12
Si Jepta maka Bangsa Epraꞌim
1 Na, pinatimuk eꞌ panubuꞌ si Epraꞌim saga aꞌa sigām magbobonoꞌ boꞌ pauntas tudju ni lahat Sapon. Aniyaꞌ lapal pinabeyaꞌ eꞌ sigām ni si Jepta, yuk-i, “Angay ka halam bay mikitabang ma kami, waktu kapehēꞌbi magbonoꞌ maka bangsa Ammon? Tunuꞌ kami lumaꞌnu sampay kaꞌam magtautaiꞌ-anak.”
2 Ya sambung si Jepta, “Bay na kam palingananku tagnaꞌ kapagsaggaꞌ kami maka bangsa Ammon eꞌ, saguwāꞌ halam kami bay gapiꞌbi angatu ma sigām. 3 Pagtaꞌuku in kaꞌam mbal du anabang, bay panūkku kaꞌllumku angatuhan bangsa Ammon ma halam aniyaꞌ pagapiꞌ. Ati min kahandak si Yawe bay aku angandaꞌug. Jari angay giꞌ kam piꞌitu buwattinaꞌan amowa aku magbonoꞌ?”
4 Magtūy pinatimuk eꞌ si Jepta saga aꞌa Giliyad boꞌ magbonoꞌ maka panubuꞌ si Epraꞌim, ati angandaꞌug disi Jepta. Minnēꞌ kabalosan saga aꞌa Epraꞌim ma bay pagsambatan sigām, ya yuk-i, “Ē, kaꞌam saga aꞌa Giliyad, halam aniyaꞌ pūsbi, sapantun kam sꞌggit tinimanan eꞌ pagkahibi panubuꞌ Epraꞌim maka Manasse.” 5 Kapagbayaꞌan eꞌ aꞌa Giliyad kababawan sapaꞌ Jordan, ya palabayan tudju ni lahat Epraꞌim. Jari bang aniyaꞌ aꞌa Epraꞌim bay min pagbonoꞌan atꞌkka ni sapaꞌ heꞌ, boꞌ mikipalintas parambilaꞌ, tinilaw iya eꞌ saga aꞌa Giliyad, yuk-i, “Panubuꞌ si Epraꞌim ka bahāꞌ?” Bang yukna “Nggaꞌi ka,” 6 na, sinulayan iya eꞌ saga aꞌa Giliyad. Sinōꞌ iya angabtang ‘Syibolet.’ Sagōꞌ bang aꞌa inān mbal makakabtang pabontol ati yukna ‘Sibolet,’ magtūy iya sinaggaw eꞌ aꞌa Giliyad boꞌ pinapatay ma atag sapaꞌ Jordan. Mpatpūꞌ ka duwangibu heka panubuꞌ Epraꞌim ya bay tapapatay ma waktu pagbonoꞌ heꞌ.
7 Nnom tahun ya tꞌggol si Jepta magnakuraꞌan bangsa Israꞌil. Amatay paꞌin iya, kinubul iya ma atag kalumaꞌanna ma lahat Giliyad.
Si Ibsan, si Elon maka si Abdon
8 Manjari, si Ibsan aꞌa Betlehem ya pasunuꞌ magnakuraꞌan bangsa Israꞌil. 9 Taga-anak iya lꞌlla tꞌllumpūꞌ puhuꞌ, maka tꞌllumpūꞌ isab anakna dꞌnda. Pinahꞌllaꞌan eꞌna saga anakna dꞌnda ni panubuꞌ saddī. Damikiyanna saga anakna lꞌlla, bay ningāꞌan dꞌnda min panubuꞌ saddī pamahꞌnda sigām. Pituntahun ya tꞌggol si Ibsan magnakuraꞌ ma bangsa Israꞌil. 10 Amatay paꞌin iya, kinubul iya ma Betlehem.
11 Si Elon panubuꞌ Sibulun ya pagantiꞌ min si Ibsan magnakuraꞌ ma bangsa Israꞌil. Sangpūꞌ tahun ya tꞌggol kapagnakuraꞌna. 12 Amatay paꞌin si Elon, kinubul iya ma Ayjalon ma lahat Sibulun.
13 Amatay paꞌin si Elon, si Abdon anak si Hellel, aꞌa min Piratun, ya pagantiꞌ magnakuraꞌan bangsa Israꞌil. 14 Taga-anak iya lꞌlla mpatpūꞌ hekana, maka mpu lꞌlla tꞌllumpūꞌ hekana. In sigām pitumpūꞌ puhuꞌ itu bay ameyaꞌ pakaniya-pakaniya ma kuraꞌ. Waluntahun ya tꞌggol kapagnakuraꞌ si Elon ma bangsa Israꞌil. 15 Jari amatay paꞌin iya, kinubul iya ma Piratun-Epraꞌim, ma kabūran ya paglahatan saga bangsa Amalek.