40
Pamatꞌngge Tolda ya Pangarapan Tuhan
1 Ajukup paꞌin kahinangan inān kamemon, angallam giꞌ PANGHŪꞌ-Yawe ma si Musa. 2 Yukna, “Patꞌnggehunbi na Lumaꞌ Tolda Pagsasabuhanku maka kaꞌam saga bangsa Israꞌil. Sahali bulan ya llaw pamatꞌnggebi, ma bulan panagnaꞌan tahun. 3 Tapatꞌngge paꞌin Lumaꞌ, patꞌnnaꞌunbi Baꞌul Pagtauꞌan Sulat Paljanjiꞌan ma deyomna toꞌongan, boꞌ likusin maka kultina. 4 Pareyomunbi lamisahan ya pamatꞌnnaꞌan tinapay, sinakap isab maka kapanyapanna. Pareyomunbi palitaꞌan bulawan maka tagamahunbi saga sumbuhanna. 5 Bowahunbi lamisahan panugtugan kamanyan boꞌ patꞌnnaꞌunbi ma dahuwan Baꞌul. Pagubus, tambolun bowaꞌ lawang Lumaꞌ maka kultina.
6 “Lapohan tumbaga ya pagtunuꞌan kulban, patꞌnnaꞌunbi ma halaman Tolda Pagsasabuhan ilu, ma anggopan pagsosōranna. 7 Patꞌnnaꞌunbi isab garul pagailan ma llotan Lumaꞌ maka lapohan pagtunuꞌan kulban eꞌ ati isihin boheꞌ. 8 Ubus, sasakinbi katilibut halaman maka pasangonunbi isab kultina panambol pagsosōranna.
9 “Na, ngāꞌunbi nsꞌllan sussi ati busuginbi Lumaꞌ Pangarapan maka kapanyapanna kamemon supaya pinasukuꞌ ma aku ya Tuhanbi, manjari asussi toꞌongan. 10 Busuginbi isab lapohan pagtunuꞌan kulban maka kapanyapanna boꞌ pinasukuꞌ ma aku, manjari mahasussi toꞌongan. 11 Ya du garul pagailan maka patinggilanna, busuginbi isab pamasukuꞌbi ma aku.
12 “Pagubus, bowahun si Harun maka saga anakna lꞌlla pehēꞌ ni pagsosōran Tolda Pagsasabuhan boꞌ pinandi maka boheꞌ. 13 Pasulugunbi ma si Harun saga sꞌmmek imam alanga. Busuginbi iya maka nsꞌllan sussi ati pasukuꞌunbi iya ma aku supaya iya tōp magimam ma matahanku. 14 Pabadjuꞌinbi isab saga anakna lꞌlla, 15 maka busuginbi sigām nsꞌllan buwat bay pamusugbi ma si Harun ya mmaꞌ sigām eꞌ, supaya sigām ginꞌllal imam maghinang ni aku. Manjari anatas kapagimam sigām magpangkat-mamangkat salama-lama.” Buwattēꞌ ya pagkallam Tuhan ma si Musa. 16 Na, bineyaꞌ eꞌ si Musa kamemon bay panohoꞌan PANGHŪꞌ-Yawe ma iya.
17 Sakali itu, in Lumaꞌ Pangarapan Tuhan bay pinatꞌngge eꞌ disi Musa ma waktu sahali bulan, bulan panagnaꞌan ma tahun karuwana min bay kaluwas sigām min lahat Misil. 18 Saga durukan hāg ya pinatꞌnnaꞌ eꞌ sigām dahū, boꞌ yampa saga papagan dinding, boꞌ babagna, boꞌ baꞌanan hāg ya pamabatukan kamemon. 19 Binꞌllat eꞌ sigām saga kultina maglapis-lapis pangatop kaluhaꞌan lumaꞌ. Pagubus, ya kultina akapal toꞌongan. Jari bineyaꞌ eꞌ sigām kamemon bay panohoꞌan PANGHŪꞌ ma si Musa.
20 Puwas eꞌ, ningāꞌ eꞌ si Musa saga papagan batu bay panulatan palman Tuhan boꞌ ninnaꞌ eꞌna ma deyom baꞌul. Binatuk paꞌin saga tanggungan ni baꞌul eꞌ, tinurungan eꞌna maka turung bulawan ya panaubatan dusa. 21 Pagubus, binowa baꞌul eꞌ si Musa ni deyom Lumaꞌ Pangarapan, ni deyom Bilik Mahasussi, ati pinasagnat eꞌna kultina pamalikus Baꞌul, buwat bay panohoꞌan PANGHŪꞌ ma iya.
22 Puwas eꞌ isab, in lamisahan pamatꞌnnaꞌan tinapay waꞌi pinaꞌatag eꞌ si Musa ma deyom Tolda Pagsasabuhan tampal ni satan, min luwasan kultina ya angalimbuhan baꞌul. 23 Jari pinatꞌnnaꞌ pahāp saga tinapay ma diyataꞌ lamisahan itu, ma matahan PANGHŪꞌ-Yawe, buwat bay panohoꞌan PANGHŪꞌ ma iya.
24 Ya du palitaꞌan bulawan, pinaꞌatag eꞌ si Musa ma deyom Tolda Pagsabuhan tampal ni uttalaꞌ boꞌ maganggop maka lamisahan tinapay. 25 Sakali pinatꞌnnaꞌ eꞌna palitaꞌan maka sumbuhanna mainaꞌan ma matahan PANGHŪꞌ-Yawe, buwat bay panohoꞌan PANGHŪꞌ ma iya.
26 Aubus paꞌin, in lamisahan bulawan bay pinatꞌnnaꞌ eꞌ si Musa ma deyom Tolda Pagsasabuhan, min dahuan kultina ya angalimbuhan baꞌul. 27 Jari mainaꞌan iya anugtug kamanyan ahamut, buwat bay panohoꞌan PANGHŪꞌ ma iya. 28 Ati pinasangon eꞌ si Musa kultina ya panambol Lumaꞌ Pangarapan.
29 Pagubus inān, ya lapohan pagtunuꞌan kulban bay pinaꞌatag eꞌ si Musa ma kasekotan lawang Lumaꞌ Pangarapan (ya na Tolda Pagsasabuhan) ati mainaꞌan iya anunuꞌ susumbaliꞌan pagkulban sigām ni Tuhan, pinabeyaꞌ isab ginisan tirigu, buwat bay panohoꞌan PANGHŪꞌ ma iya.
30 Ya garul aheya pagailan isab bay pinatꞌnnaꞌ eꞌ si Musa ma llot Tolda Pagsasabuhan maka lapohan pagkulbanan, boꞌ niꞌisihan eꞌna boheꞌ pagail. 31 Tapagguna boheꞌ itu eꞌ si Musa maka si Harun sampay isab saga anak si Harun pangoseꞌ tapeꞌ-tangan sigām, 32 waktu kapasōd sigām ni deyom Tolda Pagsasabuhan. Ya du ma waktu kapasekot sigām ni lapohan pagkulbanan, buwat isab bay panohoꞌan PANGHŪꞌ ma si Musa.
33 Pagubus inān, sinasakan eꞌ disi Musa halaman ma sakalibutan Lumaꞌ Pangarapan maka lapohan pagkulbanan eꞌ. Pinasangon isab kultina ya panambol pagsosōran ni halaman. Minnēꞌ atangbus eꞌ si Musa kamemon bay panohoꞌan PANGHŪꞌ ma iya.
Kasahayaꞌan si Yawe
34 Aubus paꞌin inaꞌan, magtūy katambunan Tolda Pagsasabuhan eꞌ gabun-Tuhan,a maka apꞌnnoꞌ deyomna eꞌ sahaya si Yawe. 35 Manjari mbal makasōd si Musa sabab inaꞌan gabun patapuꞌ ni diyataꞌ Lumaꞌ maka inaꞌan sahaya si Yawe ma deyomna.
36 Na, in bangsa Israꞌil, ma waktu kapaglatun-latun sigām min lahat dakayuꞌ ni dakayuꞌ, subay paꞌangkat gabun min diyataꞌ Lumaꞌ Pangarapan boꞌ yampa sigām pauntas. 37 Satꞌggol mbal paꞌangkat, mbal isab sigām pauntas min bay paglihanan sigām. 38 Inaꞌan gabun si Yawe ma diyataꞌ Lumaꞌ Pangarapan ma waktu llaw, inaꞌan isab api ma deyom gabun ma waktu sangom. Jari taꞌndaꞌ eꞌ kamemon saga aꞌa Israꞌil piꞌingga-piꞌingga paglatunan sigām.