11
1 Na aniyaꞌ aꞌa Giliyad, ōnna si Jepta, dakayuꞌ magbobonoꞌ landuꞌ aesog. Mmaꞌna si Giliyad, inaꞌna dꞌnda pinagtatambahan. 2 Aniyaꞌ isab saga anak si Giliyad lꞌlla min hꞌndana poꞌon. Jari asangpot paꞌin saga kaseheꞌan anakna, tinꞌggal eꞌ sigām si Jepta. Yuk sigām ma iya, “Mbal ka makahampit pusakaꞌ min mattoꞌa kami, sabab anak ka min saddī inaꞌ.” 3 Angkan alahi si Jepta min saga danakanna boꞌ patꞌnnaꞌ ma lahat Tōb, ati aniyaꞌ baꞌanan aꞌa bulaꞌug-bulaꞌug bay pabeyaꞌ ma iya.
4 Palabay paꞌin waktu, pagka angandugpak na bangsa Ammon ni bangsa Israꞌil, 5 pehēꞌ saga pagmattoꞌahan Giliyad ni lahat Tōb boꞌ angāꞌ si Jepta. 6 Yuk sigām ma iya, “Daiꞌ ka, kaꞌa ya magnakuraꞌan kami boꞌ kaꞌatuhan bangsa Ammon.”
7 Anambung si Jepta ni sigām, yukna, “Nggaꞌi bahāꞌ kaꞌam ya bay abꞌnsihan aku maka anꞌggal aku min okoman mmaꞌku? Angay aku pangamuꞌanbi tabang buwattinaꞌan pagka kam ma deyom kasigpitan na?”
8 Jari makapahꞌlling ma iya saga pagmattoꞌahan Giliyad, yuk-i, “Ahoꞌ bꞌnnal, sagōꞌ itiyaꞌ kami angamuꞌ tabang ni kaꞌa ma buwattinaꞌan. Gapiꞌin kami boꞌ kitam makaꞌatu ma bangsa Ammon. Jari kaꞌa na ya magnakuraꞌan kamemon saga maglalahat ma Giliyad.”
9 Yuk sambung si Jepta, “Bang aku saupama bowabi angatuhan bangsa Ammon, boꞌ aku pinaraꞌug eꞌ PANGHŪꞌ-Yawe, pagnakuraꞌanbi toꞌongan bahāꞌ aku?”
10 Yuk sambung saga pagmattoꞌahan inān, “Si Yawe ya saksiꞌtam, beyaꞌ kami toꞌongan bang ai panohoꞌannu.” 11 Angkanna ameyaꞌ na si Jepta ma saga pagmattoꞌahan Giliyad inān boꞌ tahinang pagmakōkan maka pagnakuraꞌan sigām. Ma Mispa paꞌin sigām, binalikan eꞌ si Jepta ma matahan PANGHŪꞌ-Yawe kamemon bay pahꞌllingna ma saga aꞌa Giliyad.
12 Pagubus, aniyaꞌ saga aꞌa sinohoꞌ eꞌ si Jepta amowa lapal ni sultan bangsa Ammon, yuk-i, “Ai poꞌon-sababna ya angkan dugpakbi lahat kami?”
13 Yuk sambung sultan inān ni saga sosohoꞌan si Jepta, “Ma waktu bay kalaꞌan bangsa Israꞌil min lahat Misil, taꞌagaw eꞌ sigām tanaꞌku tinagnaꞌan min sapaꞌ Arnon ni sapaꞌ Jabbok, sampay isāb ni bihing sapaꞌ Jordan. Angkan yukku ma kaꞌam, pabalikunbi tanaꞌ inān ni aku ma halam palsaggaꞌan.”
14 Jari pinabīng pehēꞌ saga sosohoꞌan si Jepta, sinōꞌ amowa lapalna dakayuꞌ itu ni sultan bangsa Ammon. 15 Yuk-i, “Ya itu pangallam si Jepta: In bangsa Israꞌil halam bay angagaw tanaꞌ bangsa Mowab atawa bangsa Ammon. 16 Ma waktu kalaꞌan sigām min lahat Misil, in bangsa Israꞌil bay atꞌkka ni Tahik Keyat labay min lahat paslangan, boꞌ pasampay isāb ni lahat Kades. 17 Ma Kades paꞌin, aniyaꞌ sosohoꞌan bay pinapehēꞌ eꞌ bangsa Israꞌil ni sultan bangsa Edom amaꞌid min iya bang paꞌin dūlanna sigām palabay min lahatna. Saguwāꞌ halam sigām bay kinale eꞌ sultan Edom eꞌ. Damikiyanna isāb in sultan bangsa Mowab, mbal amarūl. Angkan bay patꞌttog saga aꞌa Israꞌil ma Kades.
18 “Pagubus, pauntas na sigām minnēꞌ labay min paslangan. Nilibut eꞌ sigām lahat Edom maka bihing Mowab tampal ni sobangan. Taꞌabut paꞌin sapaꞌ Arnon, magpustu sigām ma dambilaꞌna. Halam sigām bay palintas pabalik ni dambilaꞌ sapaꞌ boꞌ pasōd ni lahat Mowab. 19 Na, mainaꞌan paꞌin saga aꞌa Israꞌil ma sapaꞌ Arnon, aniyaꞌ saga sosohoꞌan pinapehēꞌ eꞌ sigām ni si Sihon ya sultan bangsa Amor. Hesbon ya lahat pagsultananna. Jari amaꞌid min iya saga sosohoꞌan bangsa Israꞌil eꞌ, yuk-i, ‘Tuwan sultan, bang makajari, tugutin kami palabay min lahatbi tudju ni lahat kami.’ 20 Sagōꞌ mbal bilahi si Sihon sabab mbal angandol ma saga aꞌa Israꞌil. Gom paꞌin pinatimuk eꞌna ma lahat Jahas kamemon saga aꞌana magbonoꞌ boꞌ angandugpak bangsa Israꞌil. 21 Malaingkan si Yawe, ya pagtuhanan bangsa Israꞌil, bay amaraꞌug sigām min si Sihon maka saga aꞌana. Taꞌagaw eꞌ saga aꞌa Israꞌil tanaꞌ saga aꞌa Amor ma lahat inān. 22 Kalongkopan eꞌ sigām tanaꞌ Amor kamemon, tinagnaꞌan min sapaꞌ Arnon sampay ni sapaꞌ Jabbok, min lahat paslangan isāb sampay ni sapaꞌ Jordan.
23 “Hatina,” yuk lapal si Jepta ni sultan Ammon, “si Yawe ya Tuhan bangsa Israꞌil bay anꞌggal bangsa Amor boꞌ pamuwanna lahat sigām ni saga aꞌa sukuꞌna. Jari ai kapatutnu angāꞌ tanaꞌ inān pabalik? 24 Dapuhunbi pila-pila ya pamuwan kaꞌam eꞌ tuhanbi si Kemos. Damikiyanna kami itu, dapu kami ai-ai bay pamuwan kami eꞌ si Yawe ya pagtuhanan kami. 25 Angay, paliyu lagiꞌ bahāꞌ gaꞌosannu min si Balak anak si Sippor, ya sultan Mowab? Aniyaꞌ bahāꞌ bay palsaggaꞌanna maka pagbonoꞌanna maka bangsa Israꞌil? 26 Aniyaꞌ na tꞌllu hatus tahun ya tꞌggol katꞌnnaꞌ saga bangsa Israꞌil ma Hesbon, ma Arowel maka ma kalumaꞌan ma jadjahanna, beyaꞌ isāb saga kauman ma bihing sapaꞌ Arnon. Angay halam bay bawiꞌbi paltanaꞌanbi ma deyom tꞌllu hatus tahun eꞌ? 27 Halam aniyaꞌ kasāꞌanku ma kaꞌam, saguwāꞌ kaꞌam ya makasāꞌ ma aku ma pamowabi magbonoꞌ. Pasalassayta palkalaꞌ itu ma si Yawe ya Maghuhukum, ati iya ya ameneꞌ bang sai taga-kapatut, kaꞌam ka bangsa Ammon atawa kami bangsa Israꞌil.” 28 Saguwāꞌ in sultan Ammon mbal angasip ma lapal ya bay pinabeyaꞌan iya eꞌ si Jepta.
29 Jari patongod Rū Yawe ma si Jepta ati pauntas iya min lahat Giliyad maka Manasse, boꞌ palabay isāb min Mispa-Giliyad. Palanjal iya minnēꞌ boꞌ angatuhan bangsa Ammon. 30 Pagubus, anganajal si Jepta ni PANGHŪꞌ-Yawe, yukna, “Ya Tuhan, bang tugutannu in bangsa Ammon ni komkomanku, 31 ya itu pagnajalku, ‘Sai-sai paluwas dahū min lumaꞌku anampang bang aku amoleꞌ na min pangandaꞌugku min bangsa Ammon, pamasukuꞌku du ni kaꞌa. Tunuꞌku isāb pagkulban ni kaꞌa.’ ”
32 Na, pehēꞌ na si Jepta magbonoꞌ maka bangsa Ammon ati pinaraꞌug iya eꞌ PANGHŪꞌ-Yawe. 33 Taligis eꞌ si Jepta duwampūꞌ kauman ya paglahatan bangsa Ammon, tinagnaꞌan min Arowel sampay ni kasekotan lahat Minnit. Taꞌabut isāb lahat Abel-Keramim, taraꞌug eꞌ bangsa Israꞌil bangsa Ammon ati halam na gaꞌosan sigām.
34 Na, makapoleꞌ paꞌin si Jepta ni patꞌnnaꞌanna ma Mispa, anakna dꞌnda ya paluwas anampang iya, maka heꞌna angigal maka angandapuꞌ tambul-tambulna. Anakna tunggalan koꞌ inān. Halam aniyaꞌ anak si Jepta saddī min iya, dꞌnda ka atawa lꞌlla. 35 Pagꞌndaꞌ paꞌin si Jepta ma anakna itu, magtūy geseꞌna badjuꞌna. Maglemong iya, yukna, “Allō! Anakku! Arung, asukkal aku ma pasalannu sabab aniyaꞌ najalku ni PANGHŪꞌ-Yawe mbal kapindahanku.”
36 Ya sambung anakna, “Mmaꞌ, pagka ka bay makajanjiꞌ ni si Yawe, hinangun ma aku buwat bay tanajalnu. Sabab bay ka pinaraꞌug eꞌna min bantanu bangsa Ammon. 37 Na mmaꞌ, aniyaꞌ sadja amuꞌku ni kaꞌa, bang paꞌin aku dūlannu angalunsulan kabūd-būran ma deyom duwambulan. Pehēꞌ aku magdukka maka saga panonku dꞌnda sabab aku itu mbal na makapaghꞌlla.”
38 Yuk si Jepta, “Ahoꞌ arūng, pehēꞌ na ka.” Angkan pinasagaran iya ma deyom duwambulan. Magbeyaꞌ iya maka saga bagayna kabudjangan angalunsul ma kabūd-būran. Magdukka na paꞌin sigām sabab mbal na iya makapaghꞌlla. 39 Palabay paꞌin duwambulan eꞌ, pabalik iya ni mmaꞌna ati bineyaꞌ eꞌ si Jepta bay najalna. Budjang lagiꞌ iya.