32
Sapiꞌ Bulawan
1 Manjari itu, pagka tasayu eꞌ saga aꞌa Israꞌil in si Musa atꞌggol halam bay makalūd min būd, patimuk sigām pehēꞌ ni si Harun. Yuk sigām ma iya, “Tuwan, hinangin kitam tuhan boꞌ aniyaꞌ magmundaꞌ ma kitam ma palꞌngnganan. Daka maingga si Musa inān, ya bay amowa kitam paluwas min Misil.”
2 Anambung si Harun ma sigām, yukna, “Ā, sōꞌun nilaꞌanan saga bulawan ya pangaretes saga hꞌndabi maka anakbi lꞌlla-dꞌnda. Bowahunbi piꞌitu ni aku.”
3 Magtūy kalaꞌanan eꞌ sigām kamemon saga aretes sigām boꞌ binowa pehēꞌ ni si Harun. 4 Tasambut paꞌin baꞌanan bulawan eꞌ, tinunaw eꞌ si Harun boꞌ yampa hinangna taꞌu-taꞌua saliꞌ luwa sapiꞌ mandangan abataꞌ lagiꞌ. Aubus paꞌin, ahꞌlling saga aꞌa Israꞌil, yuk sigām, “Owaꞌ, kaꞌam saga aꞌa Israꞌil! Ndaꞌunbi tuhantam, ya bay amowa kitam paluwas min lahat Misil!”
5 Na, tasayu paꞌin lling itu eꞌ si Harun, magtūy iya angahinang pagtunuꞌan kulban ma mundaꞌan sapiꞌ bulawan eꞌ. Yukna ma saga aꞌa, “Maghinang kitam salung, hinang pamaheya PANGHŪꞌ.” 6 Pagsalung paꞌin, waktu subu toꞌongan, magbatiꞌan saga aꞌa kamemon anunuꞌ susumbaliꞌan panukbal sigām ni Tuhan. Aniyaꞌ isab lalabotan tinukbal eꞌ sigām pagduwaꞌahan salamat. Aubus paꞌin, magjamu na sigām sampay magkalumuꞌan dꞌnda maka lꞌlla.
7 Na, magsuwala PANGHŪꞌ ma si Musa, “Pasaꞌut ka palūd,” yukna, “sabab saga aꞌanu, ya bay bowanu paluwas min Misil, waꞌi na maghinang kasabulan. 8 Alꞌkkas pahāp sigām angꞌbba min kalꞌngnganan ya bay panohoꞌanku ma sigām. Aniyaꞌ taꞌu-taꞌu tahinang eꞌ sigām buwat luwa sapiꞌ mandangan, jari pagsujuran eꞌ sigām maka pagtukbalan saga susumbaliꞌan. Ya pahꞌlling sigām, ‘Oꞌo, pagtuhanantam bangsa Israꞌil, ya bay amowa kitam paluwas min Misil.’ ”
9 Magsuwala giꞌ PANGHŪꞌ ma si Musa yukna, “Taꞌndaꞌku saga aꞌa inān, atuwas toꞌongan kōk sigām. 10 Daꞌa aku saparun sabab apasuꞌ sidda atayku, maka magniyat aku amahalam sigām. Jari kaꞌa maka panubuꞌnu ya hinangku bangsa aheya.”
11 Sagōꞌ angamuꞌ junjung si Musa ni si Yawe ya pagtuhananna, yukna, “O Yawe, daꞌa mulahun saga aꞌa sukuꞌnu itu, ya bay bowanu paluwas min lahat Misil sabab min kosog kawasanu. 12 Dūlannu bahāꞌ saga bangsa Misil amūng-mūngan kaꞌa alaꞌat konoꞌ maksudnu, ya angkan bowanu bangsa Israꞌil paluwas min Misil boꞌ papataynu sigām ma kabūran. Luhūy halam aniyaꞌ aꞌa Israꞌil takapin ma babaw dunya itu? Ndūꞌ, Tuhanku, bang paꞌin pindahannu kapasuꞌ ataynu. Daꞌa lanjalin niyatnu angamula saga aꞌa sukuꞌnu itu. 13 Entomun saga sosohoꞌannu disi Ibrahim, si Isaꞌak maka si Yakub. Entomun bay janjiꞌnu ma sigām, ya bay pagsapahannu ma barannu, ya bay yuknu, ‘Pahekaku saga panubuꞌbi sampay sigām saliꞌ heka bituꞌun ma langit. Pamusakaꞌku kaluhaꞌan lahat Kanaꞌan ma sigām salama-lama, buwat bay panganjanjiꞌku ma kaꞌam.’ ” 14 Na, pagka buwattēꞌ panganjunjung si Musa, halam nilanjalan eꞌ si Yawe niyatna amahalam saga aꞌa Israꞌil.
15 Manjari palūd na si Musa min būd maka eꞌna amowa duwa batu amasagiꞌ ya panulatan saraꞌ-panohoꞌan bay panganjanjiꞌ Tuhan ma bangsa Israꞌil. Batu inān bay pangukilan saraꞌ ma dahuanna maka ma bukutna. 16 Tuhan toꞌongan ya bay angahinang duwa batu itu, maka Tuhan ya bay angukil saga saraꞌ.
17 Na, makakale paꞌin si Yussaꞌ ma hidjulan saga aꞌa Israꞌil, yukna ma si Musa, “Saliꞌ hidjul pagbonoꞌ ya takaleku itu!”
18 Ya sambung si Musa,
“Nggaꞌi ka hidjul pangandaꞌug ya takaleta,
nggaꞌi ka isab hidjul min aꞌa taraꞌug,
sagōꞌ hidjul min saga aꞌa magkalangan.”
19 Makasekot paꞌin si Musa ni pustu heꞌ, boꞌ taꞌndaꞌna sapiꞌ bulawan maka saga aꞌa magpangigal ma mundaꞌan sapiꞌ, magtūy arugal sidda atayna. Hantakanna duwa batu amasagiꞌ ya bay tabowana boꞌ alopot ma atag inaꞌan, ma deyoꞌan būd. 20 Niāꞌ isab eꞌ si Musa sapiꞌ bay tahinang eꞌ saga aꞌa Israꞌil. Aubus bay tinunuꞌ, pinagpipis-pipis eꞌna boꞌ binudburan ma kuwit boheꞌ. Katapusanna, pamainum eꞌna ma saga aꞌa Israꞌil.
21 Yuk si Musa ma si Harun, “Ai bay tahinang ma kaꞌa eꞌ saga aꞌa ilu ya angkan bowanu sigām maghinang dusa buwattilu heyana?”
22 Ya sambung si Harun, yukna, “Daꞌa paꞌin akagit ataynu, tuwan. Kataꞌuwannu saga aꞌa itu, aluhay sigām tabowa maghinang kalaꞌatan. 23 Bay sigām amissala ma aku, yuk-i, ‘Hinangin kitam tuhan magmundaꞌ ma kitam ma palꞌngnganan. Daka maingga si Musa inān, ya bay amowa kitam paluwas min Misil.’ 24 Angkan yukku ma sigām, ‘Sai-sai kam taga-pamulawan, laꞌaninbi.’ Magtūy niꞌndeꞌan ni aku saga pamulawan sigām ati pehēꞌku ni deyom api. Pagtunaw paꞌin, paluwas sapiꞌ mandangan inān!”
25 Na, taꞌndaꞌ eꞌ si Musa saga aꞌa Israꞌil waꞌi magkangogan, mbal takoleꞌ nihawiran eꞌ si Harun, angkan sigām tahinang pagtittowahan ma saga banta sigām. 26 Jari itu, anꞌngge na si Musa ma pagsosōran pustu maka eꞌna amissala, yukna, “Sasuku kam bilahi ameyaꞌ ma si Yawe, piꞌitu kam ni aku.” Magtūy pehēꞌ ni iya kamemon saga kalꞌllahan panubuꞌ si Libi. 27 Yuk si Musa ma sigām, “Ya pamahꞌlling kaꞌam eꞌ si Yawe Tuhan bangsa Israꞌil, in kaꞌam subay magtinakos pakaniya-pakaniya. Latagunbi kauman itu min dampōng ni dampōng amapatay pagkahibi bangsa Israꞌil ai na ka kampungbi, ai na ka bagaybi.” 28 Na bineyaꞌ eꞌ saga panubuꞌ si Libi panohoꞌan si Musa heꞌ ati magpatayan saga tꞌllungibu aꞌa ma llaw inaꞌan. 29 Pagubus, yuk si Musa, “Llaw itu, in kaꞌam saga panubuꞌ si Libi tapasaddī na boꞌ ma PANGHŪꞌ-Yawe sadja, kalnaꞌ kam bay magmalillaꞌ amonoꞌ saga anakbi maka langgungbi. Angkan kam kabuwanan kahāpan eꞌ PANGHŪꞌ.”
30 Pagꞌllaw dakayuꞌ, ahꞌlling si Musa ma saga aꞌa inān, yukna, “Aheya toꞌongan dusa bay tahinangbi. Saguwāꞌ, minsan buwattēꞌ, patukad aku ni būd pabalik angarap ni PANGHŪꞌ. Kalu-kalu mura-murahan nirūlan aku angamuꞌan kaꞌam kaꞌampunan ma pasal dusabi.”
31 Manjari patukad si Musa pabalik ni PANGHŪꞌ. Yukna ma iya, “Arōy Tuhanku, aheya sidda dusa bay tahinang eꞌ saga aꞌa itu. Bay sigām makahinang tuhan-tuhan min bulawan panumbahan sigām. 32 Ndūꞌ, bang paꞌin dūlannu panganjunjungku, ampunun dusa sigām. Malaingkan bang sigām mbal ampunnu, na, papasin ōnku min kitab ya panulatannu ōn saga aꞌa sukuꞌnu.”
33 Ya sambung PANGHŪꞌ ma si Musa, “Luwal saga aꞌa bay makarusa ni aku ya papasanku min kitabku. 34 Na pehēꞌ na ka. Bowahun saga aꞌa ilu tudju ni lahat ya bay pangahakaku ma kaꞌa. Ilu isab malaꞌikatku parahū min kaꞌa ma labayan. Sagōꞌ bang taꞌabut waktuna, tiksaꞌku sasuku bay makarusa ilu.”
35 Jari aniyaꞌ saki landuꞌ abangat pinatꞌkka eꞌ PANGHŪꞌ ma bangsa Israꞌil ma sabab bay kahinangan sigām ma sapiꞌ bulawan ya bay tahinang eꞌ si Harun.