34
Papan Batu Lakit Karuwana
1 Manjari angallam giꞌ PANGHŪꞌ ma si Musa yukna, “Sapsapin batu amasagiꞌ duwa hekana, daluwa maka bay dahū. Sulatku mailu saga panohoꞌan bay ma batu tagnaꞌ, ya bay lopotnu. 2 Pasakap ka salung subu boꞌ ka patukad ni Būd Turusina itu. Pagtukadnu ni pussuk būd, anꞌngge ka ma matahanku. 3 Subay halam aniyaꞌ parongan ma kaꞌa. Minsan maingga-maingga ma sakalingkal būd itu, subay halam aniyaꞌ manusiyaꞌ taꞌndaꞌ, luwal kaꞌa. Minsan hayop, bili-bili ka atawa sapiꞌ, subay halam aniyaꞌ magkakan ma deyoꞌan būd ilu.”
4 Sakali sinapsapan eꞌ si Musa duwa batu amasagiꞌ, daluwa maka bay tagnaꞌ. Pagdaiꞌllaw paꞌin, patukad iya ni Būd Turusinaꞌ maka eꞌna amowa duwa batu heꞌ. Hatina bineyaꞌ eꞌna bay panohoꞌan PANGHŪꞌ. 5 Sakali patulun si Yawe min deyom gabun boꞌ anꞌngge ma atag si Musa. Tapataꞌu isab eꞌ Tuhan ōnna si Yawe ya Tuhan-asal-Tuhan. 6 Magsuwala iya hinabuna palabay min alopan si Musa. Yukna, “Aku si Yawe ya Tuhan-asal-Tuhan. Patitabangun asal aku maka patiaseꞌun. Alallay aku angastol, alꞌkkas aku amaluwas lasaku, lasa mbal magkapinda. 7 Taptap lasaku ma saga manusiyaꞌ sampay ni kaibuhan pangkat. Ampunku kasāꞌan maka karusahan sigām. Ampunku minsan sigām anaggaꞌ saraꞌ. Saguwāꞌ bang aꞌa makarusa, mbal toꞌongan pasagaranku. Papoleꞌku karusahanna ni anak-mpuna, sampay ni mpuna tuꞌut, sampay taꞌabut mpat pangkat.”
8 Na pagkale si Musa ma bissala Tuhan itu, magtūy iya pasujud anumba. 9 Yukna, “O Panghūꞌku, bang ka kasulutan sabꞌnnal-bꞌnnal ma aku, ndūꞌ Tuhan, bang paꞌin ka pagapiꞌ ma kami. Minsan atuwas kōk saga bangsaku itu, ampunun paꞌin kalaꞌatan maka karusahan kami. Taimaꞌun kami ati hinangun kami saga aꞌa sukuꞌnu.”
10 Angallam PANGHŪꞌ-Yawe ma si Musa, yukna, “Ndaꞌun, paniyaꞌku paljanjiꞌanku ma kaꞌa pabīng. Angahinang aku saga hinang makainu-inu ma pangꞌndaꞌan saga aꞌa bangsanu Israꞌil kamemon. Halam toꞌongan aniyaꞌ bay makahinang buwattēꞌ, minsan ma ai lahat, minsan ma ai bangsa. Song taꞌndaꞌ hinangku makatāw-tāw eꞌ saga aꞌa ya patꞌnnaꞌ ma sakalibutnu, ati tasayu eꞌ sigām bang buwattingga panabangku ma kaꞌa. 11 Beyaꞌun saga saraꞌ panohoꞌan ya patꞌnnaꞌanku kaꞌam llaw itu. Dūyku min dahuannu saga bangsa Amor, bangsa Kanaꞌan, bangsa Hīt, bangsa Pirissi, bangsa Hīb maka bangsa Jibus. 12 Amay-amay, daꞌa kam magkahāp maka saga bangsa ya asal maglahat ma lahat ya song papehēꞌanbi ilu. Tantu kam pinalabayan kasasatan eꞌ sigām, sapantun jallat ma tapeꞌbi. 13 Pakaꞌatunbi saga tampat ya pagkulbanan sigām. Lopotunbi saga batu paosol ya pagsusumbahan sigām. Puwarunbi isab saga hāg pangilāhan si Asera, ya tuhan sigām dꞌnda. 14 Wajib kam daꞌa magtaꞌat ma pagtuhanan saddī min aku, sabab si Yawe aku, ya Tuhan-asal-Tuhan. Mbal toꞌongan aku bilahi aniyaꞌ pagtuhananbi saddī min aku.
15 “Amay-amay, daꞌa kam amiha magkahāp maka saga bangsa ya asal maglahat ma lahat song papehēꞌanbi ilu. Sabab kalnaꞌ, bang kam gantaꞌ magkahāp maka sigām, tantu kam pinogos eꞌ sigām angꞌbba min aku boꞌ magtaꞌat ni saga pagtuhanan sigām. Tabowa kam magsalu isab maka sigām ati kakanbi baꞌanan susumbaliꞌan bay pangungsud ni pagtuhanan sigām eꞌ. 16 Lāgi bang aniyaꞌ saga anak sigām budjang tapeneꞌbi pamahꞌnda ma kaꞌanakanbi lꞌlla, tantu sigām kapitnahan eꞌ saga dꞌnda heꞌ subay palamud anaꞌat ni saga pagtuhanan sigām.”
17 Amalman Tuhan, yukna, “Wajib kam daꞌa magsasal tumbaga nihinang taꞌu-taꞌu pagtuhanan.”
18 “Wajib kam maghinang Hinang Tinapay Halam Pasuligna sakahabaꞌ tahun bang taꞌabut bulananna. Subay pitumbahangi ya tꞌggolbi magkakan tinapay halam bay pinasuligan, buwat bay panohoꞌanku ma kaꞌam. Hinangunbi ma bulan Abib, ya na bulan bay kapaluwasbi min lahat Misil.
19 “Pamasukuꞌunbi ma aku kamemon saga anakbi kasiyakahan lꞌlla, beyaꞌ isab saga hayop lꞌlla ya dahū nianakan, ai na ka bili-bili maka kambing, ai na ka sapiꞌ. 20 Sagōꞌ mbal taluwaꞌ kinulban bang kuraꞌ. Bang aniyaꞌ kuraꞌ anganak kamintꞌddana, in anak kuraꞌ inān subay nilꞌkkat, hatina subay aniyaꞌ dakayuꞌ anak bili-bili atawa kambing sinumbaliꞌ gantiꞌna. Bang saupama mbal nilꞌkkat, na subay pinōng buliꞌ-kꞌllongna sabab kuraꞌ iya. Saga anakbi lꞌlla kasiyakahan isab, subay nilꞌkkat maka susumbaliꞌan pagkulbanbi ni Tuhan. Amay-amay isab, bang kam angarap ni aku sumiyan-sumiyan, subay kam amowa tutukbalan.
21 “Makajari kam maghinang atawa magusaha ma deyom nnom llaw, sagōꞌ subay kam pahali maghinang ma llaw kapituꞌna. Minsan ma waktu pagararu atawa waktu pagani, subay kam pahali ma llaw kapituꞌ.
22 “Hinangunbi Paghinang Kapituꞌana ma waktu paganibi saga buwaꞌ tirigu. Hinangunbi Paghinang Anihan Damuli ma song paꞌin waktu paghaggut.b
23 “Manjari tꞌllu waktu ma deyom dantahun ya pagtipun kamemon saga kalꞌllahanbi ma matahan si Yawe, ya pagpanghūꞌan bangsa Israꞌil. 24 Daꞌa kabimbanginbi saga tanaꞌbi bang kam alikut magtipun ni aku ya Tuhanbi. Halam sai-sai anganapsuhan tanaꞌbi sabab paluwasku min dahuanbi saga bangsa Amor, bangsa Kanaꞌan, bangsa Hīt, bangsa Pirissi, bangsa Hīb maka bangsa Jibus. Paluhaku isab lahat ya patꞌnnaꞌanbi.
25 “Na bang kam anumbaliꞌ hayop pagkulbanbi ni aku, daꞌa papagbeyaꞌun lahaꞌna maka tinapay halam pinasuligan. Bang kam maghinang Hinang Paglakad, daꞌa kapininbi isi susumbaliꞌan sampay ni kasalungan.
26 “Bang kam anagnaꞌ magani tinanom atawa magpusuꞌ buwaꞌ kayu, peneꞌunbi ya ahāp toꞌongan boꞌ bowahunbi ni Lumaꞌ pangarapanbi ni si Yawe ya Tuhanbi.
“Bang aniyaꞌ anak kambing bꞌllabi, daꞌa paglamurunbi maka gatas inaꞌna.”
27 Pagubus, ahꞌlling PANGHŪꞌ-Yawe ma si Musa, yukna, “Sulatun saga kabtangan itu sabab kataddangan koꞌ itu ma paljanjiꞌantam.” 28 Jari mpatpūꞌ bahangi ya panimpus si Musa mainaꞌan ma atag PANGHŪꞌ, maka halam aniyaꞌ bay takakanna atawa tainumna tꞌggolna bay mainaꞌan. Tasulat eꞌna ma duwa papagan batu saga kabtangan paljanjiꞌan, hatina Saraꞌ Panohoꞌan sangpūꞌ hekana.
Sahaya ma Pamaihuꞌan si Musa
29 Na, palūd si Musa min Būd Turusinaꞌ amowa duwa papan batu ya panulatan paljanjiꞌan Tuhan maka bangsa Israꞌil. Paglūd na paꞌin, halam tasayu eꞌ si Musa in baihuꞌna anahaya asal ma sabab kapagsuli-sulina maka PANGHŪꞌ. 30 Pagꞌndaꞌ si Harun maka kamemon saga aꞌa Israꞌil ma sahaya baihuꞌ si Musa, na tināw sigām pasekot ni iya. 31 Malaingkan nilinganan eꞌ si Musa disi Harun maka kamemon saga pagbebeyaꞌan bangsa Israꞌil. Sinōꞌ sigām pabalik ni atagna boꞌ sigām bissalahanna. 32 Pagubus, patipun ni si Musa saga aꞌa Israꞌil kamemon ati pinasampay eꞌna ma sigām saga saraꞌ kamemon bay panohoꞌan PANGHŪꞌ-Yawe ma iya ma diyataꞌ Būd Turusinaꞌ.
33 Aubus paꞌin pamissala si Musa ma sigām, tinambunan eꞌna baihuꞌna boꞌ mbal taꞌndaꞌ sahayana. 34 Sagōꞌ bang aniyaꞌ waktuna pasōd ni haddarat si Yawe magsuli-suli maka iya, nilaꞌanan eꞌna tambunna heꞌ sampay iya makaluwas pabīng. Pagluwas paꞌin, pinalatun eꞌna ma saga bangsa Israꞌil ai-ai bay panohoꞌan Tuhan ma iya. 35 Taꞌndaꞌ magtūy eꞌ sigām baihuꞌna anahaya, angkan tinambunan baihuꞌna pabīng, sampay ni waktu kapagsuli-sulina maka PANGHŪꞌ-Yawe pabalik.