabeyaꞌan tirigu maka binu-anggul. Pagkulban tinunuꞌ koꞌ inān ya panukbalbi ma aku, si Yawe, jari kasulutan aku ma hamutna.
42 “In pagkulban tinunuꞌ itu subay tinukbal ma matahanku kahabaꞌ llaw, ma dahuan Tolda Pagsasabuhan. Subay tinukiran eꞌbi magpangkat-mamangkat. Mailu aku pasabu ma kaꞌa, Musa, maka eꞌku amissala ma kaꞌa. 43 Mailu du isab aku magsabu maka saga bangsa Israꞌil kamemon. Jari asussi makalanduꞌ atag pagsabuhan inān pagka taluwaꞌ sahayaku.
44 “Pasussiku Tolda Pagsasabuhan ilu sampay lapohan ya pagtunuꞌan kulban eꞌ. Pasussiku du isab si Harun maka saga anakna lꞌlla, supaya sigām tahinang imam maghinang ni aku. 45 Jari patꞌnnaꞌ aku ma deyoman saga bangsa Israꞌil ati aku ya pagtuhanan sigām. 46 Minnēꞌ sigām makataꞌu toꞌongan in aku si Yawe ya pagtuhanan sigām, ya bay amowa sigām paluwas min lahat Misil boꞌ supaya aku patꞌnnaꞌ ma deyoman sigām. Si Yawe aku, ya Tuhan-asal-Tuhan.”