39
Panꞌmmek saga Imam
1 Na aniyaꞌ saga sꞌmmek bay nihinang eꞌ disi Besalel min salban bilu, taluk maka keyat, panꞌmmek saga imam ya maghinang ma deyom Lumaꞌ Sussi. Aniyaꞌ isab sꞌmmek sussi nihinang eꞌ sigām pamasꞌmmek si Harun. Jari bineyaꞌ bay panohoꞌan PANGHŪꞌ-Yawe ma si Musa.
2 Tahinang epod eꞌ sigām min kakanaꞌ ahāp, binuldahan bulawan maka salban bilu, taluk maka keyat. 3 Ya bulawan eꞌ bay tinukul panipis toꞌongan boꞌ pinagsanggiꞌ-sanggiꞌ, jari pinalamud sanggiꞌanna ma salban bilu, taluk maka keyat. Aꞌa apanday ya makahinang. 4 Aniyaꞌ duwa sablayan pinatahiꞌ eꞌ sigām ni epod inān ma karuwambilaꞌna boꞌ ahāp tꞌnnaꞌna ma baran imam. 5 Aniyaꞌ sambung ahāp isab nihinang eꞌ aꞌa ataꞌu maghinang. Tahinang min kakanaꞌ ahāp boꞌ binuldahan sanggiꞌ bulawan maka salban bilu, taluk maka keyat. Magdalos sambung itu maka baran epod. Jari bineyaꞌ bay panohoꞌan PANGHŪꞌ ma si Musa.
6 Pagubus, aniyaꞌ duwa palmata oneka bay pinatꞌnnaꞌ ma kait bulawan boꞌ yampa niukilan maka ōn saga anak si Israꞌilb lꞌlla kasangpūꞌ maka duwa. Landuꞌ anahut ukilanna, saliꞌ ukilan singsing. 7 Aubus paꞌin, in palmata onek itu bay pinasangon ma sablayan epod eꞌ saga aꞌa maghihinang, ma atag bahana, supaya aniyaꞌ pangentoman ma saga anak si Israꞌil. Jari bineyaꞌ bay panohoꞌan PANGHŪꞌ ma si Musa.
8 Na aniyaꞌ puyuꞌ-daggaha tahinang eꞌ aꞌa taga-kapandayan, saliꞌ du hinanganna maka epod, hatina kakanaꞌ ahāp isina binuldahan bulawan maka salban bilu, taluk maka keyat. 9 In kakanaꞌ puyuꞌ inān bay nilupiꞌ duwa boꞌ amasagiꞌ, dahꞌkka tahaꞌna, dahꞌkka isab lambuna. 10 Na, aniyaꞌ saga palmata sangpūꞌ maka duwa hekana bay pinatꞌnnaꞌ eꞌ sigām ma dahuan puyuꞌ heꞌ. Pinagtād mpat, tꞌllu-tꞌllu heka palmata ma dantād. Palmata rubi (palmata alutu keyatna), topas (palmata kuning) maka berel (palmata jaliꞌ-jaliꞌ) ya ma tād diyataꞌ. 11 Palmata turkwis (palmata bilu magbꞌttik-bꞌttik), sappir (palmata alutu biluna) maka emeral (palmata alutuꞌ gaddungna) ya ma tād pasunuꞌ. 12 Palmata jasint (palmata bilu magbꞌttik-bꞌttik), agat (palmata magjaliꞌ-jaliꞌ kausun maka poteꞌ) maka amitis (palmata taluk) ya ma tād pasunuꞌ giꞌ. 13 Palmata krisolit (palmata biyaning), onek (palmata kausun jaliꞌ-jaliꞌ) maka jasper (palmata intan gaddung) ya ma tād deyoꞌ katapusan. 14 Manjari in sangpūꞌ maka duwa palmata itu bay niukilan saga ōn anak si Israꞌil lꞌlla, ōn aꞌa dakayuꞌ ma palmata dakayuꞌ pakaniya-kaniya. Ya ukilanna saliꞌ hantang ukilan singsing.
15 Pagubus, aniyaꞌ duwa kili-kili bulawan tinabid-tabid tahinang eꞌ saga aꞌa inān pangengkot puyuꞌ ni epod. 16-19 Tahinang isab duwa kait bulawan pinasipit ni sablayan epod min dahuanna, maka mpat singsing bulawan tinahiꞌ pehēꞌ ni mpat dugu puyuꞌ, min bukutna. Pagubus, ya tōng kili-kili bulawan bay niengkotan ni duwa singsing puyuꞌ, maka tōngna dakayuꞌ isab bay niengkotan ni duwa kait ya pamatꞌnnaꞌan palmata supaya pasangon ni sablayan epod min dahuan baha. 20 Aniyaꞌ isab tahinang eꞌ sigām duwa singsing saddī boꞌ yampa tinahiꞌ pehēꞌ ni tōng sablayan epod, ma atag sambungna. 21 Ya singsing puyuꞌ damuli itu bay niengkotan ni singsing epod maka lubid bilu boꞌ mbal angalambe puyuꞌ min baran imam. Jari bineyaꞌ eꞌ sigām bay panohoꞌan PANGHŪꞌ ma si Musa.
22 Pagubus, aniyaꞌ juba pangalapis epod tahinang eꞌ saga aꞌa magtꞌtꞌnnun min salban bilu halam aniyaꞌ lamudna. 23 Juba itu bay nihinangan lowang ma tꞌngngaꞌna, nilaꞌupan boꞌ mbal alꞌkkas ageseꞌ. 24 In kumpiꞌ juba isab bay pinaꞌari-ari maka buwaꞌ-buwaꞌ dalimaꞌ.c Salban bilu, taluk maka keyat ya pangahinang. 25 Aniyaꞌ isab bagting-bagting bulawan tahinang eꞌ saga aꞌa inān, pinagꞌllot-ꞌllot maka buwaꞌ-buwaꞌ dalimaꞌ ma kumpiꞌ juba. 26 In juba itu maka ari-arihanna wajib subay sinulug eꞌ imam alanga ma waktu kapagimamna tudju ni PANGHŪꞌ, buwat bay panohoꞌanna ma si Musa.
27 Manjari itu aniyaꞌ saga sꞌmmek kaseheꞌ tahinang pamadjuꞌ disi Harun maka saga anakna lꞌlla. Aniyaꞌ badjuꞌ ahāp kakanaꞌ tatꞌnnun heꞌ aꞌa apanday magtꞌnnun. 28 Aniyaꞌ saga sulban ahāp kakanaꞌna, maka porong, maka sauwal-sauwal ahāp isab tꞌnnunanna. 29 Aniyaꞌ isab sabitan tahinang min kakanaꞌ poteꞌ binuldahan maka salban bilu, taluk maka keyat. Jari bineyaꞌ bay panohoꞌan PANGHŪꞌ ma si Musa.
30-31 Katapusanna, aniyaꞌ tapak-tapak pangorona bay tahinang eꞌ saga aꞌa magsasasal min dī bulawan. Bay kaukilan isab kabtangan itu, ‘Sussi-manussi Pamasukuꞌ si Yawe.’ Ukilanna inān saliꞌ ukilan singsing. Pagubus itu, aniyaꞌ lubid bilu pinasangon ni korona inān pamaengkot iya ni dahuan sulban imam, buwat bay panohoꞌan PANGHŪꞌ-Yawe ma si Musa.
Si Musa Angaliling Kamemon bay Tahinang
32 Manjari itu, atemos na saga hinang kamemon bay pangahinang Lumaꞌ Pangarapan, hatina Tolda Pagsasabuhan PANGHŪꞌ maka manusiyaꞌ. Tabeyaꞌ eꞌ saga aꞌa Israꞌil kamemon bay panohoꞌan PANGHŪꞌ ma si Musa. 33 Tabowa eꞌ sigām pehēꞌ ni si Musa saga pagdayaw Lumaꞌ Pangarapan maka ai-aina kamemon. Tabowa toldana maka kapanyapanna kamemon. Tabowa saga kakansing, saga papagan dinding, saga babag, saga hāg isab maka baꞌanan durukan. 34 Tabowa saga kultina pangatop, ya kultina bay tahinang min kuwit bili-bili lꞌlla nianjibihan keyat, maka kultina kuwit duyung, maka kultina ya pangalikus Baꞌul. 35 Tabowa isab Baꞌul Pagtauꞌan Sulat Paljanjiꞌan, jukup maka tanggunganna maka turungna bulawan ya pangampunan dusa, 36 tabowa lamisahan pamatꞌnnaꞌan Tinapay Hadarat, jukup isab maka kapanyapanna. 37 Tabowa palitaꞌan bulawan maka sumbuhanna, jukup maka saga kapanyapan maka nsꞌllan pamakeyat ma iya. 38 Tabowa isab lamisahan panugtugan kamanyan, maka nsꞌllan sussi ya panganggꞌllal ma imam, maka kamanyan ahamut, maka kultina ya panambol pagsosōran ni Lumaꞌ Pangarapan. 39 Tabowa lapohan tumbaga maka pangayakanna, saga tanggunganna maka baꞌanan kapanyapanna, tabowa isab garul pangailan maka patinggilanna. 40 Tabowa isab saga kultina ya panasak ma halaman Lumaꞌ maka baꞌanan hāg maka durukanna, tabowa isab kultina ya panambol halaman. Tabowa saga lubid maka bale pangengkot sasak, ai-ai ya pinagguna heꞌ sigām pamatꞌngge Lumaꞌ Pangarapan, ya Pagsasabuhan Tuhan maka manusiyaꞌ. 41 Tabowa isab ni si Musa saga sꞌmmek tinꞌnnun ya panꞌmmek ma saga imam waktu paghinang sigām ma deyom Lumaꞌ Sussi, hatina saga sꞌmmek sussi ya pamakay imam Harun maka saga anakna lꞌlla ma waktu kapagimam sigām.