14
Paghꞌnda si Samson
1 Asangpot paꞌin si Samson, pehēꞌ iya ni kauman Timna ati aniyaꞌ budjang bangsa Pilistin taꞌndaꞌna mainaꞌan. 2 Pagpoleꞌna, angahaka iya ni inaꞌ-mmaꞌna, yukna, “Makaꞌndaꞌ aku budjang Pilistin ma Timna. Pahꞌndaꞌunbi aku ma iya.”
3 Yuk sambung mattoꞌana, “Angay, Otōꞌ? Halam bahāꞌ aniyaꞌ dꞌnda ahāp min kakampunganta atawa min pagkahitam bangsa Israꞌil? Angay giꞌ ka subay maghꞌndaꞌan bangsa Pilistin, bangsa kapil lagiꞌ?”
Saguwāꞌ angalogos si Samson ma mmaꞌna, yuk-i, “Ngāꞌin aku, mmaꞌ, sabab iya ya kabayaꞌanku.” 4 (Halam kinataꞌuwan eꞌ mattoꞌa si Samson in bayaꞌna itu min kahandak si Yawe asal, supaya aniyaꞌ pagsababan pangatu bangsa Israꞌil ma bangsa Pilistin, sabab saga Pilistin ya magparintahan bangsa Israꞌil ma waktu inaꞌan.)
5 Dakayuꞌ llaw, pehēꞌ si Samson ni Timna magbeyaꞌ maka inaꞌ-mmaꞌna. Sabu sigām pasekot ni pagtanoman anggul ma atag kauman inān, pataggahaꞌ aniyaꞌ halimaw amanggohonga parugpak ni si Samson. 6 Manjari pahōp Rū Yawe ni si Samson amuwanan iya kosog, angkan tasꞌkkatna halimaw itu maka tanganna, buwat panꞌkkatna kambing abataꞌ. Saguwāꞌ halam bay tahaka pakaradjaꞌan itu ni mmaꞌna atawa inaꞌna. 7 Pagubus, palanjal iya ni Timna anuli-nulihan dꞌnda heꞌ, maka pasōng gom paꞌin bayaꞌna ma iya.
8 Palabay paꞌin daka pilangꞌllaw, pabalik na si Samson ni Timna boꞌ angawinan dꞌnda heꞌ. Ma labayan lagiꞌ, pasihaꞌ iya angꞌndaꞌ ni bangkay halimaw. Pagꞌndaꞌna, na, angulatap eꞌ baꞌanan buwani maka aniyaꞌ isab gulaꞌ. 9 Niakup gulaꞌ itu eꞌ si Samson boꞌ kinakan eꞌna ma palꞌngnganan. Binuwanan isab saga mattoꞌana, maka ya du sigā bay amangan. Saguwāꞌ halam sigā bay hakaꞌanna in gulaꞌ buwani inān bay ningāꞌ min bangkay halimaw.
10 Sakali itu, pehēꞌ na mmaꞌ si Samson ni lumaꞌ dꞌnda. Aniyaꞌ isab paglami-lami pinaniyaꞌ eꞌ si Samson sabab ya na addat sigām bang lꞌlla song kinawin. 11 Pagtꞌkka si Samson, pinaseheꞌan iya tꞌllumpūꞌ lꞌlla Pilistin.
12 Yuk si Samson ni saga aꞌa itu, “Aniyaꞌ pamatokodku ma kaꞌam. Bang tatokodbi ma deyom pitungꞌllaw ya paglami-lami itu, buwananta kam tꞌllumpūꞌ heka kakanaꞌ ahāp maka tꞌllumpūꞌ pangampuꞌan sꞌmmek. 13 Saguwāꞌ bang mbal tatokodbi, kaꞌam ya subay amuwanan aku tꞌllumpūꞌ heka kakanaꞌ ahāp maka tꞌllumpūꞌ pangampuꞌan sꞌmmek.”
“Na,” yuk sigām, “pēꞌun. Bilahi kami akale tokod-tokodnu ilu.”
14 Ahꞌlling si Samson, yuk-i,
“Min sattuwa magtatanggal, aniyaꞌ pagkakan.
Min sattuwa akosog, aniyaꞌ kamamisan.”
Jari halam tatokod eꞌ saga aꞌa itu ma deyom tꞌllungꞌllaw.
15 Taꞌabut paꞌin kaꞌmpat llawna, ahꞌlling sigām ni hꞌnda si Samson, yuk-i, “Pipitin hꞌllanu angahakaꞌan kami pasal tokod-tokod ilu bang ai kataluwaꞌanna. Bang ka mbal, tunuꞌ kami kam kamemon ya ma okoman mmaꞌnu. Bay bahāꞌ kami abbitbi piꞌitu supaya langpasanbi?”
16 Angkan pagapus hꞌnda si Samson ni iya maka eꞌna anangis. Yukna, “Kabꞌnsihannu na aku! Mbal aku kalasahannu. Bay ka amatokod ma saga kampungku sagōꞌ halam aku hakaꞌannu bang ai kataluwaꞌanna.”
Yuk sambung si Samson, “Minsan mattoꞌaku halam bay hakaꞌanku, ya lagiꞌna bahāꞌ kaꞌa?” 17 Ati anangis hꞌnda si Samson animpus ma deyom pitungꞌllaw paglami-lami. Manjari, taꞌabut llaw kapituꞌna, nihakaꞌan iya pasal tokod-tokod inān sabab sinumu na pinogos si Samson. Angahaka isab dꞌnda inān ni saga kampungna pasal kataluwaꞌan tokod-tokod eꞌ.
18 Na, abay kohap paꞌin ma llaw kapituꞌna, ahꞌlling ni si Samson saga aꞌa kauman inān, yuk-i,
“Aniyaꞌ bahāꞌ paliyu mamisna min gulaꞌ buwani?
Aniyaꞌ bahāꞌ akosog min halimaw?”
Ahꞌlling si Samson ni sigām magparalilan,
“Bang halam bay gunabi sapiꞌku dꞌnda pangararubi,
mbal tatokodbi bay pamatokodku ma kaꞌam.”
19 Jari pahōp Rū Yawe ma si Samson ati palūd iya ni daꞌira Askelon amapatay saga kalꞌllahan tꞌllumpūꞌ puhuꞌ. Nihurusan eꞌna kapanyapan maka panꞌmmek sigām boꞌ pamuwanna ma saga aꞌa ya bay makatokod heꞌ. Magtūy iya amoleꞌ ni lumaꞌ mmaꞌna ma masi akagit atayna. 20 Ati in hꞌnda si Samson bay pamahꞌnda ma lꞌlla ya bay panonna ma pagkawinan.