13
Kapaganak ma si Samson
1 Pabalik na isab saga aꞌa Israꞌil maghinang kalaꞌatan ya landuꞌ asammal ma pangꞌndaꞌ PANGHŪꞌ-Yawe, angkan sigām tugutanna ni komkoman bangsa Pilistin ma deyom mpatpūꞌ tahun. 2 Na, aniyaꞌ aꞌa Sora niōnan si Manowa, min panubuꞌ si Dān. Taga-hꞌnda iya mbal makaꞌanak. 3 Sakali magpaꞌndaꞌ ni dꞌnda itu malaꞌikat si Yawe boꞌ ahꞌlling, yukna, “Kaꞌa ilu, minsan ka halam bay makaꞌanak, angiram du ka boꞌ ka anganak lꞌlla. 4 Ya pangamay-ngamayku ma kaꞌa, daꞌa ka anginum binu atawa ai-ai makalango. Daꞌa ka amangan isab saga pagkakan ya mbal tahalal, 5 sabab angiram du ka maka anganak ka lꞌlla. Buꞌunna ilu subay mbal ginuntingan sabab Nasiria iya, aꞌa pinasukuꞌ ni Tuhan min llaw kapaganak ma iya. Tinagnaꞌan eꞌna kapangalappas bangsa Israꞌil min komkoman bangsa Pilistin.”
6 Jari pehēꞌ na dꞌnda angahaka ni hꞌllana, yuk-i, “Aniyaꞌ sosohoꞌan Tuhan bay magpaꞌndaꞌ ni aku. Ya pangluwahanna saliꞌ malaꞌikat Tuhan, makatāw-tāw. Halam iya bay tatilawku bang mꞌnningga, maka halam iya bay angōnan di-na. 7 Saguwāꞌ ya llingna ma aku, ‘Angiram du ka maka anganak ka lꞌlla.’ Sinōꞌ aku daꞌa anginum binu atawa ai-ai makalango, maka sinōꞌ daꞌa amangan pagkakan mbal tahalal, sabab in ondeꞌ itu Nasiri, pinasaddī min kaseheꞌan boꞌ ma Tuhan sadja min llaw kapaganak ma iya sampay ni waktu kamatayna.”
8 Sakali angamuꞌ-ngamuꞌ si Manowa ni PANGHŪꞌ, yukna, “Bang paꞌin tugutannu aꞌa Tuhan pabīng piꞌitu amanduꞌan kami supaya kami ataꞌu pasal pangayuput ondeꞌ ya song nianakan.”
9 Na, kinale si Manowa eꞌ Tuhan ati pabalik malaꞌikatna boꞌ panyataꞌ ni dꞌnda hinabuna maghinang ma huma. Sagōꞌ halam mainaꞌan hꞌllana, 10 angkan iya magdaiꞌ-daiꞌ pehēꞌ angahaka. Yukna, “Itiyaꞌ lꞌlla ya bay magpaꞌndaꞌ ni aku llaw heꞌ-i.”
11 Pagubus, pabuhat si Manowa boꞌ paturul ni hꞌndana. Pagsekotna paꞌin ni aꞌa inān, yukna, “Kaꞌa bahāꞌ ya bay amowa magbissala ma hꞌndaku?”
“Ahoꞌ, aku,” yukna.
12 Atilaw giꞌ si Manowa, yuk-i, “Bang atuman na ya pangallamnu, ai na paꞌin saga hatulan panunuran kami ma ondeꞌ itu ma kapagaꞌana?”
13 Yuk sambung malaꞌikat Yawe, “Subay bineyaꞌ kamemon ya bay pahꞌllingku ma hꞌndanu. 14 Subay iya mbal amangan ai-ai taꞌāꞌ min tinanom anggul, subay mbal anginum binu atawa inuman ai-ai makalango, maka subay mbal amangan ai-ai ya mbal halal. Wajib bineyaꞌ eꞌna kamemon bay panohoꞌanku ma iya.”
15 Yuk si Manowa ni malaꞌikat, “Bang manjari, daꞌa giꞌ ka alaꞌan. Angadjal lagiꞌ kami dakayuꞌ anak kambing boꞌ aniyaꞌ kakannu.”
16 Yuk sambung malaꞌikat inān, “Minsan aku taggahanbi, mbal aku amangan pagkakanbi. Sagōꞌ bang kam anakap pagkulban tinunuꞌ, na, tukbalinbi ni si Yawe.” (Halam tasayu eꞌ si Manowa in aꞌa inān malaꞌikat si Yawe.)
17 Atilaw isab si Manowa ni malaꞌikat, yukna, “Sai ōnnu? Sabab bilahi kami amaheya kaꞌa bang tatuman na ya bay pangallamnu ilu.”
18 Yuk sambungna, “Angay tilawnu ōnku? Mbal toꞌongan tahati eꞌ manusiyaꞌ.” 19 Pagubus, bay angāꞌ si Manowa dakayuꞌ anak kambing, beyaꞌ isab maka tutukbalan tirigu, ati sinumbaliꞌ eꞌna ma diyataꞌ batu pangahulmatna ni PANGHŪꞌ-Yawe. Pataggahaꞌ, aniyaꞌ hinang makainu-inu tahinang eꞌ PANGHŪꞌ sabu angꞌndaꞌ si Manowa maka hꞌndana. 20 Aniyaꞌ api pasuleyab min pagtutukbalan inān tudju ni diyataꞌ langit. Pasaltaꞌ, in malaꞌikat si Yawe ameyaꞌ paꞌangkat. Pagꞌndaꞌ si Manowa maka hꞌnda, magtūy sigā pasujud. 21 Pagka malaꞌikat inān halam na magpaꞌndaꞌ pabalik ni sigā maglakibini, minnēꞌ tataꞌu eꞌ si Manowa malaꞌikat Yawe koꞌ inān.
22 Ahꞌlling si Manowa ni hꞌndana, yukna, “Amatay koꞌ kita itu, sabab taꞌndaꞌta Tuhan!”
23 Saguwāꞌ anambung hꞌndana, “Bang bay aniyaꞌ niyat PANGHŪꞌ amapatay kita, mbal tinaimaꞌ tutukbalan susumbaliꞌan maka tirigu ya bay ungsuranta ni iya. Mbal kita bay pinaꞌndaꞌan saga pakaradjaꞌan itu, maka mbal bay nihakaꞌan pasal maksudna.” 24 Pagubus, in dꞌnda itu bay anganak lꞌlla, ati Samson ya pangōnna ma iya. Pasulig na paꞌin ondeꞌ inān maka taptap binarakatan eꞌ PANGHŪꞌ-Yawe. 25 Anagnaꞌ isab Rū Yawe pahōp ma iya hinabuna ma kauman Mahane-Dān, ya ma llot Sora maka Estaꞌol.