36
1 “Manjari niamay-amayan si Besalel maka si Oholeyab sampay saga aꞌa kamemon ya kabuwanan akkal maka kapandayan eꞌ si PANGHŪꞌ-Yawe supaya sigām makahinang Lumaꞌ Sussi maka baꞌanan kapanyapanna. Sinōꞌ sigām ameyaꞌ toꞌongan ma bay panohoꞌan PANGHŪꞌ ma sigām.”
2 Pagubus, pinalinganan na eꞌ si Musa si Besalel maka si Oholeyab maka saga aꞌa kamemon ya kabuwanan kapandayan eꞌ PANGHŪꞌ, beyaꞌ isab sasuku taga-kōg maka bayaꞌ. 3 Tasambut heꞌ sigām min si Musa baꞌanan saga huhulmatan bay tatukbal eꞌ saga aꞌa Israꞌil pamapagdayaw maka pamapanyap ma Lumaꞌ Pangarapan eꞌ. Aniyaꞌ na paꞌin saga huhulmatan pinagbowa eꞌ saga aꞌa Israꞌil inān kahabaꞌ subu, 4 angkan saga aꞌa ataꞌu maghinang bay angꞌbba min hinang sigām 5 boꞌ pehēꞌ ahꞌlling ni si Musa. Ya yuk sigām, “Tuwan, maglabi toꞌongan ya pinagbowa na paꞌin eꞌ saga aꞌa itu. Sarang na makahinangan kamemon bay panohoꞌan PANGHŪꞌ.”
6 Jari aniyaꞌ panohoꞌan si Musa bay pinasaplag ma kaluhaꞌan kauman, yukna, “Kaꞌam kamemon dꞌnda maka lꞌlla, sinōꞌ pahali amowa saga huhulmatan paghinangta Lumaꞌ Sussi.” Minnēꞌ sigām tabowa pahali angꞌndeꞌan baꞌanan bubuwanan sigām labi-manglabi. 7 Sabab sarang na, makaꞌabut pangahinang Lumaꞌ Pangarapan sampay kamemon kapanyapanna.
Pangahinang Lumaꞌ Pangarapan Tuhan
8 Manjari tahinang Lumaꞌ Pangarapan heꞌ saga maghihinang, sasuku sigām alalom pikilanna. Tahinang eꞌ sigām sangpūꞌ sugpat kultina min kakanaꞌ ahāp isina pinaglamuran salban bilu, taluk maka keyat. Aniyaꞌ isab saliꞌ luwa malaꞌikat pikpikan binulda pinaꞌan heꞌ saga aꞌa apanday magbubulda. 9 In baꞌanan sugpat kultina itu dasaliꞌ sukuranna kamemon, pitundꞌppa tahaꞌna maka dandꞌppa lambuna. 10 Lima sugpat kultina bay tinahiꞌ eꞌ sigām pinagbihing-bihing, damikiyanna isab lima hekana takapin, manjari duwa kultina atahaꞌ na. 11-12 Na aniyaꞌ tainga-tainga nihinang min kakanaꞌ bilu tinahiꞌ pehēꞌ ni tōng kultina atahaꞌ inān karuwa, hatina lima-limampūꞌ heka tainga-tainga tahinang maganggop-anggop. 13 Aniyaꞌ isab kakansing bulawan limampūꞌ hekana tahinang pamarakayuꞌ duwa kultina inān boꞌ supaya arakayuꞌ deyom Lumaꞌ Pangarapan.
14 Pagubus, aniyaꞌ kultina bay nihinang eꞌ saga aꞌa inān min bulbul kambing, sangpūꞌ maka dda sugpatna pangalapis kultina deyom. 15 Daheya du saga sangpūꞌ maka dda sugpat kultina damuli itu, tahaꞌna pitundꞌppa maka tongaꞌ, lambuna dandꞌppa. 16 Lima sugpatna bay tinahiꞌ pinagbihing-bihing boꞌ tahinang dakayuꞌ kultina atahaꞌ, damikiyanna isab nnom heka sugpatna takapin. 17 Puwas eꞌ aniyaꞌ tainga-tainga kakanaꞌ nihinang eꞌ sigām ma tōng kultina karuwa, lima-limampūꞌ hekana, 18 limampūꞌ isab kakansing tumbaga pamaralos kultina bulbul kambing eꞌ. 19 Pagubus, aniyaꞌ duwa ginis turung tahinang eꞌ saga aꞌa inān panurung kamemonna. Dakayuꞌ turung inān bay tahinang min kuwit bili-bili lꞌlla nianjibihan keyat, dakayuꞌ isab tahinang min kuwit duyung, ya na turung katapusan.
20 Aniyaꞌ isab saga papagan tahinang eꞌ sigām min kayu akasya pamarindingan Lumaꞌ Pangarapan eꞌ. 21 Duwandꞌppa maka tongaꞌ ya langkawna, tꞌllu hꞌkka lambuna. 22 Tahinang isab lagsak duwa hekana patuwaꞌ min deyoꞌanna. Buwattēꞌ ya pangahinang saga papagan dinding kamemon, 23-26 duwampūꞌ hekana min bihing lumaꞌ tampal ni satan, duwampūꞌ isab min bihingna tampal ni uttalaꞌ. Aniyaꞌ isab saga durukan dī pilak tasasal eꞌ saga aꞌa maghihinang, mpatpūꞌ hekana, hatina duwa durukan ma dakayuꞌ papagan boꞌ aniyaꞌ pamatukan lagsak eꞌ. 27 Tahinang isab saga papagan nnom hekana pamarindingan kōkan lumaꞌ (tampal ni sꞌddopan), 28 maka duwa hekana isab ma duguna karuwa. 29 In duwa heka papagan itu bay pinapagtapil min deyoꞌ sampay pariyataꞌ, maka diyataꞌ bay pinasulug ni dakayuꞌ gallang boꞌ mbal magpuklas. 30 Manjari waluꞌ heka papagan ya tahinang pamarindingan kōkan lumaꞌ, sangpūꞌ maka nnom isab durukan tahinang min dī pilak.
31-32 Aniyaꞌ isab saga batang-batang pamahogot dinding bay tahinang eꞌ saga aꞌa maghihinang eꞌ, lima-lima hekana ma bihing lumaꞌ dakayuꞌ maka dakayuꞌ, lima hekana isab ma kōkan (tampal ni sꞌddopan). 33 Ya batang-batang ma tꞌngngaꞌ dinding bay pinaꞌabut eꞌ sigām min tōng dakayuꞌ tudju ni tōng dakayuꞌ. 34 Bay pinutusan bulawan saga papagan dinding itu, beyaꞌ isab batang-batangna. Maka aniyaꞌ isab saga gallang bulawan tahinang eꞌ sigām pamasulugan baꞌanan batang-batang eꞌ.
35 Pagubus, aniyaꞌ kultina tahinang pangalikus deyom Lumaꞌ Pangarapan, tampal ni kōkan. Tahinang eꞌ sigām min kakanaꞌ landuꞌ ahāp isina, pinaglamuran isab salban bilu, taluk maka keyat. Aniyaꞌ isab saliꞌ luwa malaꞌikat pikpikan binulda pinaꞌan heꞌ aꞌa apanday magbubulda.
36 Aniyaꞌ saga hāg akasya mpat hekana bay tahinang eꞌ saga aꞌa maghihinang eꞌ, pinutus isab maka bulawan. Aniyaꞌ isab saga sasabit bulawan tasasal eꞌ sigām panagnatan kultina, maka durukan hāg tasasal min pilak aponod. 37 Pagubus, aniyaꞌ kultina tahinang eꞌ sigām panambol lawang pagsosōran ni Lumaꞌ. Kakanaꞌ ahāp isina ya pangahinang kultina itu, binulda maka salban bilu, taluk maka keyat eꞌ aꞌa magbubulda. 38 Tahinang isab eꞌ sigām saga hāg lima hekana, jukup maka sasabit. Kōk hāg itu bay pinutus maka bulawan, batangna bay nileboran isab maka bulawan. Aniyaꞌ isab durukan tumbaga tahinang eꞌ sigām pamatꞌnggehan saga hāg.