10
Si Tola
1 Na, awapat paꞌin si Abimelek, aniyaꞌ lꞌlla niōnan si Tola pasꞌlleꞌ angalappas bangsa Israꞌil. Si Tola itu anak si Puwa, ya Puwa bay anak si Dodo, min panubuꞌ si Issakar. Patꞌnnaꞌ iya ma kalumaꞌan Samir ma kabūd-būran Epraꞌim. 2 Saga duwampūꞌ ka tꞌlluntahun tꞌggol si Tola magmakōk ma bangsa Israꞌil. Pagpatayna paꞌin, kinubul iya ma Samir.
Si Jaꞌir
3 Ya pasunuꞌ ni si Tola si Jaꞌir aꞌa Giliyad. Duwampūꞌ ka duwantahun kapagmakōkna ma bangsa Israꞌil. 4 Taga-anak iya lꞌlla tꞌllumpūꞌ puhuꞌ, ya pakuraꞌ ma tꞌllumpūꞌ kuraꞌ. Kapagagihan eꞌ sigām tꞌllumpūꞌ heka daꞌira ma lahat Giliyad, ya pinagōnan Kakauman si Jaꞌir sampay ni kabuwattinaꞌanan. 5 Amatay paꞌin si Jaꞌir, kinubul iya ma Kamun.
Si Jepta
6 Pabalik na isāb saga bangsa Israꞌil maghinang kalaꞌatan ya landuꞌ asammal ma pangꞌndaꞌ si Yawe. Sinumba eꞌ sigām saga tuhan-tuhan Baꞌal maka Astoret, maka baꞌanan tuhan-tuhan ya tinaꞌat eꞌ bangsa Aram, bangsa Sidun, bangsa Mowab, maka bangsa Pilistin. Kataikutan eꞌ sigām si Yawe ya Tuhan sigām, mbal na magtaꞌat ma iya, 7 angkan akagit atayna ma sigām. Sinōngan sigām eꞌna ni gaꞌosan bangsa Pilistin maka bangsa Ammon, 8 ya angalaꞌug maka amissokoꞌ ma tahun inaꞌan. Sangpūꞌ ka waluntahun ya pamissokoꞌ saga bangsa inān ma bangsa Israꞌil ya patꞌnnaꞌ ma lahat Giliyad. Inaꞌan sigām ma dambilaꞌ sapaꞌ Jordan tampal ni sobangan, ma paglahat bangsa Ammon. 9 Na, pauntas isāb saga sundalu bangsa Ammon ni dambilaꞌ sapaꞌ Jordan tampal ni sꞌddopan boꞌ magbonoꞌ maka bangsa Yuda, bangsa Benjamin maka bangsa Epraꞌim. Jari katiksaꞌan makalanduꞌ in kamemon bangsa Israꞌil. 10 Pagka buwattēꞌ, parahing sigām ni PANGHŪꞌ-Yawe, yuk-i, “Bay kami makarusa ni kaꞌa. Bay kami pataikut min kaꞌa ya pagtuhanan kami boꞌ maghinang ni saga tuhan-tuhan Baꞌal.”
11 Anambung PANGHŪꞌ, yukna, “Bay sa kam liyusanku min komkoman saga bangsa Misil, Amor, Ammon, Pilistin, 12 Sidun, Amalek maka Maꞌon. Bay kam parahing ni aku mikitabang waktu kapamissokoꞌ saga bangsa inān ma kaꞌam, ati talappas kam eꞌku. 13 Saguwāꞌ minsan na, ilu na isāb kam pataikut min aku boꞌ maghinang ni saga tuhan-tuhan saddī, angkan mbal na aku bilahi angalappas kaꞌam pabīng. 14 Pehēꞌ kam parahing ni saga tuhan-tuhan ya tapeneꞌbi. Mikilappas kam ma sigām bang kam ma deyom kasigpitan!”
15 Saguwāꞌ anganjunjung na paꞌin saga bangsa Israꞌil ni PANGHŪꞌ, yuk-i, “Bay kami makarusa. Hinangun ai-ai ya patut katꞌkkahan kami, saguwāꞌ, ndūꞌ, ma waktu itu lappasun kami.” 16 Magtūy niꞌbbahan eꞌ bangsa Israꞌil saga tuhan-tuhan bangsa liyu boꞌ angisbat si Yawe, ati mbal kasandalanna kasukkalan sigām.
17 Na ma waktu inān, bay na pasakap baꞌanan sundalu bangsa Ammon boꞌ magpustu ma Giliyad. Jari inaꞌan isāb bangsa Israꞌil magtipun maka magpustu ma lahat Mispa. 18 Sakali makapahꞌlling saga pagnakuraꞌan aꞌa Giliyad, yuk-i, “Sai-sai makarahū amonoꞌ saga aꞌa Ammon, iya na ya magmakōk ma kamemon maglalahat ma Giliyad itu.”