38
Lapohan Pagtunuꞌan Kulban
1 Pagubus, aniyaꞌ lapohan pagtunuꞌan kulban tahinang eꞌ disi Besalel min kayu akasya. Magpasagiꞌ lambuna maka tahaꞌna, sangpūꞌ hꞌkka saliꞌ-saliꞌ. Nnom hꞌkka langkawna. 2 Aniyaꞌ saga pussuk-pussuk saliꞌ luwa tanduk bay tahinang ma duguna, dalos asal kayuna maka kayu ya pangahinangan baran lapohan. Jari taputus kamemonna maka dī tumbaga. 3 Tahinang isab min tumbaga baꞌanan kapanyapanna, buwat saga undam panaluran abu, saga kakagis, saga garul pangisihan lahaꞌ susumbaliꞌan, saga tutugsuk aheya, sampay saga pangisihan baga. 4 Aniyaꞌ pangayakan abu tahinang eꞌ sigām min tumbaga boꞌ pinasangon ni deyom lapohan min deyoꞌ paga-pagana, saga ma tongaꞌan kīdna. 5 Tasasal mpat gallang tumbaga pinehēꞌ ni dugu pangayakan kaꞌmpat, 6 maka tahinang isab saga tanggungan min kayu akasya taputus maka tumbaga. 7 In tanggungan itu bay pinasulug ni gallang ya ma kīd lapohan karuwambilaꞌ bang nihangkut. Lapohan itu bay tahinang min papan, saliꞌ luwa tuꞌung halam aniyaꞌ turungna.
Garul Pagailan
8 Pagubus, tahinang eꞌ disi Besalel garul pagailan maka patinggilanna. Ya tapagguna eꞌ sigām saga tumbaga angalinig, ya bay pagsasaminan saga karꞌndahan ya magtatabang ma atag lawang pagsosōran ni Tolda Pagsasabuhan.a
Halaman ma Lumaꞌ Pangarapan
9-15 Pasunuꞌ, tahinang eꞌ sigām halaman ma Lumaꞌ Pangarapan eꞌ, tahaꞌna duwampūꞌ maka limandꞌppa, luhana sangpūꞌ maka duwandꞌppa maka tongaꞌ. Aniyaꞌ kultina ahāp kakanaꞌna tahinang eꞌ sigām panasak halaman eꞌ, maka baꞌanan hāgna isab panagnatan. Duwa-duwampūꞌ heka hāg min bihingna tampal ni uttalaꞌ maka ni satan, sangpūꞌ isab min tōngna tampal ni sꞌddopan. Kamemon hāg itu bay nihinangan durukan min dī tumbaga maka sasabit pilak isab panagnatan kultina. In baran hāg isab bay nileboran pilak. Aniyaꞌ palabayan pagsōd-luwasan aꞌa tahinang ma tōng halaman tampal ni sobangan, maka aniyaꞌ kultina min karuwambilaꞌ lalabayan itu tꞌllu-tꞌllun dꞌppa maka tongaꞌ tahaꞌna. Aniyaꞌ isab hāg tꞌllu hekana jukup maka durukanna pinatꞌnnaꞌ ma dambilaꞌ maka dambilaꞌ. 16 Ahāp kakanaꞌ ma saga kakultinahan kamemon ya panasak halaman. 17 Tumbaga isab ya pangahinang durukan hāg, boꞌ dī pilak ya pangahinang saga sasabitna maka lebod-lebodna. Saga kōk hāg isab bay pinutusan pilak, maka pilak isab ya pangalebod ma batangna.
18 Manjari kultina ahāp kakanaꞌna ya tahinang eꞌ sigām panambol pagsosōran halaman eꞌ. Kabuldahan isab kultina itu eꞌ saga aꞌa magbubulda maka salban bilu, taluk maka keyat. Lambuna limandꞌppa, langkawna dandꞌppa maka tongaꞌ sin tongaꞌ, hatina dalangkaw kultina dakayuꞌ itu maka kultina ya panasak halaman. 19 Aniyaꞌ mpat hāg bay tahinang eꞌ saga aꞌa maghihinang panagnatan kultina panambol itu, maka mpat isab durukanna tahinang min tumbaga. Dī pilak ya pangahinangan sasabit hāg itu maka lebod-lebodna, maka pilak isab ya pamutus kōkna. 20 Dī tumbaga saga bale ya pangahengkotan Lumaꞌ Pangarapan maka baꞌanan kultina ma likusan halamanna.
Listahan Ai-ai ya Pangahinang Lumaꞌ Pangarapan
21 Na, ya na itu saga bulawan, pilak maka tumbaga ya tapaglagi eꞌ saga aꞌa maghihinang ma Lumaꞌ Pangarapan, ya pinagōnan isab Lumaꞌ Pagtauꞌan Paljanjiꞌan. Bay pinalista hekana eꞌ si Musa ma saga panubuꞌ si Libi. Si Itamar anak si Imam Harun ya tag-sohoꞌan ma sigām itu. 22 Si Besalel anak si Uri, mpu si Hūr min panubuꞌ si Yuda, ya pagbebeyaꞌan ma saga aꞌa maghihinang ma kamemon bay panohoꞌan PANGHŪꞌ-Yawe ma si Musa. 23 Ya paseheꞌ ma si Besalel si Oholeyab anak si Ahisamak min panubuꞌ si Dān. Aꞌa ya apanday magguhit suntuꞌan maka maghinang ai-ai ya hinangan tangan. Ataꞌu isab iya magbuldahan kakanaꞌ ahāp maka salban bilu, taluk maka keyat.
24 Na, ya bulawan bay niangkat eꞌ saga aꞌa Israꞌil panukbal sigām ma Tuhan, 29 talen maka 730 sekel.b Ya na bulawan bay pangahinang baꞌanan ai-ai ma Lumaꞌ Sussi (Timbangan saraꞌ agama ya pagtimbangan eꞌ.)
25-26 In pilak isab bay taꞌāꞌ min saga aꞌa Israꞌil ma waktu kapangitung heka sigām, saga 100 talen maka 1,775 sekelc bang tinimbang. (Timbangan saraꞌ agama ya pagtimbangan eꞌ.) Ya na pilak bay pamabayad ma kamemon saga kalꞌllahan Israꞌil sasuku sigām duwampūꞌ tahun umulna sampay pariyataꞌ. 603,550 puhuꞌ ya heka sigām bay taitung, maka tongaꞌ sekeld isab ya pamabayad ma sigām magkaniya-kaniya. 27 Manjari, in dahatus talen pilak aponod inān bay pinagguna pangahinang saga durukan hāg dahatus hekana ma Lumaꞌ Sussi maka ma kultinana. Manjari dakayuꞌ talen dī pilak tahinang dakayuꞌ durukan. 28 Pagubus, ningāꞌ eꞌ saga aꞌa maghihinang inān ya pilak aponod takapin, 1,775 sekel buhatna. Aniyaꞌ pinagguna eꞌ sigām pangahinang saga sasabit dī pilak ma saga hāg, aniyaꞌ bay pangalebod baran saga hāg, maka aniyaꞌ bay pamutus kōk hāg eꞌ.
29 In buhat tumbaga isab bay panukbal eꞌ saga aꞌa Israꞌil, 70 talen maka 2,400 sekel.e 30 Tapagguna eꞌ sigām pangahinang saga durukan hāg ma lawang Tolda Pagsasabuhan, maka lapohan tumbaga, jukup isab maka pangayakanna tumbaga maka kamemon kapanyapanna. 31 Tumbaga lullun ya tapangahinang saga durukan hāg ma sasak ya pangalikus halaman, maka ma labayan pagsōd-luwasanna. Tapangahinang du isab saga bale pangahengkotan baꞌanan kultina ya pangatop Lumaꞌ Pangarapan, maka saga kultina ya pangalikus halamanna.