35
Hatulan Pasal Llaw Mulliya
1 Manjari itu, pinalinganan eꞌ si Musa kamemon saga bangsa Israꞌil, sinōꞌ patipun ma iya. Yukna ma sigām, “Kaꞌam saga bangsa Israꞌil, ya itu saga hatulan panohoꞌan kaꞌam eꞌ PANGHŪꞌ. 2 Nnom llaw ya pamihabi kaꞌlluman, sagōꞌ bang taꞌabut llaw kapituꞌna, ya na llaw mulliya, llaw paghali pamaheyabi ma PANGHŪꞌ. Sasuku maghinang ai-ai ma llaw itu subay pinapatay. 3 Daꞌa kam minsan magparokot api ma deyom lumaꞌbi ma Llaw Kapituꞌ.”
Ai-ai Pangahinang Lumaꞌ Pangarapan Tuhan
4 Ahꞌlling si Musa ma saga jamaꞌa bangsa Israꞌil kamemon, yukna, “Buwattitu panohoꞌan PANGHŪꞌ-Yawe ma kaꞌam, 5 sinōꞌ kam amowa huhulmatan ni iya luwas min kaniyaꞌbi. Bang isab tapangahilasbi, bowahunbi ni PANGHŪꞌ baꞌanan saga ai-ai ya tinutat itu: bulawan, pilak maka tumbaga, 6 salban walnaꞌ bilu, taluk maka keyat, kakanaꞌ poteꞌ ahāp hinanganna, bulbul kambing pangahinang kakanaꞌ, 7 kuwit bili-bili lꞌlla nianjibihan keyat, maka kuwit duyung isab. Bowahunbi kayu akasya, 8 nsꞌllan buwaꞌ jaitun ma palitaꞌan, saga pamapā pamahamut nsꞌllan ya panganggꞌllal imam, maka ginisan pamapā pamahamut kamanyan. 9 Bowahunbi isab ginisan palmata pamalingkat epod (lampik-juba) maka puyuꞌ-daggaha ya pinakay eꞌ imam alanga.”
10 Yuk si Musa isab, “Sasuku kam taga-kapandayan maghinang, piꞌitu kam. Hinangunbi kamemon ya pamahinang eꞌ PANGHŪꞌ-Yawe ma kitam. 11 Hinangunbi Lumaꞌ Pangarapanbi ma iya, apanyap maka toldana sampay turungna katapusan, baꞌanan saga kakansingna, papagan dindingna, batang-batangna, hāgna maka durukanna isab. 12 Hinangunbi Baꞌul Paljanjiꞌan, beyaꞌ isab tanggunganna, maka turungna ya Pagtaubatan, maka kultina pangalikus. 13 Hinangunbi lamisahan pamatꞌnnaꞌan Tinapay Hadarat, jukup maka tanggunganna, maka saga kapanyapanna, 14 palitaꞌan pituꞌ sumbuhanna ya pamasawa deyom Lumaꞌ, beyaꞌ isab kapanyapanna maka nsꞌllan pamakeyat iya. 15 Hinangunbi lamisahan pagtugtugan kamanyan maka tanggunganna, nsꞌllan sussi panganggꞌllal imam, kamanyan ahamut, maka kultina panambol lawang ya pagsosōran ni Lumaꞌ Pangarapan. 16 Hinangunbi isab lapohan pagtunuꞌan susumbaliꞌan maka pangayakanna tumbaga, beyaꞌ isab tanggunganna maka saga kapanyapanna kamemon, garul pagailan nihinang min tumbaga sampay patinggilan ya pamatꞌnnaꞌan iya. 17 Hinangunbi saga kultina panasak halaman Lumaꞌ, jukup maka saga hāg pangahāg sasak maka baꞌanan durukan, beyaꞌ isab kultina ya panambol pagsosōran ni halaman eꞌ. 18 Hinangunbi bale pangengkotan tolda ya panurung Lumaꞌ Pangarapan sampay kakultinahan ya panasak halaman, maka baꞌanan lubidna. 19 Pagubus, tꞌnnununbi sꞌmmek panꞌmmek saga imam ma waktu kapaghinang sigām ma Lumaꞌ Sussi, hatina saga sꞌmmek sussi ya pamakay si Harun maka saga anakna lꞌlla hinabu sigām magimam ma deyom Lumaꞌ Pangarapan.”
20 Pagubus pamissala si Musa inān, maglaꞌanan na min matahanna saga aꞌa Israꞌil kamemon. 21 Pabīng isab pinaꞌan saga aꞌa kamemon ya taga-bayaꞌ anukbal kaniyaꞌ sigām ni PANGHŪꞌ, lillaꞌ isab min deyom atay sigām. Binowa eꞌ sigām baꞌanan ai-ai pangahinang Tolda Pagsasabuhan,a maka ai-ai pangahinang sꞌmmek ya panꞌmmek imam. 22 Jari pinaꞌan saga lꞌlla maka dꞌnda kamemon sasuku taga-bayaꞌ amuwan, binowa eꞌ sigām kaginisan saga pamulawan, buwat saga kait, aretes, singsing, gallang maka palmata, boꞌ niangkat eꞌ sigām pangahulmat ma PANGHŪꞌ. 23 Saga aꞌa isab taga-salban walnaꞌ bilu, taluk maka keyat, atawa kakanaꞌ ahāp hinanganna, atawa bulbul kambing, atawa kuwit kambing lꞌlla bay nianjibihan keyat, atawa kuwit duyung, bay amowa saga palsukuꞌan sigām pinaꞌan. 24 Saga aꞌa isab taga-pilak atawa tumbaga aponod, bay amowa altaꞌ sigām eꞌ panukbal sigām ma PANGHŪꞌ. Ya du amowa saga aꞌa taga-kayu akasya ya kinagunahan ma lumaꞌ Tuhan.
25 Kamemon saga karꞌndahan taga-pangitaꞌu isab bay aminsalb salban, ati binowa eꞌ sigām kakanaꞌ ahāp ya bay nihinang eꞌ sigām min salban bilu, taluk maka keyat. 26 Sasuku sigām taga-pangitaꞌu, ya bilahi isab palamud, bay aminsal salban min bulbul kambing. 27 Saga aꞌa pagbebeyaꞌan isab bay amowa palmata onek maka palmata indaginis ya pinatꞌnnaꞌ ma epod maka ma puyuꞌ-daggaha ya panꞌmmek imam alanga. 28 Binowa isab eꞌ sigām nsꞌllan jaitun ya kagunahan pamakeyat palitaꞌan ma deyom Lumaꞌ, maka panganggꞌllal imam. Binowa isab pamapā pangalamud ma nsꞌllan eꞌ, maka pamahamut kamanyan. 29 Jari sai-sai taga-bayaꞌ ma kaluhaꞌan bangsa Israꞌil, lꞌlla ka atawa dꞌnda, bay amowa huhulmatan panukbal sigām ma PANGHŪꞌ, hilas min deyom pangatayan. Tapamuwan eꞌ sigām ai-ai ya kinagunahan ma saga hinang bay panohoꞌan PANGHŪꞌ ma si Musa.
Si Besalel maka si Oholeyab
30 Na amissala si Musa ma saga bangsa Israꞌil, yukna, “Pataꞌu kam. Tapeneꞌ eꞌ PANGHŪꞌ si Besalel anak si Uri ya anak si Hūr, min bangsa Yuda. 31 Aniyaꞌ pangitaꞌu maka akkal maka kapandayan bay pamatulun eꞌ Tuhan ma iya supaya iya makahinang ai-ai ahāp maka alingkat. 32 Ataꞌu iya angangguhit suntuꞌan ma ai-ai tahinang min bulawan atawa min pilak atawa min tumbaga. 33 Ataꞌu iya anganggaugariꞌ ginisan palmata boꞌ yampa pasangonna ma kait bulawan. Ataꞌu isab angukil kayu, maka ataꞌu angahinang kapanyapan indaginis boꞌ ahāp nindaꞌ. 34 Aniyaꞌ akkal pamuwan eꞌ Tuhan ma iya maka ma si Oholeyab anak si Ahisamak min bangsa Dān, supaya sigām makapanduꞌ ma saga aꞌa kaseheꞌan. 35 Jari katulunan sigām kapandayan angkan ataꞌu maghinang kaginisan ai-ai, ataꞌu isab magguhit suntuꞌan. Ataꞌu isab sigām magbuldahan kakanaꞌ poteꞌ maka salban bilu, taluk maka keyat, ataꞌu isab angahinang kakanaꞌ landuꞌ ahāp isina. Apanday kamemon saga aꞌa itu maghinang ai-ai ya kahinangan tangan, alalom isab pikilan sigām magguhit suntuꞌan kaginisan.”