33
1 Na magsuwala PANGHŪꞌ-Yawe ma si Musa, yukna, “Patulak kam minnitu, kaꞌam maka saga aꞌa bay bowanu paluwas min lahat Misil. Pauntas kam ni lahat bay panganjanjiꞌku ma si Ibrahim, si Isaꞌak maka si Yakub. Aniyaꞌ bay panapaku ma sigām, ya yukku, ‘Pamuwanku lahat inān ma saga panubuꞌbi.’ 2 Pabeyaꞌku dakayuꞌ malaꞌikat parahū min kaꞌam. Dūyku isab saga kabangsahan maglalahat mahēꞌ, ya na saga bangsa Kanaꞌan, bangsa Amor, bangsa Hīt, bangsa Pirissi, bangsa Hīb maka bangsa Jibus. 3 Pauntas kam ni lahat eꞌ, ya lahat apꞌnnoꞌ eꞌ kalluman landuꞌ ahāp. Sagōꞌ in aku itu mbal paseheꞌ ma kaꞌam sabab kalnaꞌ atuwas saga kōkbi. Bang kam saupama seheꞌanku, maraiꞌ kam pakaꞌatku toꞌongan ma labayan.”
4 Na, kahakaꞌan paꞌin saga aꞌa Israꞌil pasal pamissala makasusa itu, magtūy sigām anagnaꞌ magsusun maka halam aniyaꞌ min sigām magpamulawan. 5 Sabab aniyaꞌ bay panohoꞌan PANGHŪꞌ ma si Musa, yukna, “Hakaꞌin saga aꞌa Israꞌil in sigām bangsa landuꞌ atuwas. Bang aku paseheꞌ ma sigām minsan laꞌa dansasaꞌat, maraiꞌ sigām mulaku saruꞌun-duꞌun. Sōꞌun sigām angalaꞌanan baꞌanan pamulawan ya pamakay sigām. Kira-kiraku lagiꞌ bang ai hinangku ma sigām.” 6 Manjari itu, makalanjal paꞌin saga bangsa Israꞌil min atag Būd Horeb (Būd Turusina), halam na sigām magpamakay saga pamulawan.
Tolda Pagsabuhan Tuhan maka Manusiyaꞌ
7 Na ya kabiyaksahan si Musa maingga-maingga pahantiꞌan sigām bangsa Israꞌil, amatꞌngge iya dakayuꞌ lumaꞌ tolda alawak-lawak min pustu. ‘Tolda pagsabuhan Tuhan maka manusiyaꞌ’ ya pangōn si Musa ma tolda inān. Jari bang aniyaꞌ bilahi angaru ni PANGHŪꞌ-Yawe, subay iya paluwas min kauman pehēꞌ ni Tolda Pagsabuhan. 8 Na sakahabaꞌ si Musa paluwas pehēꞌ ni lumaꞌ pagsabuhan, magtꞌnggehan saga aꞌa kamemon ma bowaꞌ lawang tolda sigām. Angꞌndaꞌ sigām ma si Musa sampay iya pasōd na ni deyom. 9 Makasōd paꞌin iya, pareyoꞌ pinaꞌan gabun-Tuhana ni dahuan lawang lumaꞌ heꞌ boꞌ paddas mainaꞌan satꞌggol si Yawe maka si Musa magsuli-suli. 10 Pagꞌndaꞌ saga aꞌa ma gabun-Tuhan patꞌnnaꞌ ma atag pagsosōran lumaꞌ tolda, pabungkal sigām boꞌ yampa pasujud anumba ni Tuhan, kaniya-kaniya sigām ma bowaꞌ lawang sigām. 11 Tiyap-tiyap mainaꞌan si Musa ma deyom tolda, magharap PANGHŪꞌ maka iya magbissala buwat aꞌa magsuli-suli maka bagayna. Aubus paꞌin, ya kabiyaksahan si Musa subay pabalik ni deyom kauman, sagōꞌ tendogna si Yussaꞌ, ya anak si Nūn, halam bay paluwas min tolda pagsabuhan eꞌ.
Si Musa maka Kasahayaꞌan si Yawe
12 Ahꞌlling giꞌ si Musa ma PANGHŪꞌ-Yawe, yukna, “Tasohoꞌnu aku amowa saga aꞌa itu patukad ni lahat eꞌ, saguwāꞌ halam aku hakaꞌannu bang sai paseheꞌnu ma aku. Yuknu in aku taitungnu bagaynu lissi, maka kasulutan ka ma aku. 13 Jari bang ka kaꞌamuhan du ma aku, ndūꞌ, panduꞌin aku ma pasal kamaksurannu supaya aku makataꞌu ma kaꞌa sampay makasulut na paꞌin ma kaꞌa. Entomun isab bangsa itu sabab sukuꞌnu asal.”
14 Ya sambung PANGHŪꞌ ma si Musa, “Seheꞌanta du ka, maka buwananta ka kasannangan atay.”
15 Yuk si Musa, “Ya Tuhanku, bang kami mbal seheꞌannu toꞌongan, ahāp lagiꞌ kami mbal palanjalnu min jadjahan itu-i. 16 Sabab bang kami siya-siyanu mbal kinataꞌuwan eꞌ sai-na in kaꞌa kasulutan ma aku maka ma bangsa sukuꞌnu. Bang kami mbal seheꞌannu, halam aniyaꞌ pagbiddaꞌan kami maka palbangsahan kaseheꞌ ma sakalibut dunya itu.”
17 Sakali anambung PANGHŪꞌ ma si Musa, yukna, “Dūlanku ya pangamuꞌnu ilu sabab kasulutan aku ma kaꞌa, maka kataꞌuwanku ōnnu.”
18 Na, aniyaꞌ giꞌ pangamuꞌ si Musa ma Tuhan, yukna, “Bang paꞌin aku paꞌndaꞌannu sahayanu.”
19 Ya sambung PANGHŪꞌ, “Ahoꞌ, palamanku kahāpanku kamemon ma matahannu. Maka sabbutku isab ōnku ma pakalehannu, in aku si Yawe Tuhan-asal-Tuhan. Aku ya tag-bayaꞌan bang sai ya pinatꞌkkahan lasaku maka bang sai kinaꞌaseꞌan. 20 Malaingkan,” yuk PANGHŪꞌ, “mbal ka makajari angꞌndaꞌ ma baihuꞌku. Sabab amatay sadja saga manusiyaꞌ bang makaꞌndaꞌ ma aku.
21 “Na,” yukna, “aniyaꞌ batu lakit panꞌnggehannu ilu, asekot-sekot ni aku. 22 Manjari bang palabay sahayaku ma matahannu, pasindungta ka ma deyom songab batu itu. Tampananta ka maka tanganku hinabuku palabay min kaꞌa. 23 Makalabay paꞌin, laꞌananku tanganku supaya ka makaꞌndaꞌ bukutku. Sagōꞌ in baihuꞌku mbal makajari niꞌndaꞌ.”