50
1 Awapat paꞌin si Yakub, magtūy iya ginapus pahogot eꞌ anakna si Yusup. Tinangisan iya, siniyum isab baihuꞌna. 2 Pagpuwas, magpanohoꞌan si Yusup ma saga panday ya tendogna, sinōꞌ kinapul bangkay mmaꞌna. 3 Manjari aniyaꞌ mpatpūꞌ llaw ya tꞌggol sigām magkapul. Addat Misil koꞌ inān. Pitumpūꞌ llaw isab ya paghinang saga aꞌa Misil pagdukka sigām ma iya.
4 Atammat paꞌin paghinang eꞌ, ahꞌlling si Yusup ma saga tendog Piraꞌun, yukna, “Bang makajari, pasampayunbi lapalku itu pehēꞌ ni Piraꞌun, yukbi, 5 ‘Tuwan sultan, maraiꞌ paꞌin waktu mmaꞌku, bay aku pinasapa eꞌna. Bangkayna konoꞌ subay kinubul ma lahat Kanaꞌan, ma pagkubulan bay tagamahanna ma baranna. Jari makasapa aku, ya angkan subay beyaꞌku na. Angamuꞌ aku ma kaꞌa, Tuwan, bang paꞌin aku tugutannu pehēꞌ ni Kanaꞌan angubul mmaꞌku.’ Pabalik du aku piꞌitu bang aubus na.”
6 Ya sambung Piraꞌun ma si Yusup, “Makajari,” yukna. “Pehēꞌ na ka angubul mmaꞌnu. Beyaꞌun bay pagsapahannu maka iya.”
7 Manjari palanjal na si Yusup angubul mmaꞌna. Pabunyug isab ma iya kamemon saga tendog ya pagnakuraꞌan ma okoman Piraꞌun, ma deyom astanaꞌ ka atawa ma kaluhaꞌan lahat Misil. 8 Ya du pabunyug ma si Yusup saga dauranakanna maka saga aꞌa kamemon ya ma deyomanna. Tabeyaꞌ isab saga aꞌa bay ma deyoman mmaꞌ sigām. Ya sadja halam tabeyaꞌ kamanahutan maka baꞌanan hayop sigām. Tabba mainaꞌan ma Gosen. 9 Aniyaꞌ pagapiꞌ ma sigām saga aꞌa magkakaritun sampay saga aꞌa magkukuraꞌ. Jari landuꞌ aheka sigām bay maglurukan angubul mmaꞌ si Yusup.
10 Taꞌabut paꞌin sigām paggiꞌikan pai ma Atad, ma bihing sapaꞌ Jordan, magkarukkaꞌan sigām ma mmaꞌ si Yusup. Akosog sidda pagdukka sigām. Jari pitumbahangi ya tꞌggol paghinang si Yusup ma mmaꞌna ma atag inaꞌan. 11 Na pagꞌndaꞌ paghinang itu eꞌ saga bangsa Kanaꞌan ya maglahat mainaꞌan, yuk sigām, “Kaheya du paꞌin karukkaꞌan saga bangsa Misil eꞌ.” Angkan kaōnan lahat inān Abel Misraim.a
12 Na, bineyaꞌ eꞌ saga anak si Yakub buwat bay panohoꞌanna ma sigām. 13 Binowa bangkayna ni lahat Kanaꞌan boꞌ kinubul eꞌ sigām ma deyom songab batu ma tanaꞌ Makpela ya ma anggopan Mamre. Tanaꞌ inān bay tabꞌlli asal eꞌ si Ibrahim min si Epron bangsa Hīt boꞌ pagkubulan. 14 Na, takubul paꞌin, pabalik na disi Yusup ni lahat Misil, iya maka saga danakanna sampay sigām kamemon bay amunyugan mmaꞌna heꞌ.
Pinasannang eꞌ si Yusup Pangatayan saga Danakanna
15 Na, pagka amatay na mmaꞌ sigām, magisun-isun saga danakan si Yusup. Yuk sigām, “Kalu aniyaꞌ akon-akon tatauꞌ eꞌ si Yusup ma deyom atayna pasal kalaꞌatan kamemon bay tahinangtam ma iya. Painay bang kitam binalosan eꞌna?” 16 Manjari anambuku sigām pehēꞌ ni si Yusup, yuk-i, “Tuwan, ma halam lagiꞌ amatay Mmaꞌtam, aniyaꞌ bay panohoꞌanna. 17 Sinōꞌ ka tinambukuhan buwattitu: ‘Ampunun dauranakannu ma pasal dusa maka kalaꞌatan bay tahin ang sigām ma kaꞌa.’ Ya du ilu panambuku si Mmaꞌ ma kaꞌa. Manjari, Tuwan, itiyaꞌ kami parahing ma kaꞌa bang paꞌin kami ampunnu, pagka in kami itu ata Tuhan ya pagtuhanan mmaꞌtam.” Na, pagkale lapal itu eꞌ si Yusup, magtūy iya tatangis.
18 Puwas eꞌ, patampal saga danakanna ni si Yusup boꞌ yampa sigām pakꞌppang ni tanaꞌ ma mundaꞌanna. Ya lling sigām ma iya, “Tuwan, itiyaꞌ kami magpatiata ma kaꞌa.”
19 Sagōꞌ ya sambung si Yusup ma sigām, “Daꞌa kam tināw ma aku. Nggaꞌi ka aku ya magbayaꞌ, luwal Tuhan. 20 Bꞌnnal, alaꞌat asal bay maksudbi, sagōꞌ kahāpan ya panganggantiꞌ eꞌ Tuhan, ya angkan tahinang hinangku itu angalappasan manusiyaꞌ aheka min kamatay. 21 Angkan yukku ma kaꞌam, daꞌa kam agawa. Akuhanku balanjaꞌbi sampay saga kaꞌanakanbi.” Sakali asannang na pangatayan sigām ma sabab kahanunut bissala si Yusup eꞌ.
Kawapat si Yusup
22 Manjari mainaꞌan na paꞌin si Yusup patꞌnnaꞌ ma lahat Misil maka saga aꞌa kamemon bay ma okoman mmaꞌna. Allum iya sampay dahatus maka sangpūꞌ tahun umulna. 23 Taꞌabutna saga anak-mpu si Epraꞌim, maka tagibana isab mpu si Manasse min anakna si Makil.
24 Na, angabtang na si Yusup ma saga danakanna, yukna, “Aku itu araiꞌ na taꞌabut, sagōꞌ kaꞌam ilu tinabang du eꞌ Tuhan. Ma waktu sinōng binowa kam eꞌna paluwas min lahat itu tudju ni lahat bay panganjanjiꞌna ma kamattoꞌahantam disi Ibrahim, si Isaꞌak maka si Yakub.” 25 Jari pinasapa eꞌ si Yusup saga pagkahina panubuꞌ si Israꞌil (ya kaōnan isab si Yakub). “Sapahinbi aku,” yukna, “in toꞌolangku bowabi du bang taꞌabut waktu panabang Tuhan ma kaꞌam paluwas min lahat itu.”
26 Manjari awapat na si Yusup mainaꞌan ma Misil, dahatus maka sangpūꞌ tahun umulna. Kinapul bangkayna boꞌ yampa niꞌisi ni deyom lalungan.