31
Saga Aꞌa Tapeneꞌ Angahinang Lumaꞌ Pangarapan
1 Na, angallam lagiꞌ PANGHŪꞌ-Yawe ma si Musa yukna, 2 “Pataꞌu ka. Ya tapeneꞌku angahinang Lumaꞌ Pangarapan ma aku ya na si Besalel anak si Uri, mpu si Hūr, min panubuꞌ si Yahud. 3 Katulunanku iya kapandayan, akkal maka pangitaꞌu boꞌ ahāp eꞌna angahinang ai-ai ya hinangan tangan. 4 Ataꞌu iya angangguhit suntuꞌan ma ai-ai tahinang min bulawan, pilak atawa tumbaga. 5 Ataꞌu iya anganggaugariꞌ ginisan palmata boꞌ yampa patꞌnnaꞌna ma kait bulawan. Ya du bang kayu ya pangahinanganna, ataꞌu isab iya. Hatina ataꞌu iya angahinang indaginis. 6 Tapeneꞌku isab si Oholeyab anak si Ahisamak, min bangsa Dān, boꞌ aniyaꞌ seheꞌ si Besalel anabangan iya ma hinangna. Ahoꞌ, buwananku kapandayan kamemon saga aꞌa maghihinang supaya sigām makahinang ai-ai bay panohoꞌanku ma kaꞌa, ya tasulat ma lista itu: 7 Tolda Pagsasabuhan, Baꞌul Pagtatauꞌan Sulat Paljanjiꞌan maka Turungna ya pagtaubatan dusa, maka kapanyapan ai-ai ya pamapanyap Tolda. 8 Lamisahan pamatꞌnnaꞌan tinapay maka panyapna, Palitaꞌan Bulawan maka panyapna, Lamisahan pagtugtugan kamanyan. 9 Lapohan pagtunuꞌan kulban, beyaꞌ isab kapanyapanna. Garul pangailan sampay patinggilanna. 10 Saga sꞌmmek mulliya ya tinꞌnnun panꞌmmek disi Harun maka saga anakna ma waktu kapagimam sigām. 11 Katapusan ya Nsꞌllan sussi panganggꞌllal ma saga aꞌa maghinang ni Tuhan, maka kamanyan ahamut ya kagunahan ma Lumaꞌ Sussi. In itu kamemon subay nihinang eꞌ saga aꞌa ya katulunan akkal maka kapandayan. Subay bineyaꞌ bay panohoꞌanku ma kaꞌa, Musa.”
Saraꞌ Pasal Llaw Paghali
12 Na, angallam PANGHŪꞌ-Yawe ma si Musa yukna, 13 “Pasampayun palmanku itu ni saga bangsa Israꞌil, ya yuk-i, ‘Wajib kam amogbog ma llaw ya ōnanku Llaw Mulliya. Jari in pangammalbi ma llaw mulliya tahinang pandoga pamaentom kaꞌam magtubuꞌ-manubuꞌ in aku maka kaꞌam bay makapagjanjiꞌ. Jari makataꞌu kam in aku si Yawe, ya makahinang kaꞌam bangsa sussi, bangsa sukuꞌku.’ Buwattēꞌ ya pamasampaynu ma sigām.”
14 Angallam giꞌ Tuhan yukna, “Bogboginbi Llaw Paghali, sabab Llaw Mulliya ma kaꞌam. Sasuku mbal angammal ma Llaw Mulliya subay pinapatay. Sasuku isab makahinang ai-ai ma llaw inaꞌan, subay itungbi saliꞌ aꞌa liyu, nggaꞌi ka bangsa Israꞌil. 15 Nnom llaw ya pamihabi kalluman ma deyom dapituꞌ, sagōꞌ bang taꞌabut llaw kapituꞌna, ya na llaw paghali, Llaw Mulliya pamaheyabi ma aku. Sasuku maghinang ai-ai ma llaw inaꞌan, subay pinapatay. 16 In kaꞌam bangsa Israꞌil magtubuꞌ-manubuꞌ subay amogbog ma Llaw Mulliya itu boꞌ mbal takalipat paljanjiꞌantam ya anatas salama-lama. 17 In Llaw Mulliya itu saliꞌ pandoga pamaentom kaꞌam ni kasaumulan in aku maka kaꞌam bay makapagjanjiꞌ. Sababna nnom llaw ya bay kapamapanjariku dunya maka langit. Sagōꞌ taꞌabut paꞌin llaw kapituꞌna, pahali na aku min hinangku.”
18 Na, aubus paꞌin pangallam PANGHŪꞌ ma si Musa ma diyataꞌ Būd Turusina, magtūy pamuwanna ma iya duwa batu amasagiꞌ ya bay pangukilanna Saraꞌ paljanjiꞌanna maka bangsa Israꞌil.