37
Baꞌul Paljanjiꞌan
1 Na, makahinang baꞌul si Besalel min kayu akasya, lima hꞌkka tahaꞌna, tꞌllu hꞌkka lambuna, tꞌllu hꞌkka isab langkawna. 2 Bay pinutus deyom-luwasanna maka bulawan porol, pinalingkat isab kīdna maka gipis bulawan. 3 Nihinang eꞌna mpat gallang bulawan pinatliꞌ pehēꞌ ni tapeꞌ baꞌul, duwa gallang min bihing baꞌul dambilaꞌ, duwa isab min dambilaꞌ. 4 Pagubus, aniyaꞌ tanggungan nihinang eꞌ si Besalel min kayu akasya, pinutus isab maka bulawan. 5 Pinasulug magtūy ni gallang ya ma bihing baꞌul boꞌ aniyaꞌ pananggungan.
6 Tahinang isab eꞌ si Besalel turung baꞌul, ya pinagōnan Turung Pagtaubatan. Tasasal eꞌna min bulawan porol, lima hꞌkka tahaꞌna, tꞌllu hꞌkka lambuna. 7-8 Pagubus, tasasal eꞌna duwa malaꞌikat pikpikan, dakayuꞌ min dantōng turung baꞌul, dakayuꞌ isab min dantōng. Langkus asal bulawan malaꞌikat maka bulawan turung, da-sasalan du. 9 Pabꞌllat pariyataꞌ pikpik malaꞌikat itu makalandungan turung baꞌul. Magharap duwa malaꞌikat eꞌ, maka eꞌ sigām angandomolan turung.
Lamisahan Pamatꞌnnaꞌan Tinapay Hadarat
10 Na, bay makahinang lamisahan disi Besalel min kayu akasya, mpat hꞌkka tahaꞌna, duwa hꞌkka lambuna, tꞌllu hꞌkka isab langkawna. 11 Taputus eꞌ sigām maka bulawan porol, maka pinalingkat mpat kīdna maka gipis bulawan. 12 Aniyaꞌ isab paga-paga saga daꞌmpāt-tangan lambuna tahinang eꞌ sigām ma sakalibut lamisahan eꞌ, pinalingkat isab maka gipis bulawan. 13 Pagubus, makahinang sigām saga gallang mpat hekana boꞌ pinatliꞌ pehēꞌ ni mpat duguna, min diyataꞌ saga tapeꞌ. 14 Gallang itu bay pinasekot ni paga-paga boꞌ aniyaꞌ pamasulugan tanggungan bang subay nihangkut. 15 Tahinang isab saga tanggungan min kayu akasya taputus maka bulawan. 16 Manjari tahinang na isab eꞌ disi Besalel saga kapanyapan lamisahan buwat saga lai, saga pinggan, maka saga pangisihan binu-anggul ya binuꞌusan pangahulmat Tuhan. Baꞌanan saga kapanyapan itu bay nihinang min bulawan porol.
Palitaꞌan Bulawan
17 Na, tahinang palitaꞌan heꞌ disi Besalel, sinasal min bulawan porol. Dalos asal hinanganna min buliꞌna sampay ni batangna, beyaꞌ isab saga pinggan-pingganna, ya pinagukilan saliꞌ luwa sumping. 18 In batang palitaꞌan itu magsanga nnom, tꞌllu min dambilaꞌ batang, tꞌllu isab min dambilaꞌ. 19 Saga sanga itu bay kahinangan pinggan-pinggan saliꞌ luwa sumping almona tꞌllu hekana ma saga sanga kaꞌnnom pakaniya-pakaniya. 20 Damikiyanna in baran palitaꞌan, bay kahinangan pinggan-pinggan isab saliꞌ luwa sumping almon, mpat hekana, 21 dakayuꞌ min deyoꞌ saga sanga panagnaꞌan, dakayuꞌ min deyoꞌ saga sanga tꞌngngaꞌan, dakayuꞌ isab min deyoꞌ sanga ma diyataꞌan, jari nnom sangana. 22 Jari langkus hinanganna kamemon, baran palitaꞌan maka baꞌanan sumping-sumpingna maka saga sangana. Bulawan porol ya pangahinang iya.
23 Tahinang isab eꞌ disi Besalel saga palitaꞌan maka pangisihan nsꞌllan pituꞌ hekana, jukup maka saga sisipit pamahāp sumbuhan maka saga talam-talamna. Bulawan porol ya pangahinang. 24 Manjari tꞌllumpūꞌ maka mpat kilu ya buhat bulawan bay pangahinang palitaꞌan maka kamemon kapanyapanna inān.
Pagtugtugan Kamanyan
25 Pasunuꞌ, aniyaꞌ lamisahan amasagiꞌ tahinang eꞌ sigām min kayu akasya, pagtugtugan kamanyan. Lambuna maka tahaꞌna duwa hꞌkka saliꞌ-saliꞌ, langkawna mpat hꞌkka. Aniyaꞌ pussuk-pussuk saliꞌ luwa tanduk bay tahinang eꞌ sigām ma duguna, dalos asal kayuna maka kayu bay pangahinangan baran lamisahan. 26 Diyataꞌ lamisahan maka saga kīdna, sampay isab saga pussuk-pussukna, bay pinutus maka bulawan porol. Aniyaꞌ isab gipis bulawan bay pinehēꞌ ni kakīran lamisahan pamahāp luwana. 27 Bay sigām makahinang gallang bulawan pamasulugan tanggungan. Pinasangon pehēꞌ ni kīd lamisahan min deyoꞌan gipis eꞌ, dakayuꞌ min dambilaꞌ, dakayuꞌ isab min dambilaꞌ. 28 Makahinang sigām saga tanggungan isab min kayu akasya pinutus maka bulawan.
29 Puwas eꞌ, bay sigām makahinang nsꞌllan landuꞌ asussi ya pamehed ai-ai pinasukuꞌ ma Tuhan, maka kamanyan ahamut. Bineyaꞌ eꞌ sigām kapandayan saga aꞌa ataꞌu angahinang pahamut.