30
Pagtugtugan Kamanyan
1 Magpanohoꞌan giꞌ Tuhan ma si Musa yukna, “Angahinang kam lamisahan min kayu akasya, pagtugtugan kamanyan. 2 Subay amasagiꞌ duwa hꞌkka tahaꞌna maka lambuna, mpat hꞌkka isab langkawna. Hinangin pussuk-pussuk saliꞌ luwa tanduk ma duguna kaꞌmpat, dalos asal kayuna maka kayu ya pangahinangan baran lamisahan. 3 Putusun diyataꞌna maka bulawan porol, beyaꞌ isab kīdna maka pussuk-pussukna kaꞌmpat. Pehēꞌin gipis bulawan isab ma kakīranna pamahāp luwana. 4 Hinangun duwa gallang bulawan pinasangon pehēꞌ ni kīd lamisahan min deyoꞌan gipis eꞌ, dakayuꞌ min dambilaꞌ, dakayuꞌ isab min dambilaꞌ boꞌ aniyaꞌ pamasulugan tanggungan. 5 Saga tanggungan itu subay nihinang min kayu akasya pinutus isab maka bulawan. 6 Patꞌnnaꞌun lamisahan itu min luwasan kultina ya pangalikus Baꞌul Pagtauꞌan Sulat Paljanjiꞌan, boꞌ min luwasan Turung Pagtaubatan isab. Mainaꞌan aku pasabu ma kaꞌa.
7 “Na, ya hinang si Harun ma waktu pamahilalaꞌna saga palitaꞌan kahabaꞌ subu, subay anugtug kamanyan ahamut ma lamisahan inān. 8 Ya du kahabaꞌ abay-kohap, ma waktu panūꞌna palitaꞌan, subay anugtug kamanyan isab supaya aniyaꞌ patꞌbbud ni PANGHŪꞌ waktu ni waktu salama-lama tahun. 9 Daꞌa kam anukbal kamanyan saddī min kamanyan halal ma lamisahan panugtugan ilu. Mbal manjari bang panukbalan saga susumbaliꞌan tinunuꞌ, atawa tirigu, atawa binu-anggul. 10 Lamisahan ilu subay paghinangan taubat eꞌ si Harun mintꞌdda dantahun boꞌ taꞌampun baꞌanan karusahan bangsa Israꞌil. In pussuk-pussukna kaꞌmpat subay pinahiran lahaꞌ min hayop ya sinumbaliꞌ pagtaubatan dusa min tꞌdda dantahun. Bogboginbi paghinang itu kahabaꞌ tahun magpangkat-mamangkat sabab lamisahan landuꞌ asussi koꞌ ilu, lamisahan sukuꞌ PANGHŪꞌ-Yawe.”
Panungbas Kallum Saga Kalꞌllahan
11 Na ahꞌlling giꞌ PANGHŪꞌ ma si Musa, yukna, 12 “Bang ka angitung saga kalꞌllahan bangsa Israꞌil, subay aniyaꞌ bayad pakaniya-pakaniya min sigām kamemon panungbas kallum sigām. Jari halam aniyaꞌ balaꞌ tumꞌkka ni sigām ma waktu kapangitung eꞌ. 13 Pabayarun tongaꞌ sekela dī pilak ma sigām pakaniya-kaniya bang sigām niꞌitung na, panukbal sigām ni PANGHŪꞌ. (Timbangan saraꞌ agama ya pagtimbangan eꞌ.) 14 Taluwaꞌ niꞌitung saga kalꞌllahan kamemon ya angabut duwampūꞌ tahun umulna sampay pariyataꞌ. Wajib sigām subay angꞌndeꞌan tutukbalan ni PANGHŪꞌ. 15 Ya tungbas kallum tinukbal ni PANGHŪꞌ eꞌ aꞌa dayahan subay mbal palabi min tongaꞌ sekel. Ya tinukbal eꞌ aꞌa miskin isab subay mbal pakulang min tongaꞌ sekel. 16 Timukun sīn panungbas kallum itu boꞌ panganggastuhun ai-ai tahinang ma Tolda Pagsasabuhan. Manjari aniyaꞌ pangentoman ma matahan si Yawe, paltandaꞌan in kaꞌam bay makatungbas kallumbi.”
Garul Pagailan
17 Pagubus inaꞌan, ahꞌlling giꞌ PANGHŪꞌ-Yawe ma si Musa yukna, 18 “Angahinang kam dakayuꞌ garul tumbaga pagailan saga imam. Hinanginbi isab patinggilan pamatꞌnnaꞌan iya, tumbaga isab. Ya pamatꞌnnaꞌanbi garul itu subay ma llotan Tolda Pagsasabuhan maka lamisahan pagkukulbanan. Isihinbi boheꞌ isab. 19 Si Harun maka saga anakna subay magailan tapeꞌ-tangan sigām 20 ma waktu kapasōd sigām ni deyom Tolda Pagsasabuhan Tuhan maka manusiyaꞌ. Jari mbal sigām taluwaꞌ pinapatay. Buwattēꞌ du isab bang sigām pasekot ni lamisahan pagkukulbanan boꞌ anunuꞌ susumbaliꞌan ni aku,” yuk PANGHŪꞌ. 21 “Tangan maka tapeꞌ sigām subay niailan boꞌ supaya sigām mbal amatay. Panohoꞌan itu subay binogbogan eꞌ si Harun maka saga panubuꞌna magpangkat-mamangkat.”
Nsꞌllan Pamehed Ai-ai Pinasukuꞌ ma Tuhan
22 Ahꞌlling isab PANGHŪꞌ ma si Musa yukna, 23-24 “Angahinang kam nsꞌllan sussi min nsꞌllan jaitun mpat litru. Lamurinbi isab mpat ginis pamapā pamahamut iya. Issa, bulitik mūrb masi boheꞌan, saga nnom kilu buhatna bang ma timbangan saraꞌ agama. Karuwana, kuwit kayu sinamunc ahamut saga tꞌllu kilu buhatna. Katꞌlluna, batang parang ahamut tꞌllu kilu isab buhatna. Kaꞌmpatna, kuwit kayu kassiya nnom kilu buhatna, ahamut isab. 25 Papaglamurunbi saga kapanyapan itu kamemon nihinang nsꞌllan ahamut landuꞌ asussi, boꞌ aniyaꞌ pamehed ai-ai pamasukuꞌ ma Tuhan. Beyaꞌunbi kapandayan saga aꞌa ataꞌu angahinang pahamut. 26 Gunahun nsꞌllan sussi itu panussi Tolda Pagsabuhan sampay kamemon saga pagdayawna. Lapayun Baꞌul ya Pagtauꞌan Sulat Paljanjiꞌan, 27 maka lamisahan pamatꞌnnaꞌan tinapay sampay kapanyapanna, maka palitaꞌan bulawan beyaꞌ isab panyapna, maka lamisahan panugtugan kamanyan. 28 Ya du lapohan pagtunuꞌan kulban sampay kapanyapanna kamemon, maka garul pagailan isab sampay patꞌnnaꞌanna. 29 In itu kamemon subay pinehēꞌan nsꞌllan sussi supaya asussi toꞌongan, manjari sukuꞌku na. Bang aniyaꞌ isab makasagid ni ai-ai bay tasussi itu, subay sukuꞌku na.”
30 Yuk Tuhan lagiꞌ, “Busugin nsꞌllan kōk disi Harun maka saga anakna, paltandaꞌan in sigām ma aku sadja, jari imam na sigām patut maghinang ma aku. 31 Pahatiꞌun saga bangsa Israꞌil in nsꞌllan sussi itu subay aheya kagunahanna ma kaꞌam sampay ma panubuꞌbi magpangkat-mamangkat. 32 Daꞌa pamahirunbi ma baran sai-na saddī min imam, daꞌa isab sengorinbi hinanganna. Sukuꞌ Tuhan koꞌ ilu, angkan subay halliꞌanbi. 33 Bang aniyaꞌ aꞌa saddī angahinang nsꞌllan pahamut buwattitu hinanganna, atawa pamahidna ma aꞌa saddī min imam, in aꞌa inān mbal na taitung bangsa Israꞌil.”
Kamanyan ma Lumaꞌ Pangarapan
34 Angallam lagiꞌ PANGHŪꞌ-Yawe ma si Musa yukna, “Buwattitu ya pangahinangbi kamanyan. Angāꞌ kam duwa ginis bulitik ahāp isina maka hamutna, maka kuwit kūs-kūs maka kamanyan poteꞌ. Buhatna kaniya-kaniya subay dasaliꞌ kamemon. 35 Taꞌāꞌbi paꞌin ai-ai itu, beyaꞌunbi kapandayan saga aꞌa ataꞌu angahinang pahamut. Paglamurunbi boꞌ tahinang kamanyan ahāp toꞌongan hamutna. Pagubus, asininbi supaya alꞌssin maka asussi. 36 Pipisun kaseheꞌanna nihinang kamanyan anahut boꞌ patꞌnnaꞌun ma dahuan Baꞌul Paljanjiꞌan ya ma deyom Tolda Pagsasabuhan. Mailu du aku magsabu maka kaꞌa. Kamanyan itu subay taitungbi sussi min sussi sabab sukuꞌku asal. 37 Wajib kam daꞌa angahinang kamanyan buwattitu pamahamut baranbi. Niyatunbi kamanyan sussi ma aku sadja. 38 Sasuku angahinang kamanyan buwattitu lamudna boꞌ pamahamutna baranna, mbal na taitung bangsa Israꞌil.”