49
Saga Kabtangan Pangꞌbba eꞌ si Yakub
1 Manjari nilinganan eꞌ si Yakub saga anakna kamemon. “Pasekot kam,” yukna, “patipun kam ni aku. Hakaꞌanta kam dangan maka dangan bang ai ya kasōnganbi ma tahun damuli.
2 Patipun kam saga anak si Yakub,
pakale kam ma pangabtang ya pangꞌbbahan kaꞌam eꞌ mmaꞌbi si Israꞌil.
3 Kaꞌa Rubin, anakku kasiyakahan,
anak min kosogku, paltandaꞌan pagkalꞌllaku.
Min kamemon saga anakku,
kaꞌa ya pagmakōkan akosog maka abantug.
4 Saguwāꞌ ya sallaꞌnu, bay pakaiyaꞌnu mmaꞌnu
pagka hulidnu hꞌndana dakayuꞌ.
Napsunu ilu saliꞌ dunuk mbal katiyaraꞌan,
angkan ka mbal na makalanga min dauranakannu.
5-6 Kaꞌam Simiyun maka Libi, dalimbang du kam.
Mbal aku bilahi palamud ma pagisunanbi,
mbal pasōd ni deyom palhimpunanbi.
Asapat kam angahublut pakokosbi
ma saukat apasuꞌ pangatayanbi.
Bang kam niastolan, magtūy kam amonoꞌ aꞌa,
tapengkolbi saga sapiꞌ mandangan ma halam sababna.
7 Bang paꞌin kam pinatꞌkkahan mulkaꞌ
ma sabab pangastolbi mbal tasangsang.
Pinapulak-palik saga panubuꞌbi
ma katilibutan lahat Israꞌil.
8 Na, kaꞌa Yahud,a pinudji du ka eꞌ saga dauranakannu.
Pasujud sigām pagmahaltabat ma kaꞌa.
Taraꞌugnu du palbantahannu.
9 Kaꞌa ilu ibarat halimaw asangpot kosogna.
Bang aubus eꞌna anꞌkkob hayop maka amangan
magtūy pahꞌnnat atuli ma tongod inaꞌan.
Halam aniyaꞌ makatawakkal pasekot anasat iya.
10 Saga panubuꞌnu, Yahud, sinusultan salama-lama.
Mbal alungay kapatutnu kapagsultan
sampay atꞌkka aꞌa dangan ya apatut pinaghulmatan.
Kapagbayaꞌanna saga kabangsa-bangsahan.
11 Kaengkotan kuraꞌna ni batang anggul,
ya ahāp suliganna min kamemon.
Ajatu toꞌongan baꞌanan buwaꞌ anggulna,
landuꞌ aheka boheꞌna bang tapꞌggaꞌ,
manjari pangandakdakan sꞌmmekna.
12 Matana arokot keyatna min boheꞌ anggul,
emponna apoteꞌ sidda min gatas.
13 Na, anakku si Sibulun, bihing tahik ya paglahatanna,
manjari paglalayohan kappal.
Aluha isab tanaꞌna, makaꞌabut sampay ni lahat Sidun.
14 Na, si Issakar, saliꞌ sapantun kuraꞌ akosog baranna,
pabahak sadja ma tꞌngngaꞌ duwaꞌanna.
15 Pagsayuna ahāp pabahakanna,
magtūy iya amuspus kosogna angahangkut.
Pagsayuna ahāp paglahatanna,
magtūy iya lillaꞌ pinaꞌata maghulas-magsangsāꞌ.
16 Anakku si Dān, amatꞌnnaꞌ hukuman abontol
ma saga aꞌana, pagka dapanubuꞌ sigām ma bangsa Israꞌil.
17 Ibarat iya sowa abisa patꞌnnaꞌ ma bihing lān.
Bang aniyaꞌ palabay minnaꞌan aꞌa magkuraꞌ,
tinanghab eꞌna kuraꞌ inān ma buliꞌ tapeꞌna
supaya pahantak ni buliꞌan aꞌa anguraꞌ heꞌ.
18 O Yawe, lagaranku waktu pangalappasnu ma aku.
19 Na, anakku si Gād isab,
nilangpasan koꞌ kaꞌa ilu eꞌ saga mundu,
sagōꞌ taturulnu sigām sampay kaꞌatuhannu.
20 Si Aser isab, alanab kinakan ya niāꞌ min tanaꞌnu,
kinakan ahāp nanamna patut pagkakan sultan.
21 Si Naptali isab,
saliꞌ sapantun usa dꞌnda bay pinalꞌppa min sasak.
Alingkat isab saga anakna.
22 Na, anakku si Yusup,
saliꞌ hantang poꞌon kayu ajatu toꞌongan buwaꞌna,
ya patomoꞌ asal ma bihing boheꞌ.
Palabung saga sanga sampay parambilaꞌ sasak.
23 Nirugpak iya eꞌ saga aꞌa magtakos panaꞌ,
nijingki iya eꞌ sigām.
24 Malaingkan atotog lꞌngngonna, ahogot eꞌna angꞌntan panaꞌ
ma sabab tabang min Tuhan Sangat Kawasa,
ya Tuhan pagtuhanan si Yakub.
Niupiksaꞌ iya eꞌ Tuhan, ya Batu-Lakit pasindungan bangsa Israꞌil.
25 Tinabang du si Yusup eꞌ Tuhanku ya pagtuhanan mmaꞌnu,
binarakatan ka eꞌ Tuhan Sangat Kawasa.
Kabuwanan ka kahāpan,
ulan min diyataꞌ langit, boheꞌ min deyom tanaꞌ,
kahāpan panganak maka kahāpan pamaruruꞌ.
26 In lidjikiꞌ pangamuꞌ-ngamuꞌanku kaꞌa itu
labi ahāp min lidjikiꞌ kabūd-būran, lidjikiꞌ bay min awal.
Mura-murahan, bang paꞌin saga lidjikiꞌ itu kamemon makani-si Yusup,
ya tapeneꞌ eꞌ Tuhan pinaliyu min dauranakanna.
27 Anakku isab si Benjamin,
aꞌa aesog iya, saliꞌ sapantun eroꞌ talun.
Subu-subu amangan ai-ai bay papatayna.
Abay kohap amahagiꞌ ai-ai bay tatabanna ma pagbonoꞌan.”
28 Na, ya du inaꞌan saga bangsa Israꞌil kasangpūꞌ maka duwa. Ya inaꞌan kabtangan bay pangꞌbba eꞌ si Yakub ma anakna kasangpūꞌ maka duwa, ya makatōpan sigām dangan maka dangan.
Kawapat si Yakub maka pagkubul ma iya
29-30 Manjari aniyaꞌ panohoꞌan pangꞌbba eꞌ si Yakub ma saga anakna heꞌ, “Itiyaꞌ aku araiꞌ na patipun ni kaꞌmboꞌ-mboꞌanku. Bang aku taꞌabut na, kubulunbi aku ma deyom songab batu bay pangubulan kaꞌmboꞌ-mboꞌanku. Inaꞌan ma lahat Kanaꞌan, ma tanaꞌ Makpela ya ma anggopan Mamre. Songab batu inān sampay tanaꞌna bay tabꞌlli eꞌ mboꞌku si Ibrahim min si Epron bangsa Hīt. 31 Inaꞌan mainaꞌan pagkubulan si Ibrahim maka hꞌndana si Sara, mmaꞌku si Isaꞌak maka inaꞌku si Ripka. Inaꞌan isab pagkubulanku hꞌndaku si Leya. 32 Ya tanaꞌ maka songab ilu bay tabꞌlli min saga bangsa Hīt.”
33 Aubus paꞌin eꞌ si Yakub angꞌbba panohoꞌanna inān ma saga anakna, magtūy iya pabahak boꞌ yampa abꞌkkat napasna. Hatina magtipun na iya maka kamattoꞌahanna.